1 Ãcõrẽba Samuelea jarasia:

–¿Bʌra ab̶a sãʌ̃be Saul carea sopua b̶ai? Mʌ̃a idjira israelerã boro bad̶ada igarasia. Mʌ̃a quĩrĩã b̶ʌa bʌra Beleʌ̃naa wãida ẽberã Jesé abadamaa.* Jesé. Ʌ̃cʌrʌ cartad̶e Jeséra Isaí abadaa. Idji warrad̶ebemada mʌ̃a ab̶a b̶ʌya israelerã boroda b̶amãrẽã. Maʌ̃ carea nedragada cachud̶e tʌ edaped̶a idjimaa wãdua.–

2 Samuelba Ãcõrẽa jarasia:

–Baribʌrʌ mʌ̃da wãibʌrʌ, Saulba cawasira mʌ̃ra beaya.–

Ãcõrẽba panusia:

–Mãẽteara paca zaqueda ededua. Bariduaba iwid̶ibʌrʌ jaradua bʌa animarãda Ãcõrẽa babue diad̶e ze b̶ʌda. 3 Bʌa animarã babue diad̶e wãbʌrʌd̶e Jeséra ed̶odua bʌ ume wãmãrẽã. Maʌ̃ne mʌ̃a cawabiya bʌa sãwã oida b̶ʌda. Mʌ̃a jarabʌrʌ ẽberãda b̶ʌdua israelerã boroda b̶amãrẽã. Maʌ̃ne nedragara idji boro ʌ̃rʌ̃ weadua.–

4 Ãcõrẽba jarad̶a quĩrãca Samuelba osia. Beleʌ̃ne jũẽsid̶e mamabema nocorãba ne wayaaba idjira audiab̶arid̶aped̶a nãwã iwid̶isid̶aa:

–¿Bʌra necai zebʌrʌca?–

5 Samuelba panusia:

–Mãẽ, mʌ̃a naʌ̃ paca zaqueda Ãcõrẽa babue diad̶e ze b̶ʌa. Maʌ̃ carea Ãcõrẽ quĩrãpita bia duanani carea od̶adua. Mãwãnacarea animarãda babue diad̶e wãnia.–

Maʌ̃be Samuelba Jeséra idji warrarã sid̶a Ãcõrẽ quĩrãpita bia b̶ʌped̶a ed̶osia idji ume animarã babue diad̶e wãnamãrẽã. 6 Ãdji jũẽsid̶ad̶e Samuelba Jesé warra Eliáda unuped̶a nãwã crĩchasia:

–Wãrãda naʌ̃drʌ Ãcõrẽba edasia israelerã boroda b̶amãrẽã.–

7 Baribʌrʌ Ãcõrẽba idjía jarasia:

–Ab̶abe dji drasoada, quĩrãwãrẽã sid̶a acʌrãdua. Ẽberãba maʌ̃ra acʌbaria. Baribʌrʌ mʌ̃ara sodrʌ acʌbaria. Naʌ̃ ẽberãda mʌ̃a edaẽ́ b̶ʌa israelerã boroda b̶amãrẽã.–

8 Maʌ̃be Jeséba idji warra Abinadáda Samuel quĩrãpita trʌ̃sia. Baribʌrʌ Samuelba jarasia:

–Naʌ̃gʌ sid̶a Ãcõrẽba edaẽ́ b̶ʌa.–

9 Maʌ̃be Jeséba idji warra Samáda Samuel quĩrãpita trʌ̃sia. Baribʌrʌ Samuelba jarasia:

–Naʌ̃gʌ sid̶a Ãcõrẽba edaẽ́ b̶ʌa.–

10 Jeséba siete warrarãra Samuel quĩrãpita trʌ̃sia. Baribʌrʌ Samuelba jarasia Ãcõrẽba ni ab̶aʌ ãdjid̶ebemada edaẽ́ b̶ʌda israelerã boroda b̶amãrẽã. 11 Maʌ̃ne Samuelba iwid̶isia:

–Bʌa ¿waa warrarã neẽ́ b̶ʌca?–

Jeséba panusia:

–Dji jĩrũarebemada neẽ́a ovejada waga b̶ʌ bẽrã.–

Maʌ̃ carea Samuelba jarasia:

–Idjira jʌrʌbidua. Idji jũẽi naẽna ne cod̶aẽ́a.–

12 Ara maʌ̃da Jeséba idjira jʌrʌbisia. Maʌ̃ warrara quĩrãwãrẽã b̶asia idjab̶a cacua dowa b̶asia. Idjira dau biya querasia. Maʌ̃ne Ãcõrẽba Samuelea jarasia:

–Naʌ̃drʌ mʌ̃a edasia. Maʌ̃ bẽrã idji boro ʌ̃rʌ̃ nedragara weadua israelerã boroda b̶ʌmãrẽã.–

13 Ara maʌ̃da Samuelba nedragara edaped̶a dji djabarã quĩrãpita maʌ̃ warra ʌ̃rʌ̃ weasia israelerã boroda b̶amãrẽã. Maʌ̃ ewarid̶eba ʌ̃taa Ãcõrẽ Jaurera maʌ̃ warra Davi ume b̶abadjia. Mãwãnacarea Samuelera ãdjima b̶ad̶ada idji puru Ramánaa wãsia.

14 Maʌ̃ ewarid̶e Ãcõrẽ Jaurera Saul ume b̶ad̶ada ãyã wãsia. Maʌ̃ne Ãcõrẽba jaida idjimaa idu zebisia ewariza mĩã sẽ b̶amãrẽã. 15 Maʌ̃ carea Sauloare b̶eaba idjía jarasid̶aa:

–Dai djuburia ũrĩdua: Ãcõrẽba bʌra jaia idu mĩã sẽbi b̶ʌa. 16 Maʌ̃ carea dai boro, dairãa arpa zá cawa b̶ʌda jʌrʌbidua. Mãwãra jaiba mĩã sẽbʌrʌd̶e maʌ̃ ẽberãba arpara zaya bʌ necai b̶emãrẽã.–

17 Saulba jarasia:

–Mãẽteara arpa bio zá cawa b̶ʌda jʌrʌd̶e wãnaped̶a mʌ̃maa enenadua.–

18 Maʌ̃ne idjiare b̶ea ab̶aʌba nãwã jarasia:

–Mʌ̃a Beleʌ̃nebema Jesé warrada ab̶a unusia. Maʌ̃ ẽberãba arpara bio zá cawa b̶ʌa. Idjira quĩrãwãrẽã b̶ʌa, sozarra b̶ʌa, bio mẽsrã b̶ʌa, idjab̶a crĩcha cawaad̶eba bed̶eabaria. Maʌ̃ awara Ãcõrẽra idji ume b̶ʌa.–

19 Ara maʌ̃da Saulba Jesémaa ʌ̃cʌrʌ nãwã jarad̶e diabuesia:

–Dadjirã boro Saulba nãwã jara b̶ʌa: bʌ warra Davi, dji oveja wagabarida mʌ̃maa diabuedua.–

20 Ara maʌ̃da Jeséba idji warra Davira Saulmaa diabuesia. Maʌ̃ awara paʌ̃da, uva b̶a animarã e od̶ad̶e b̶ʌ sid̶a burro ʌ̃rʌ̃ jʌ̃cuaped̶a diabuesia. Chiwatu zaque sid̶a ab̶a diabuesia.

21 Davira jũẽped̶a Saul itea traja b̶esia. Saulba Davira bio quĩrĩã b̶asia. Maʌ̃ bẽrã idjira b̶ʌsia idji djõi careabemada eronĩbamãrẽã. 22 Saulba Davira bio bia unu b̶ʌ bẽrã bed̶eada Jesémaa diabuesia Davira idji ume idu b̶ebimãrẽã. 23 Jaiba Saul mĩã sẽbʌrʌd̶e Daviba arpada zabadjia. Mãwã zá b̶ʌd̶e Saulora necai b̶ebadjia jaira ãyã wãbadji bẽrã.