1 Moisera Sinai eyad̶eba ed̶aa zeẽ́ b̶ʌda dãrãbʌrʌ bