Amɔɔsi.
7.
Kɛ̀ ti Yiɛ̀ nKuyie nni mbɛnkɛ mɛbɛnkùmɛ̀ mɑmɛ̀, kɛ̀ n yɑ̀ fɛcofɛ dɑ̀tínnɛ́mɛ̀ kɛ dò ndiwɛtirì kɛ sɔ̃́ mbɛ̀ kɛ̃ĩ́ okpɑ̀ɑ̀tì sɑ̃mmútì kɛ̀ tì bo kɛ dɔ́ kɛ́puku. 
Kɛ̀ fɛɛcofɛɛ dɛ́útóo timútì kɛ́ndɔ́ kɛ́ tì dèè kɛ̀ n kuɔ́nko kɛ dɔ̀: Áú! Ti Yiɛ̀ nKuyie nti kuɔ́ mmɛsémmɛ̀ kɛ̀ mɛɛ̀ dɔkɛ Sɑkɔbu kó kufuku í sũ bɛ̀ í yó nkpɑɑ́. 
Kɛ̀ ti Yiɛ̀ nKuyie nceetɛ ku yɛ̀mmɛ̀ kɛ bɛ́i nkɛ dɔ̀: Dɛ̀ í yóó tuɔ̀kɛní. 
Kɛ̀ ti Yiɛ̀ nKuyie nni mbɛnkɛ muhɑ̃ɑ̃́, kɛ́ mù yùní kɛ̀ mùu cɔ́útɛ́ kɛtenkɛ̀ miɛkɛ kó mɛniɛ, kɛ́ mɛ̀ sũ̀ɔ̃̀too, kɛ̀ dɛpɑɑ ncɔ́útóo. 
Kɛ̀ n kuɔ́nko kɛ dɔ̀: Áú! Ti Yiɛ̀ nKuyie nti kuɔ́ mmɛsémmɛ̀ kɛ̀ mɛɛ̀ dɔkɛ Sɑkɔbu kó kufuku í sũ kù bɑ́ nkpɑɑ́. 
Kɛ̀ ti Yiɛ̀ nKuyie nceètɛ ku yɛ̀mmɛ̀ kɛ bɛ́i nkɛ dɔ̀: Dɛndɛ múnkɛ í yóó tuɔ̀kɛní. 
Kɛ̀ n yɑ̀ ti Yiɛ̀ nKuyie nkɛ̀ kù còḿmú kuduotí mɑkù ĩ́nkɛ̀ kɛ pikú kuhɔ̃ũ kɛ̀ kù cɑ̀ɑ́tí dibiɛrìmínnì. 
Kɛ̀ kù m bekɛ kɛ dɔ̀: Amɔɔsi ɑ yɑ̀ bɑ? Kɛ̀ n dɔ̀: N yɑ̀ kuhɔ̃ũ kùù cɑ̀ɑ́tí dibiɛrìmínnì. Kɛ̀ kù dɔ̀: N yóó tɑ̃ũ kuhɔ̃ũ nku kùù cɑ̀ɑ́tí dibiɛrìmínnì n kɔbɛ Isidɑyɛɛribɛ ĩ́nkɛ̀ kɛ́yɑ̀ kɛ̀ bɛ̀ sìɛ́. N tɛ̃́nkɛ í yóó bɛ̀ cĩ̀ɛ̃́, mbìtì! 
Isɑki yɑɑ̀bí kó yɛwũɔ̃tɔ̀rɛ̀ bo dɔúnko, kɛ̀ Isidɑyɛɛribɛ kó yɛtɔ̀rɛ̀ɛ nɑɑ́ ntidobontì. Kɛ̀ n cómmú nɛ̀ disiè kɛ́wetínnɛ̀ Sedoboɑmmu cĩ́ɛ̃̀tɛ̀. 
