11 Ŋunhi ŋayi Noah 600 mirriyinany dhuŋgarramirriyin, bala gapuny munatha'ŋumydja ŋuwapthurra, bala dhurrwarany djiwarr'puynydja ḻapthurra, 12 bala waltjaṉdja yarrupthurra, dharyurra gan, 40 walu ga 40 munha. 13 Ga ŋuriŋi bili waluy walalnydja Noah ga nhanŋu miyalk ga ḻurrkun' djamarrkuḻi' maṉḏaŋ yäku Shem, Ham ga Japheth, ga miyalkkurruwurr walalaŋ, bukmaknha walal gärrinan marthaŋay'lila. 14 Ga bukmak ŋunhi nhä malany marrtjinyamirr warrakan, boḏiny ga wakinŋu, ḏilkurr ga yumurrku, ga ŋula nhä malany warrakan buṯthunamirr, walal marrtjin gärrinan marthaŋaylila. 15 Waŋga'waŋgany ḏirramu warrakan ga waŋga'waŋganydhi yan miyalktja warrakan, bukmak ŋula nhä malany ŋuli ganha ŋunhi ŋorranha dhiyal munatha'ŋur, bukmaknha walal gärrinan marthaŋaylila, malthurra Noah-wnha. 16 Ga ŋunhiyi bitjarryi Godthu lakaraŋal. Bala Garrayyun dhurrwarany gungaŋalnha dhäŋur Noahwalnydja gärrinyaŋur.

17 Bala gapuny ŋuwapthurra 40 munhaynydja ga 40 waluynydja, bala marthaŋaynydja buwalkthurra. 18 Bala gapuny dhulmuthinan mirithinan, bala marrtjin marthaŋaynydja burkthurra garrwarnha ŋapaŋurnha gapuŋur. 19 Ga gapuny mirithinan dhulmuthin, ga waḏaŋga'-weyinnhany ŋunhi wäŋany warrpam'nha buku-ḻupmaraŋal. 20 Bala ŋal'yurra marrtjin gapuny mirithinan ga yan bili ga djuḻkmaraŋal ŋunhi bukuny. 21 Ŋula nhä malany ŋunhi ŋuli ganha ŋorranha dhiyal munatha'ŋur, warrpam'nha dhiŋgaŋalnha; warrakan buṯthunamirr ga gal'yunamirr ga marrtjinyamirr ga yolŋu'-yulŋu, warrpam'nha dhiŋga'-dhiŋgaŋal.

22 Ŋula nhä malany dhiyal munatha'ŋur ŋir'yunamirr, warrpam'nha dhiŋgaŋal. 23 Garrayyu buwayakkuŋal ŋunhi nhä malany gan dhiyal munatha'ŋur ŋorran; yolŋuny ga warrakan'nha malany marrtjinyamirriny ga buṯthunamirriny. Yurr walŋathinany ŋunhiwurrnha bilin Noah-n ga ŋunhi nhä malany nhanŋu gan malthurr marthaŋayyu.

24 Yurr gapuny bäyŋu yan ŋula ŋurru-yirr'yuna nyimdhunany; baḏak yan gan dhärran gapuny dhaŋaŋ, ga yan bili ga 150 walu ga munha djuḻkthurr.