1 Mãwãnacarea amonitarã boro Nahasada idji sordaorã ume Gala druad̶e wãnaped̶a Jabe puruda jũrã edasid̶aa urad̶i carea. Baribʌrʌ maʌ̃ purud̶ebemarãba Nahasaa jarasid̶aa:

–Dai ume bed̶ea b̶ʌdua ãbaa necai panani carea. Maʌ̃be dairãra bʌ nezocarãda b̶ead̶ia.–

2 Amonitarã boro Nahasaba panusia:

–Mʌ̃a bãrã ume bed̶ea b̶ʌya ãbaa necai panani carea. Baribʌrʌ mãwã od̶i naẽna jũmarãba jʌwa araarebema dauda mʌ̃́a idu nuẽtabid̶ida panʌa. Mãwã dewara puru quĩrãpita mʌ̃a jũma bãrã israelerãra quĩrã perabiya.–

3 Jabed̶ebema bororãba nãwã panusid̶aa:

–Daia domia ab̶a diadua jũma israelerãmaa bed̶ea diabued̶i carea. Maʌ̃ne ni ab̶aʌba daida carebad̶e zed̶aẽ́bʌrʌ, daira bʌ jʌwaed̶a panenia.–

4 Jabed̶ebemarãba diabueped̶ad̶ara Guibea purud̶e Saul b̶abarima jũẽsid̶aa. Mama Nahasaba jarad̶ara purua jũma nẽbʌrʌsid̶aa. Maʌ̃ carea jũmarãda jĩãbi b̶ʌga nũmesia. 5 Mãwã panʌne Saulora idji paca bara idji ẽjũãneba zeped̶a nãwã iwid̶isia:

–¿Sãwãsid̶a? ¿Cãrẽ cãrẽã jãcua jĩã duanʌ?–

Maʌ̃ne puruba Sauloa Jabed̶ebemarãba jaraped̶ad̶ara jũma nẽbʌrʌsid̶aa. 6 Saulba maʌ̃ ũrĩsid̶e Ãcõrẽ Jaured̶eba b̶esia. Nahasaba israelerã biẽ́ oi jarad̶a carea Saulora bio quĩrũsia. 7 Ara maʌ̃da pacada umé beasia. Drapetaped̶a tʌcuasia. Dji tʌcuad̶ara Israel puru b̶eaza diabuecuasia. Dji edeped̶ad̶aba puruza nãwã jarasid̶aa:

–Bariduada Sauloare idjab̶a Samueleare djõne wãnaẽ́bʌrʌ, idji pacara ara naʌ̃ paca quĩrãca bead̶ia.–

Ẽberãrã maʌ̃ ũrĩped̶ad̶ara Ãcõrẽba bio ne wayabisia. Maʌ̃ bẽrã ab̶ari crĩchada edad̶aped̶a djõne wãsid̶aa. 8 Saulba ãdjirãra Beze purud̶e jʌresia. Ãdji juachasid̶e Judad̶ebemada treinta mil panasid̶aa, waabema israelerãda tresciento mil panasid̶aa. 9 Maʌ̃be Jabed̶ebemaba diabueped̶ad̶arãa Saulba nãwã jarasia:

–Jabed̶ebemarãa jarad̶adua nu umatipa b̶ai naẽna dairãba ãdjirãra ẽdrʌ b̶ʌd̶ida.–

Ara maʌ̃da ẽberãrã Jabed̶ebemaba diabueped̶ad̶ara jẽda wãnaped̶a Saulba jarad̶ara purua jarasid̶aa. Maʌ̃ ũrĩsid̶ad̶e Jabed̶ebemarãra bio b̶ʌsrid̶asid̶aa. 10 Maʌ̃ne ãdjirãba amonitarã boro Nahasaa sewad̶eba jarasid̶aa:

–Nu dairãra bʌ jʌwaed̶a panenia. Maʌ̃ne dairãra bʌa quĩrĩã b̶ʌ quĩrãca odua.–

11 Baribʌrʌ nurẽma Saulba idji sordaorãda cãbana awara awara b̶ʌsia. Idjia zocãrã edasia idjab̶a dewara boro umé panʌ́a ãdjiza ab̶ari quĩrãca diasia. Wad̶i pãĩmaena amonitarãra urad̶e wãnaped̶a quena panasid̶aa ab̶a umatipa babʌrʌd̶aa. Dji zocai panenara memenesid̶aa. Ni ab̶a bid̶a ãbaa panenaẽ́ basía.

12 Maʌ̃ne israelerãba Samuelea jarasid̶aa:

–¿Cairãbʌrʌ Saulora dadjirã boro baida quĩrĩãẽ́ panasid̶a? Dairãa jarad̶adua bead̶i carea.–

13 Baribʌrʌ Saulba jarasia:

–Mãwãẽ́a. Id̶i ni ab̶aʌda bead̶aẽ́a Ãcõrẽba dadji israelerãra ẽdrʌ edad̶a bẽrã.–

14 Maʌ̃be Samuelba purua jarasia:

–Gilgald̶aa wãna. Jãmabʌrʌ Saulora dadjirã boroda wayacusa jara b̶ʌd̶ia.–

15 Ara maʌ̃da jũma israelerãra Gilgald̶aa wãnaped̶a Ãcõrẽ quĩrãpita Saulora b̶ʌsid̶aa ãdjirã boroda b̶amãrẽã. Maʌ̃be Ãcõrẽ ume necai b̶ead̶i careabema animarã dragada babue diad̶aped̶a purura Saul sid̶a ãbaa bio b̶ʌsrid̶a ne cosid̶aa.