Mɛm̀mɛ kɛ̀ Amɑsiɑ ikuɔ́ nìùtìi tɔ̃ nkɛ̀ bɛ̀ɛ nɑ́kɛ́ Isidɑyɛɛribɛ kóo kpɑ̀ɑ̀tì Sedoboɑmmu kɛ dɔ̀: Amɔɔsi dɔ́ kɛ́ dɑ bɔmmu kɑ̀ɑ tɛ̃́nkɛ bɑ́ ntú Isidɑyɛɛribɛ kóo kpɑ̀ɑ̀tì. Ti í dɔ́ kɛ́nyo ò nɑ̀ɑ́ ntì. 
Ò nɑ̀ɑ́ nkɛ tú: Fɔ̃́ nSedoboɑmmu ɑ bo kú mudoò miɛkɛ kɛ̀ bɛ̀ɛ pĩ́mmú Isidɑyɛɛribɛ kɛ́kònnɛ̀ dɛdɛ́tirɛ̀. 
Mɛm̀mɛ kɛ̀ Amɑsiɑɑ nɑ́kɛ́ Amɔɔsi kɛ dɔ̀: Oyuwúoǹtì fɔ̃́! Kò nSudɑɑ tenkɛ̀ kɛ́nnɑ́ɑ́ nKuyie mpɑ̃ɑ̃nɑ́ɑǹtì kɛ pɛ́únɛ̀ mudiì. 
A tɛ̃́nkɛ bɑ́ mbo diɛ mBetɛɛdi kɛ́nɑ́ɑ́ nKuyie mpɑ̃ɑ̃nɑ́ɑǹtì kɛ yɛ̃́ okpɑ̀ɑ̀tì kó ditɔ̀nnì ndimɛ̀, tɛkpɑ̀ɑ̀tìcĩ́ɛ̃̀tɛ̀ kpɛri ndi. 
Kɛ̀ Amɔɔsii ò tɛ̃̀ńnɛ́ kɛ dɔ̀: N do í tú ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò, n ketɛ́ kɛ do í tú Kuyie mpɑ̃ɑ̃nɑ́ɑǹtì nɑ́ɑm̀bɛ̀ kó kufuku kou. N do tú onɑɑcɛ̃nti nwe kɛ fiiku dɛtie mbɛ̀ tu dɛ̀ sikomɔɔ. 
N do cɛ̃mmú n wũɔ̃ nyi, kɛ̀ ti Yiɛ̀ nKuyie nni nyú kɛ n nɑ́kɛ́ kɛ dɔ̀: Kɔtɛ kɛ́nɑ́kɛ́ n nìtìbɛ̀ Isidɑyɛɛribɛ m pɑ̃ɑ̃nɑ́ɑǹtì, 
di m̀mɔ̀nnì kéntɛ́ ti Yiɛ̀ nKuyie ntu n dɑ nɑ́kɛ́ tì: Fɔ̃́ nwèè tu m bɑ́ nnɑ́ɑ́ nKuyie mpɑ̃ɑ̃nɑ́ɑǹtì Isidɑyɛɛribɛ kpɛ́í, kɛ tú m bɑ́ nnɑ́ɑ́ nyIsɑki yɑɑ̀bí n kó tiyɛinnɑ́ɑǹtì. 
Nɛ̀ dɛ kpɛ́í ti Yiɛ̀ nKuyie ntu: ɑ pokù bo yĩ́ onitipòkù wèè dɔuti dɔutinɛ̀ bɛnitidɑɑbɛ̀ kɛ̀ bɛ̀ nhò dɔutinɛ̀ kupììti dihɛì miɛkɛ, kɛ̀ bɛ̀ɛ kuɔ ɑ bí initidɑɑì nɛ̀ initipòì mudoò miɛkɛ, kɛ́berí ɑ tenkɛ̀ kɛ totí, kɛ̀ bɛ̀ dɑ kuɔ bɛtɔbɛ̀ tenkɛ̀ bɛ̀ í tũ ndɛ̀ Kuyie, kɛ́pĩ́mmú Isidɑyɛɛribɛ kɛ́kònnɛ̀ dɛdɛ́tirɛ̀ dònninkonɛ̀ onitipòkù wèè yóu o dɔù kɛ dɔuti dɔutinɛ̀ bɛnitidɑɑbɛ̀.