ISÁÚTÌI.
3.
N tú onìtì wèè di wenwe mɛsémmɛ̀, Kuyie mmiɛkɛ kɛɛ̀ yonkɛ kɛ̀ kù m potɛ́, 
Kuù n tèntoo kɛ n tɑnnɛ́ dibiìnnì miɛkɛ, dibiìnnì miɛkɛ nkɛ dɛ̀ í tú kuwenniku. 
Míì ĩ́nkɛ̀ bɑɑ nɛ́ nkɛ ku nɔ̀ùtɛ̀ ɔ̃ ntṹṹ nkɛ duòmɛ̀, kɛ kónnì 
Kuù cṹũ m mɑmbii nnɛ̀ n kɔ̃̀ntì, kɛ bɔ̀kɛ́ kṹɔ̃̀. 
Kù m pèńnɛ́ kudookɔti nku, mɛfɛ̃́ṹtímɛ̀ mɛɛ̀ n fitɛ́ kɛ tii mɛdɔ̀mmɛ̀ tɛ̃mɛ̀. 
Kuù duɔ́ nkɛ̀ nh ɑ̃ dibiìnnì miɛkɛ, bɛ̀ɛ̀ ku nɛ̀ dimɔ̀nnì bɛ kɔ̃mɛ. 
Kù n fii nkuduotí nku kɛ̀ dɛ̀ bo yie nkɛ̀ m bɑ́ɑ́ yɛ̀, kɛ m boú ntifĩnti cɛ̃́ɛ̃́tì. 
Kɛ̀ n kuɔ̀ nkɛ kù yu kɛ ɔ̀ù, kɛ̀ kù yetɛ kù bo keèmɛ̀ n dɑbònnì. 
Kɛ pèńnɛ́ yɛtɑ̃́rɛ̀ diɛyɛ̀ n kó kucɛ, kɛ diti ncɛ imɔu. 
Kù òkɛ musĩ̀mmù kɔ̃mɛ mmɛ, kɛ n dìí dicìrícìrì ɔ̃ nhokɛmɛ̀ kucɛ timútì miɛkɛ. 
Kɛ òòtɛní kɛ n dɛ̀too kɛ nɛ̀tɛ́ nɛ́tɛ́, kɛ dɔúnko. 
Kù sɛ̀u nkupie nku kɛ n wetínnɛ́ tɛhontɛ̀ tɛ̃mɛ̀, kɛ bo tɑ̃. 
Kù n tɑ̃ɑ̃́ ku pie nyi, kɛ̀ ì tɑ kɛ tùɔ̀ti n ceumbɛ̀, kù kùótɛ́ ku doò dimɔu ndi n yĩ́nkɛ̀. 
M botí kɔbɛ bɛmɔu n dɑúmu, kɛ̀ dɛ̀ sonnɛ́ kɛ nɑɑ́ mbɛ kó fɛyɛ̀nfɛ̀. 
Kuù n dií ndɛtiirɛ kɛ̀ n dɛ, kɛ n nìi mmɛdɔ̀mmɛ̀. 
Kuù duɔ́ nkɛ̀ n cɑ̀ɑ́kɛ́ itɑ̃́ɑ̃́, kɛ n kũnnɛ́ mutɑ́pɛí mmiɛkɛ. 
Kuù n dɛ́tinnɛ mɛom̀pùmɛ̀, kɛ̀ n yɛ̃̀nko bɛ̀ tu dɛ̀ diwɛ̀ì. 
Mɛm̀mɛ kɛ̀ m bɛ́i nkɛ dɔ̀: n kpɛrɛ dèèmu mmɛmmɑɑ̀! N do bɑɑ dɛ̀ n Yiɛ̀ nKuyie mborɛ̀, dɛ̀ yɛ̀ dɛtetìrɛ̀ ndɛɑ̀! 
Dentɛní n do dimɛ̀ ifɛi kɛ́nhɑ̃́ɑ̃́, n cɑ̀ɑ́kɛ́ mɛ̀ɛ̀ sémmɛ̀ tii kɛ dò mmɛdɔ̀mmɛ̀ mmɛ. 
N ti ndenniní, kɛ̀ n yɛ̀mmɛ̀ cɑ̀ɑ̀ri m miɛkɛ sɑ̃́ɑ̃̀. 
N tɛ n dɔ́ kɛ́ndenniní tì, tìì te kɛ̀ n kpɑɑ́ kémmú tiì tu tii: 
Ti Yiɛ̀ nKuyie nkó mɛsɑ̀ɑ̀ mmu nyí dèè, ku sémmɛ̀ mu nyí tùɔ̀kɛ mɛ mɑ̀nku. 
