Ado Mala Hedabi Magaea Dëdëi.
1.
Ado Mala Hedabi goda, Godeïe malö Yesu Gelesoea dafidi mi gäwi amo dialea. 
Bea sälo Aisaeaïe bebagi ado dafidi dëdëla negei dibe amoda gowe. Godea sähalea, Nabuö! Nïe ado säla ïmolö mosalamalo amomada, dïe idi fodolasimäia, ema dafidimola sämolömelë. 
Sege falai udia dolö aligisia made ami nea afädëa wesalea, Dafidilo Geloi misiäia idi fodomolö amo dadaiaha namialo. Ïe idi amoda mogolafalï fodolasimalola säha neamelëla säi amo dëdëla negei dialea. 
Amala säla dëdëla negei dibe amo gadola, sege nafade udia dolö aligisia made ami ödägi gelo Yone e misi nelo. Ea sähalea, Dilia nafade hamoi amo Godea hëmäia, dilile iso asigi besulahilä, ödägi gemolö dialeala säla ïaha nelo. 
Yudia sege gaamu holöfalï holöfalï dibea amilage, Yalusaleme udia dolö sulubadelage, nefolalo amoli e neebea ami mafusa nelo. Mafula ilia nafade hamoi amo sisiaha maadesebegi, Yonea ili ödä Yodonagi gesa nelo. 
Yone eda sugua gamele hilïa fagulo hamoi amo salugalahilä sugua gafodo gadoia malibu negela nelo. Eada galiawage äwi ödäge naha nelo. 
Ea ado mala säla ïahalea, Ne dafidi misi neawe. Hobea ne baagia afädë moholö amoda, ne holöfalï neebewe gadoi made, eda ilibia edefade neebe amo moholömelë. Ne hedabi made ameada, na ïe emo usililo ëfë gumusula dialea fisigämolö amo dofea made neawe. 
Na dili ödäeamu gesa neawe, eada dili Eleloi Gesamia gemolömelëla sa namolömelëla säla ïaha nelo. 
Segeyo amogimu Yesu e Disiligi Galiliïe gaamu Nasalesela maasebegi, Yonea Yesu ödä Yodonagi gelasi. 
Yesu ödägi gelahilä ödägila fodolo agesua aliga adogoi amole, mu dusuia gase amo melï. Amala dusuia gasebegi, Gesami haea maliabu gadoi amo digalahilä ema fise melï. 
Amo gaalu, selesaia mosöala ado afädë säia idogosalea, Dida nïe malö. Na dima edefademalä boba hamoi nea, nïe iso asigia dima obeägïsa neawela säi. 
Ado amo säha maadeia gai amole, Godeïe Gesamia Yesu e sege nafade udia dolö aligisia made ami mosäia fisiga gai. 
E fisiga gaia ami segeyo nabülasi biyidia nebegi, mugabe Saidania Yesuea nafade hamomabelela fedogola bimolö misi. Yesu e sugua ilaba elö elöla nefolalebea ami nebegi, selesaia fii ilia e ugila negemolö misi. 
Yone galabaia negesebegi, Yesu e Galili awälahilä Godea Beaha Maadela Sigi Neebe amoïe Ado Mala Hedabi säla ïaha nelo. 
Yesuea sähalea, Segeyo Godea daiala negei dilo amo walio wegi gausiai ameada, Godea Beaha Maadela Sigi Neebe amoda ga madefalï dialeamelë. Dili asigi besulahilä, Ado Mala Hedabi go gaula mogomalola säla ï. 
Yesu e oeabo Galili agesu nedaha nea beahamelebe seme digilo dolö äudä, Saimono ïe edoo Ädulule seme digisa neebe melï. 
Bealahilä Yesuea elema sähalea, Na alima udia dolö nelo mala oleledelä. Ali ne awäsewe gadola bëgëla misiëla säi. 
Amala säsebegi, elea selëgë amo fodolofalï ami negesilahilä e bëgëla asi. 
Yesu e holöbö sedade awälahilä beahamelebe, Sebediïe malö Yamese ïe edoo Yonele dudaia ami nea selëgë nuli amo hamogisa neebe melï. 
Bealahilä fodolofalï ele wesebegi, elele eedo Sebedige bidi nimolöïe hamoi hamosa nefolalo amolige dudaia amilahilä ele Yesu bëgëla asi. 
Yesuge udia dolö odoage ili Gabaniama gaamugi afiai. Segeyo Sabada gafe besela galasebegi, Yesu e gedolo mosöa ami nogila digalahilä, ea udia dolö ilima ado mala olelesa nelo. 
