1 Moise zãwãrẽ Reuel Jetro abadada Madiaʌ̃nebemarã sacerdote basía. Moiseba idji ovejara wagabadjia. Ewari ab̶a Moiseba dji ovejara dewara orroare ne cobid̶e edesia. Maʌ̃ne idjira ẽjũã põãsa ewaraga b̶ʌd̶e Horeb eyad̶e jũẽne wãsia. Maʌ̃ eyara Ãcõrẽ eya abadaa.* Horeb eyara Ãcõrẽ eya abadaa Ãcõrẽra mama odjad̶a bẽrã. Horeb eyara idjab̶a Sinai abadaa. 2 Mama Ãcõrẽba ara idjida unubisia bacuru zaqued̶e uruga nũmʌda.† Ãcõrẽ. Hebreo bed̶ead̶e b̶ʌ́ b̶ʌa “Ãcõrẽ nezoca bajãnebema.” Moiseba unusia maʌ̃ bacurura eradrʌ nũmʌmĩna baẽ́ b̶ʌda. 3 Maʌ̃ carea crĩchasia: “¿Cãrẽda jãwã uruga nũmʌ? Caitaara acʌd̶e wãya sãwãẽrã jãwã baẽ́ b̶ʌ cawaya.”

4 Ãcõrẽba Moise caitaara zebʌrʌda unusid̶e maʌ̃ bacuru zaque uruga nũmʌneba trʌ̃ jarasia:

–Moise, Moise.–

Moiseba panusia:

–Mʌ̃ra nama b̶ʌa.–

5 Maʌ̃ne Ãcõrẽba idjía jarasia:

–¡Caitaara zerãdua! Nama bʌra mʌ̃ quĩrãpita b̶ʌ bẽrã bʌ jĩrũ jãne jʌ̃ b̶ʌra ẽrãdua.‡ Idji jĩrũ jãne jʌ̃ b̶ʌra ẽrãida b̶asia acʌbi carea Ãcõrẽra waya b̶ʌda. 6 Mʌ̃ra bʌ zezaba ĩjã b̶ad̶a Ãcõrẽa. Abrahaʌ̃ba, Isaba, idjab̶a Jacoboba mʌ̃ra ĩjã panasid̶aa.–

Maʌ̃ne Moiseba Ãcõrẽra waya b̶ʌ bẽrã idji quĩrãdarrara jũãtrʌsia Ãcõrẽ acʌ amaaba.

7 Ãcõrẽba jarasia:

–Mʌ̃a unu b̶ʌa mʌ̃ purura Egipto druad̶e bio bia mĩga b̶ʌda. Idjab̶a mʌ̃a ũrĩ b̶ʌa ãdjirãba quĩrã djuburiada iwid̶i panʌda. Iwid̶i panʌa mʌ̃a ãdjirãra dji traju obibada bororã jʌwaed̶abemada ẽdrʌ b̶ʌmãrẽã. Mʌ̃a cawa b̶ʌa ãdjirãra wãrãda bia mĩga panʌda. 8 Maʌ̃ bẽrã mʌ̃a ãdjirãra egiptorã jʌwaed̶a panʌnebemada ẽdrʌ b̶ʌi carea ze b̶ʌa. Egipto druad̶ebemada ẽdrʌ b̶ʌped̶a mʌ̃a dewara druad̶aa edeya. Maʌ̃ druara bio bia b̶ʌa idjab̶a waib̶ʌa b̶ʌa. Maʌ̃ druad̶e baridua ne uped̶ad̶ara bia zaubaria.§ Hebreo bed̶ead̶e nãwã b̶ʌ́ b̶ʌa: “Maʌ̃gʌ druad̶e jub̶ara, miare sid̶a wea nũmʌa.” Mama cananeorãda, hititarãda, amorreorãda, perezeorãda, heveorãda, idjab̶a jebuseorã sid̶a duanʌa. 9 Israelerãba quĩrã djuburia iwid̶i panʌra mʌ̃a ũrĩ b̶ʌa. Idjab̶a unu b̶ʌa egiptorãba ãdjirãra bia mĩga eropanʌda. 10 Maʌ̃ carea mʌ̃a bʌra Egiptod̶ebema boromaa diabueya. Idjía jaradua mʌ̃ puru Israel ẽdrʌ b̶ʌmãrẽã. Ẽdrʌ b̶ʌsira ãdjirãra Egiptod̶ebemada ãyã pe ededua.–

11 Baribʌrʌ Moiseba jarasia:

–¿Mãwãra mʌ̃ra cai Egiptod̶ebema boro quĩrãpita bed̶ead̶e wãi carea idjab̶a israelerãra Egiptod̶eba ãyã edei carea?–