Mɛ̀ ɛ̃nkùmu bɑ́ dìì kṹnweńnì, n Yiɛ̀ nKuyie nhɑ tú timɔ́mmɔnti yiɛ̀ nwe sɑ̃́ɑ̃̀. 
N Yiɛ̀ nKuyie nkuù tu n kpɑ̀tì, dɛɛ̀ te kɛ̀ n kù bùɔ́. 
Ti Yiɛ̀ nKuyie nnìtimu wèè ĩkú ku ĩ́nkɛ̀ o kpɛ́í, wenwe wèè kù wɑnti. 
Dɛ̀ wennimu onìtì ɑ bo ndòmmɛ̀ kɑ́rɛ́, kɛ kémmú ɑ Yiɛ̀ nKuyie mbo dɑ dɛɛtɛ́mɛ̀. 
Dɛ̀ wennimu onìtì fɔ̃́ nhɑ bo yiemmɛ̀, bɛ̀ dɑ nɑ́ɑ́ ntì ɑ bíkɛ́mbɛ́ntì mɔ̀nnì. 
Kɛ̀ ti Yiɛ̀ nKuyie ndɑ tɑnnɛ́ mɛhɑ́ɑ́rìmɛ̀ miɛkɛ, ɑ kɛntɛ́ ɑmɑ́ɑ̀ kɛ́dɔ̀ só. 
Kɑroo kɛ́fṹṹ nhɑ nùù kɛtenkɛ̀, kɛ̀ dɛ̀ nɑɑti ɑ yɑ̀ mɛteèmmɛ̀. 
Bɛnkɛ ɑ bɑɑ bɛ̀ɛ̀ dɔ́ kɛ dɑ́ puotì, bɛ̀ɛ̀ wɑnti kɛ́ dɑ dií nyifɛi. 
Kɛ yɛ̃́ ti Yiɛ̀ nKuyie nhɔ̃ɔ̃ í ndootóomɛ̀ onìtì sɑ̃́ɑ̃̀. 
Kù ɔ̃ɔ̃ potɛ́ kɛ́wɛ̃tɛ kɛ́kuɔ́mmu mɛsémmɛ̀, kɛ yɛ̃́ ku sɑ̀ɑ̀ ndɛumɛ̀mu. 
Dɛ̀ í tú nɛ̀ ku yɛ̀mmɛ̀ mmɛ kù fɛ̃́ũnkomɛ̀ bɛnìtìbɛ̀, kɛ diinko mɛsémmɛ̀ fɛnitiyɑnfɛ̀, 
Bɛ̀ mɛ̀ ncùùtì tikpetíntì timɔu dihɛì miɛkɛ, 
kɛ kommu bɛ̀ɛ̀ í nɑɑti tibeéntì miɛkɛ, fɔ̃́ nKuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ɑ ììkɛ̀. 
Bɛ̀ mɛ̀ ncɑɑ̀ri tibeéntì, Ti Yiɛ̀ nKuyie nkɑ̀ɑ í wúónnɑ́ɑ̀? 
We mbo bɛ́i nkɛ̀ dɛ̀ɛ dɔɔ̀, kɛ̀ dɛ̀ í tú ti Yiɛ̀ nKuyie nkuù duɔ́ ndinùù 
Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kuù ɔ̃ɔ̃ bɛ́i, nkòo nìtìi yɑ̀ mɛyɛi nyoo mɛsɑ̀ɑ̀. 
Onìtì fɔ̃́ nnɛ̀ ɑ yɛi mmiɛkɛ, kɑ̀ɑ fòù ɑ tɛ̃́nkɛ nɛ́ nsɑ́útí nɛ̀ ɔ̃̀nti? kɑ̀ɑ í kuɔ̀ nhɑ yɛi nkpɛ́í nkɛ. 
Yóunɛ̀ kɛ̀ ti wéntɛ́ icɛ ti tũ nyì, kɛ ì pɑɑtɛ́ mɛsɑ̀ɑ̀, kɛ́wɛ̃tɛ ti Yiɛ̀ nKuyie mborɛ̀. 
Tí youtɛ ti nɔu Kuyie mbíɛ́kɛ̀, kɛ́ kù bɑ́ntɛ̀ nɛ̀ ti yɛ̀mmɛ̀ mɛmɔu. 
Kuyie nti dɑ cɑ̀kɛmu mɛdiɛ̀ nkɛ yetɛ ɑ kpɛti, dɛɛ̀ te kɑ̀ɑ múnkɛ í ti cĩ̀ɛ̃́. 
Kuyie ndɑ̀ɑ́tí ku miɛkɛ nkɛ diyɑɑ̀bòrì kɔ̃mɛ, kɛ ti bɛtì kɛ kɔùtì bɑ́ mɛsémmɛ̀ í kù bo. 
