1 Na, na kaya kaere bi amiye tora, bi ekalesia tora vene yi fogori egira reida. Na bi Keriso di esika moina veyaka amiye ma vabara vata nigo, mina vegu ka rau regida. Mina ya nida, 2 Sei di vene yi fogori mamoe kana nari resi ourefeidefa, idu niguba bi ga refa, idu ini ura dada, Sei di ura ya fafau dada;* Sei di ura ya fafau dada; bura bedakai mina ago nufa de. ofa ofa dudu fore moina moimai ga refa, idu yi uka dadina dudu moimai refa.✡ Jn 21.15–17 3 Kaere amiye nari regi ya maro, bi ya kaya moi tora bi ga refa, idu ya usi dinari, ya kaya amiye di fogori yi moimai oteimafa. 4 Kamini mina mamoe dogo redo Varika amiye ogau nigori, ya bi ini vabara di kini kana ada bou moigedi; ini vabara di yeiva bi keika de nigo.

5 Mina makai, ya ofi godua bi tora vene di gabireri raga refa; ma yi amiye tau ya kaya ya kaya varuka kana ave nina nufa fufuta bou rebifa, adina “Sei yaku matuka vene gedu mado, idu ave nidedi vene rofu buni tora gade mado.”✡ Prov 3.34 6 Mina dada, Sei di vana di vava gabireri ya kaya moi ave rifa, ye ini ari buniri, ya moi odoro rigo dada.✡ Mt 23.12; Lk 14.11; 18.14 7 Yi mokena toe tau bi inasa ferefa, ini adina bi ina yaku ya nari redo.

8 Ya kaya vesi nari refa; yi tuma amiye Bodaka bi lion goroka tora nido kana, dibo resi amiye iri vau regi maina redo.† Bura bedakai ka dada nufa. 9 Yi mokena vari gira aena egira resi ina rofu are resi gedu mafa; ini adina bi ya diba, mina kono tora noibanuri, yi asiyaka Sei rofu mokena vari gira aena vene ka mina kana esika esika moidedi. 10 Ye mina neitua keika guraugedi, ma gabi bi buni tora gade di Sei, kaere ini toga toga ameibobina vabara Keriso ideri ya‡ ya; bura bedakai una nufa. rofu raka niyo, bi iniye ya dudusa moi rorobo risi yo nisi egira resi ya moi are rego. 11 Vava tau bi toga toga Sei di! Rama.

12 Silas na aedeyo ma mina bura keika riyafa; nai mokenari ina bi ekalesia dubuini, kaere bi ini ago nido amiye. Na ura reida bi ya niegira resi mina ago tau, bi Sei di buni tora gade rama ya rofu niogau regida. Mina dudu are rei gira refa.✡ Acts 15.22, 40

13 Yi rasini dubu Babylon ri, ina ka Sei yaku auba reyo, ma Mark, kaere bi nai mida kana, ina yaku ya vene rofu yuata nifeideyadi.✡ Acts 12.12, 25; 13.13; 15.37–39; Col 4.10; Phlm 24 14 Ya kaya ya kaya ekalesia di uka mana dudu fuka refa.

Uka amuta ya tau fafau ameyaine, ya kaere bi Keriso di.