12 Maʌ̃ne Ãcõrẽba panusia:

–Wãdua. Mʌ̃ra bʌ ume b̶aya. Mʌ̃a nãwã unubiya bʌra wãrãda diabuesida. Bʌa israelerãra Egiptod̶ebemada ãyã edeped̶a bãrãba naʌ̃ eyad̶e mʌ̃́a bia bed̶ead̶e zed̶ia.–

13 Baribʌrʌ Moiseba jarasia:

–Israelerãmaa wãped̶a bãrã drõã naẽnabemarãba ĩjã panana Ãcõrẽba mʌ̃ra bãrãmaa diabuesiad̶a abʌrʌd̶e ãdjirãba iwid̶id̶ia: “¿Idjira casa trʌ̃bada?” Maʌ̃ne ¿mʌ̃a cãrẽda jarai?–

14 Ãcõrẽba panusia:

–Mʌ̃ trʌ̃ra nãwã jarabadaa: “Mʌ̃ra mʌ̃a.” Maʌ̃ bẽrã israelerãa jaradua: “Dadji Ãcõrẽ ‘Mʌ̃ra mʌ̃a’ abadaba mʌ̃ra bãrãmaa diabuesia.”–

15 Idjab̶a jarasia:

–Israelerãa jaradua: “Dadji Ãcõrẽba mʌ̃ra bãrãmaa diabuesia. Dadji drõã naẽnabema Abrahaʌ̃ba, Isaba, idjab̶a Jacobo bid̶a idjira ĩjã panasid̶aa.” Mʌ̃ trʌ̃ Jehová abadara ewariza b̶aya. Maʌ̃ trʌ̃neba ẽberãrãba mʌ̃ra cawa panania.* Jehová. Genesi 4:26. Hebreo bed̶ead̶e b̶ʌ́ b̶ʌa “YHWH.” Hebreorãba maʌ̃ bed̶eara sãwã jĩguabarida adua panʌa.

16 Egiptod̶aa wãdua. Jãma jũẽped̶a israelerã bororã ume bed̶eadua. Ãdjirãa jaradua: “Dadji Boro Ãcõrẽba mʌ̃́a ara idjida unubisia. Dadji drõã naẽnabema Abrahaʌ̃ba, Isaba, idjab̶a Jacoboba idjira ĩjã panasid̶aa. Idjia nãwã jarasia: mʌ̃a bãrã israelerãra acʌ b̶ʌ bẽrã unu b̶ʌa egiptorãba bãrãra biẽ́ o panʌda. 17 Idjia bãrãra Egiptod̶e bia mĩga panʌda ẽdrʌ b̶ʌped̶a dewara druad̶aa edeyad̶a asia. Maʌ̃ druad̶e baridua ne uped̶ad̶ara bia zaubaria. Mama cananeorãda, hititarãda, amorreorãda, perezeorãda, heveorãda, idjab̶a jebuseorã sid̶a duanʌa.”

18 Bʌa jarabʌrʌra israelerã bororãba ĩjãnia. Maʌ̃be ãdjirãra bʌ ume ededua Egiptod̶ebema boromaa. Bãrãba idjía jarad̶adua: “Dai hebreorã Ãcõrẽda daima odjaped̶a jarasia idjía animarã babue diad̶e wãnamãrẽã. Maʌ̃ bẽrã dairãra ẽjũã põãsa ewaraga b̶ʌd̶e ewari ũbea idu wãbidua mãwã od̶i carea.”

19 Baribʌrʌ mʌ̃a cawa b̶ʌa Egiptod̶ebema boroba israelerãra ẽdrʌ b̶ʌẽ́da mʌ̃a idjía mãwã obiẽ́bʌrʌ. 20 Maʌ̃ bẽrã mʌ̃ ʌb̶ʌada egiptorãa unubiya. Zocãrã ne ununaca waib̶ʌa b̶eada oya ãdjirãra cawa oi carea. Mãwãbʌrʌ Egiptod̶ebema boroba israelerãra idu wãbiya.

21 Idjab̶a mʌ̃a o b̶ʌ carea egiptorãba israelerãra bia ununi bẽrã ne diad̶ia. Mãwã israelerãra Egiptod̶eba ẽdrʌbʌdad̶e ara jãwã ẽdrʌd̶aẽ́a. 22 Jũma israelerã wẽrãrãba ãdji caita panʌ egiptorãa parata od̶ada, oro od̶a sid̶a iwid̶id̶ida panʌa. Cacuad̶e jʌ̃bada sid̶a ãdji warrarã itea, wẽrãcaurã itea bid̶a iwid̶id̶ida panʌa. Ara maʌ̃ quĩrãca baridua Egiptod̶ebema wẽrã maʌ̃ ded̶e b̶ʌ́a bid̶a iwid̶id̶ida panʌa. Mãwã israelerãba ne jũma bia Egiptod̶ebemara edad̶ia.