A dɑ̀tínnɛ́ ɑ mɑ́ɑ̀ ndi yɛwɛtɛ̀, kɛ̀ dɛ̀ bo yie nkɛ̀ ti bɑ́ɑmmu bɑ́ɑ́ dɑ tuɔkɛ. 
A ti dɔ̀ɔ̀ tiyontì nti, dɛsĩ́ntɛ́kpɛrɛ yɛbotɛ̀ ììkɛ̀. 
Kɛ̀ ti dootitɔbɛ̀ bɛmɔu, ɑ̀ɑ̀tɛ tinùùtì kɛ ti wetí. 
Kukɔ̃m̀bɔ̀doróo nɛ̀ mɛyɑnfiì, dɛɛ̀ nɛ́ tú ti kpɛrɛ, kɛ̀ bɛ̀ ti puɔ̀ nkɛ ti kɔù. 
N nuɔ nyiì pũɔ̃̀ ntinɔnniɛti, mɛyɛi mmɛ̀ɛ̀ tùɔ̀kɛní n nìtìbɛ̀ mɛ kpɛ́í. 
N nuɔ nyiì ti tinɔnniɛti sɑ̃́ɑ̃̀, bɑ́ mɛom̀pùmɛ̀ í bo. 
Kɛ̀ n kèḿmú n Yiɛ̀ nKuyie mbo sĩ́nnɛ́nímɛ̀ kɛĩ́nkɛ̀ kɛ́ n yɑ̀. 
N kɔmmúmu kɛ̀ n nuɔ nyonkɛ, tìì tùɔ̀kɛní nh ɛì kɔbɛ ti kpɛ́í. 
Bɛ̀ɛ̀ n nìí mbɛ̀ n nìí ndɛtetìrɛ̀ ndɛ, kɛ m bɛ̀tì tɛnɔ̀tɛ̀ kɔ̃mɛ. 
Kɛ n tɑnnɛ́ n fòùwè difɔ̃̀tìrì, kɛ m bɔmmù yɛtɑ̃́rɛ̀. 
Kɛ̀ mɛniɛ ndɑ̀tínnɛ́ n yuu, kɛ̀ nní nyɛ̃́ kɛ tú n kpɛrɛ dèèmu. 
Kɛ̀ nní mbo difɔ̃̀tìrì cũmpuri miɛkɛ kɛ yu ɑ yètìrì, Áú n Yiɛ̀ nKuyie! 
A kèèmu n dɑbònnì, bɑ́ɑ́ pi ɑ toò, keè nh úùfɛ̀. 
N do dɑ yu kɑ̀ɑ n tɔ́ɔ́nnímu, kɛ n nɑ́kɛ́ kɛ tú m bɑ́ nyĩɛ̃̀kù. 
N Yiɛ̀ nKuyie nhɑ n kòńnɛ́mu, kɛ n dɛɛtɛ́. 
N Yiɛ̀ nKuyie nhɑ yɑ̀mu bɛ̀ n cɑ̀ɑ̀rɛ̀mɛ̀, ɑ m pútɛ́ kɛ́ m pɑtɛ. 
A yɑ̀mu bɛ miɛkɛ n cɔ́úmmɛ̀, kɛ̀ bɛ̀ nɑ́ɑntɛ n kpɛ́í kɛ bo n kuɔ. 
N Yiɛ̀ nKuyie nhɑ kèèmu bɛ̀ n sɑ̃̀ɑ̃́mmɛ̀, bɛ̀ dɑmmù mɛ̀ɛ̀ botí n cĩɛ̃. 
N níim̀bɛ̀ nɑ̀ɑ́ ntì n kpɛ́í, nɛ̀ bɛ̀ n dɔ́nɛ̀ tì yɛwe yɛmɔu tì tu tiyɛiti nti. 
Kɛ̀ bɛ̀ kɑ̀ri yoo bɛ̀ còḿmú, míì nɑɑ́ mbɛ kó fɛyɛ̀nfɛ̀. 
N Yiɛ̀ nKuyie nfɔ́ɔ́ mbɛ bɛ̀ n dɔ̀ɔ̀ dɛ̀, yietí bɛ bɛ tɔ̃mmú mɑ̀nnɛ̀ tìì yeti. 
Duɔ́ nkɛ̀ bɛ too kpenkɛ, kɑ̀ɑ bɛ̀ dɔ̀ɔ̀ mɛyɛi. 
Kɑ̀ɑ bɛ̀ bɛ̀tinɛ̀ kɛmiɛkɛ, kɛ́ bɛ̀ kùɔ kɛtenkɛ̀ ĩ́nkɛ̀ kɛ́ bɛ̀ dèè.