Ea säla olelese amo nabalahilä ili fudugisa sefolalo. Mida, Ado säla negei olelelo amolia olelelo amo gadola made, geloi hïdo elöi gaula nea olelese amogi. 
Segeyo amo gala dolö mugabe fedai afädë gedolo mosöa ami maala sulo. Dolö amea üalala digila sähalea, 
Nasalese fii Yesu-o, nilï neebea wi dia edo hamomolö misi. Nilï nufudadigimolöïe misile. Nada di dawa. Dida dolö hedabi mogoifalï, Gode hï e neebeala misimelëla säi. 
Amala säsebegi, Yesuea mugabe amoma nemosalea, Adomabu. Dolö go dïgïlahilä mosöla säi. 
Amala säsebegi, mugabe amea dolö amo neala amulämelasilahilä üalala digila doadigila asi. 
Amala hamosebegi, udia dolö sefolalo amoli sulubadela, fudugilahilä hilidomu säla didigahalea, Walio hamoi amoda edo gadoidu. Walio dolö goea ado säi amoda ado gähe geloi hïdo elöi gelola säimelë. Ea ado säseda, mugabe ilia nabelo gabula säi. 
Yesuea hamoi amo fodolofalï udia dolö Galilimadi nefolalo amoli sulubadelaea nabala didigai. 
Yesuge Yamese Yonege ïe begela aulo odoa ilige gedolo mosöa amila Saimono Ädululea mosöa asi. 
Saimonoïe udia amoïe eme domalo hëgïla oloi, imididaia adi dilo amo, ilia fodolofalï Yesuma säla ï. 
Säla ïasebegi, Yesu e udia oloi dibea ami awälahilä, naabogi gaula nowela ifosi. Amala hamosebegi, e hëgïla oloi dilo amo hogosa helela wahisebegi ea ili molö muäia neala ï. 
Deadi eso digase gaalu, udia dolö nefolalo amolia oloi difolalo amoli neala gaula, mugabe fedai nefolalo amolige sigi gaula digila Yesu neebea ami gegedoi. 
Gaamugi ami udia dolö nefolalo amoli sulubadela idi galo hadai daia amimu gegedoi. 
Amala hamosebegi, Yesuea udia dolö yafie olo elö elöla oloi difolalo amoli wahila digi, mugabe fedai yafie nefolalo amoli nesila digila digisa nelo. Amala hamosebegi, mugabe amolia Yesu eda gowe neala dawadigi nefolalebegi, Yesuea mugabe amolima dilia adomabula säi. 
Sege yomolö amo gaalu Yesu e nowela segea awäla, udia dolö aligisia made ami awälahilä Godema adosa sulo. 
Saimonoge ebalä nefolalo amoliage Yesu hogogola hobeala bëgëi. 
Beagolelahilä ilia ema sähalea, udia dolö sulubadelaea di hogosa neamelëla säla ï. 
Amala säla ïasebegi, Yesuea säla obëgësalea, Gamelä, Sege gaamu ga made dibea ami ado mala säla ïmolö afiadi. Neda amo hamomolö misimelëla säi. 
Amala sälahilä e Galili sege sulubadelamadi nawesa nea gedolo mosö nefolalebeadi amogi awälahilä Yesuea ado mala säla ïadigi, mugabe fedai nefolalo amoli nesila digisa nelo. 
Amala hamosa nebegi, dolö gudubu hamoi afädë Yesu neebea ami maalahilä emo gumu sasagala fia idogola salea sähalea, Dia ne wahimäia helësëseda, hä dia ne wahilasimolöi nebegola säi. 
Amala säsebegi, Yesuea e bobasëlahilä ïe naabo mogodigia gala, dolö amo diigisa nea sähalea, Na amala helësësa, wahimola säi. 
Amala säsebegi, gudubu hamoi amo fodolofalï hogosa helela wahi. 
Yesuea e fodolofalï mosalolahilä, ema gelola sähalea, 
Nabuö! Di wahi go oböla odoama säla ïmabio. Gobela ïlo dolö neebe amea di bimäia olemolö mosalo. Amalahilä, udia dolö ilia bimäia di wahi go olemolöïe, di hëmäia Mosesea säla negei dibe amo gadola nelebo afädë odala ïmalola säla ï. 
Amala säla ï amo nabalahilä gaso, dolö amo awäha neada, ema hamoi amo ili sulubadelama säla ïïa awäha nelo. Amala sälebeda, Yesu e ilile siigi gaamu dibea ami made awäla, udia dolö aligisia made gasi gala nelo. Amala gasi gala nebegi, sege sulubadelagi udia dolö nefolalo amoli Yesu neebea ami mafula gegedoi.