1 Maʌ̃ne Ãcõrẽba Moisea jarasia:

–Egiptod̶ebema boroa nãwã jarad̶e wãdua: “Ãcõrẽba nãwã jara b̶ʌa: mʌ̃ purura idu wãbidua mʌ̃́a animarã babue diad̶amãrẽã. 2 Baribʌrʌ bʌa mʌ̃ puruda idu wãbiẽ́bʌrʌ mʌ̃a cawa oya. Jũma bʌ druara baujĩãba birabiya. 3 Nilo dora baujĩãba biraya. Maʌ̃ne doed̶aʌba baujĩãra bʌ diguid̶aa wãbʌrʌd̶ia. Mãwã bʌ cãĩbarima, bʌ cʌd̶ad̶e, dji dromarã ded̶e, bʌ druad̶ebemarã ded̶e bid̶a baujĩãra baraya. Baujĩãra bãrã paʌ̃ ãbubadad̶e, bãrã paʌ̃ bʌratʌbadad̶e bid̶a baraya. 4 Bʌ ʌ̃rʌ̃, dji dromarã ʌ̃rʌ̃, bʌ druad̶ebemarã ʌ̃rʌ̃ bid̶a baujĩãra jʌ̃drʌcuad̶ia.”–

5 Maʌ̃be Ãcõrẽba Moisea jarasia:

–Aaroʌ̃a nãwã jaradua: “Bʌ jʌwad̶e erob̶ʌ bacurura dojã ʌ̃rʌ̃, do zaque ʌ̃rʌ̃, amene ʌ̃rʌ̃, baido juebada uria ʌ̃rʌ̃ bid̶a ʌ̃taa wadua. Mãwã baidod̶eba baujĩãda jũma Egipto druad̶e odjacuaya.”–

6 Ara maʌ̃da Aaroʌ̃ba idji bacurura Egiptod̶ebema do ʌ̃rʌ̃ wasia. Maʌ̃ne baujĩãra doed̶aʌba odjacuad̶aped̶a jũma Egipto druara birasid̶aa. 7 Baribʌrʌ Egiptod̶ebema daubararãba ãdji necawaad̶eba ab̶arica osid̶aa. Ãdjirã bid̶a baujĩãda doed̶aʌba Egipto druad̶e odjabisid̶aa.

8 Maʌ̃be Egiptod̶ebema boroba Moisera Aaroʌ̃ sid̶a trʌ̃biped̶a ãdjía nãwã jarasia:

–Ãcõrẽa iwid̶id̶adua naʌ̃ baujĩãra mʌ̃nebemada idjab̶a mʌ̃ purud̶ebemada ãyã wãbimãrẽã. Maʌ̃bebʌrʌ mʌ̃a bãrã israelerãra idu wãbiya Ãcõrẽa animarã babue diacuad̶amãrẽã.–

9 Moiseba panusia:

–Bia b̶ʌa. Jaradua sãʌ̃be bʌa quĩrĩã b̶ʌda mʌ̃a Ãcõrẽa iwid̶ida bʌ carea, dji dromarã carea, idjab̶a bʌ druad̶ebemarã carea bid̶a. ¿Sãʌ̃be quĩrĩã b̶ʌ mʌ̃a Ãcõrẽa iwid̶ida naʌ̃ baujĩãra bʌd̶ebemada, bʌ diguid̶abema sid̶a jõbimãrẽã? Iwid̶isira ab̶abe doed̶abʌrʌ baujĩãra baraa baya.–

10 Egiptod̶ebema boroba panusia:

–Nu iwid̶idua.–

Moiseba jarasia:

–Bʌa jara b̶ʌ quĩrãca oya. Mãwã bʌa cawaya dewara ãcõrẽra neẽ́da dai Boro Ãcõrẽ quĩrãca. 11 Nu bʌ diguid̶a, dji dromarãma, bʌ druad̶ebema ẽberãrãma bid̶a baujĩãra neẽ́ b̶aya. Baujĩãra ab̶abe doed̶abʌrʌ baraa baya.–

12 Maʌ̃be Moisera Aaroʌ̃ sid̶a Egiptod̶ebema boromaʌba ẽdrʌsid̶aa. Nurẽma Moiseba Ãcõrẽa iwid̶isia baujĩã Egiptod̶ebema boromaa diabued̶ara jõbimãrẽã. 13 Ara maʌ̃da Ãcõrẽba Moiseba iwid̶id̶a quĩrãca osia. Baujĩãra egiptorã ded̶e, ud̶a bid̶a, ãdji ẽjũãne bid̶a jũma quinisid̶aa. 14 Maʌ̃be egiptorãba baujĩã quininara ãbaa boromea bue nũmʌsid̶aa. Maʌ̃ba Egipto druara jũma mĩguia nũmesia. 15 Egiptod̶ebema boroba unusia baujĩãba waa mĩã sẽnaẽ́ panʌda. Maʌ̃ bẽrã idjira so zareaped̶a Moiseba Aaroʌ̃ bid̶a jaraped̶ad̶ara ĩjãẽ́ basía Ãcõrẽba jarad̶a quĩrãca.

16 Maʌ̃be Ãcõrẽba Moisea jarasia:

–Aaroʌ̃a jaradua idji jʌwad̶e erob̶ʌ bacuruda ʌ̃taa waped̶a egorod̶aa umãrẽã. Maʌ̃ne egoro porara pochĩdau baya jũma Egipto druad̶e.–

17 Ara maʌ̃da ãdjia mãwã osid̶aa. Aaroʌ̃ba idji bacurura ʌ̃taa waped̶a egorod̶aa usía. Maʌ̃ne egoro porara pochĩdau basía jũma Egipto druad̶e. Ab̶ed̶a ẽberãrãra, animarã sid̶a pochĩdauba ca eropanesid̶aa. 18 Maʌ̃be Egiptod̶ebema daubararãba ãdji necawaad̶eba ab̶ari quĩrãca pochĩdauda o quĩrĩãsid̶aa.* Pochĩdauda o quĩrĩãsid̶aa. Hebreo bed̶ead̶e maʌ̃ba idjab̶a jara b̶ʌa: “Pochĩdauda quena quĩrĩãsid̶aa.” Mãwãmĩna poya od̶aẽ́ basía. Mãwã panʌne ẽberãrãra, animarã sid̶a pochĩdauba ca eropanasid̶aa. 19 Maʌ̃ bẽrã daubararãba Egiptod̶ebema boroa jarasid̶aa:

–Moiseba Aaroʌ̃ ume pochĩdau oped̶ad̶ara Ãcõrẽ ʌb̶ʌad̶eba osid̶aa.–

Mãwã jaraped̶ad̶amĩna Egiptod̶ebema borora so zarea b̶esia. Idjia ĩjãẽ́ basía Moiseba Aaroʌ̃ bid̶a jaraped̶ad̶ara Ãcõrẽba jarad̶a quĩrãca.

20 Maʌ̃be Ãcõrẽba Moisea jarasia:

–Nu diaped̶ed̶a piradrʌped̶a Egiptod̶ebema boro doed̶a wãbʌrʌd̶e idjimaa wãped̶a nãwã jaradua: “Ãcõrẽba nãwã jara b̶ʌa: mʌ̃ purura idu wãbidua mʌ̃́a animarãda babue diad̶amãrẽã. 21 Baribʌrʌ mʌ̃ puruda idu wãbiẽ́bʌrʌ, mʌ̃a ĩgananada bʌmaa, dji dromarãmaa, bʌ druad̶ebemarãmaa bid̶a quĩrãtanoa diabueya. Maʌ̃ ĩgananara jũma Egiptod̶ebema ded̶e, ãdjirã wãbʌdama bid̶a powuaga nũmaya. 22-23 Baribʌrʌ maʌ̃ ewarid̶e Goseʌ̃ druad̶e mʌ̃a mãwã oẽ́a. Mʌ̃ ẽberãrãda mama panʌ bẽrã ĩgananara neẽ́ baya. Mʌ̃ purura bʌ puru quĩrãca oẽ́a. Maʌ̃ba bʌa cawaya mʌ̃abʌrʌ naʌ̃ druad̶e mãwã o b̶ʌda. Maʌ̃ ne ununacara nu oya.”–

24 Nurẽma Ãcõrẽba mãwã osia. Egiptod̶ebema boro dera, dji dromarã dera, idjab̶a jũma Egipto drua sid̶a ĩganana quĩrãtanoaba birasia. Ab̶ed̶a jũma Egipto druara biẽ́ nũmesia ĩgananaba.

25 Maʌ̃be Egiptod̶ebema boroba Moisera, Aaroʌ̃ sid̶a trʌ̃biped̶a nãwã jarasia:

–Bãrã Ãcõrẽa animarãda babue diad̶e wãnida panʌa ara naʌ̃ Egipto druad̶e.–

26 Baribʌrʌ Moiseba panusia:

–Dairãba naʌ̃ Egipto druad̶e mãwã poya od̶aẽ́a, animarã dairãba Ãcõrẽa babue diad̶ida panʌra bãrã egiptorãba idu babue diabid̶aca bẽrã. Maʌ̃ animarãda bãrã quĩrãpita Ãcõrẽa babue diad̶ibʌrʌ, ¿bãrãba dairãra mõgaraba tab̶ari bead̶aẽ́ca? 27 Maʌ̃ bẽrã dairãra ewari ũbea ẽjũã põãsa ewaraga b̶ʌd̶e wãnia. Mamabʌrʌ dai Ãcõrẽa animarãda babue diacuad̶ia idjia jara b̶ʌ quĩrãca.–

28 Maʌ̃be Egiptod̶ebema boroba jarasia:

–Mãẽteara bia b̶ʌa. Mʌ̃a bãrãra ẽjũã põãsa ewaraga b̶ʌd̶aa idu wãbiya bãrã Ãcõrẽa animarãda babue diacuad̶amãrẽã. Baribʌrʌ bãrãra tʌmʌ wãcara panʌa. Idjab̶a mʌ̃ carea bid̶a Ãcõrẽa iwid̶id̶adua.–

29 Moiseba jarasia:

–Mʌ̃ra namaʌba ẽdrʌped̶a Ãcõrẽa iwid̶iya. Maʌ̃be nu ĩgananara neẽ́ baya bʌma, dji dromarãma, bʌ druad̶ebemarãma bid̶a. Baribʌrʌ dairãra waa cũrũgarãdua. Dairãra idu wãbidua Ãcõrẽa animarãda babue diacuad̶amãrẽã.–

30 Moisera Egiptod̶ebema boromaʌba ẽdrʌped̶a Ãcõrẽa iwid̶isia. 31 Ara maʌ̃da Ãcõrẽba Moiseba iwid̶id̶a quĩrãca osia. Idjia ĩgananara jõbisia Egiptod̶ebema boroma, dji dromarãma, idjab̶a Egipto druad̶ebemarãma bid̶a. Ni ab̶a bid̶a b̶eẽ́ basía. 32 Baribʌrʌ Egiptod̶ebema borora wad̶ibid̶a so zarea b̶ed̶a bẽrã israelerãra idu wãbiẽ́ basía.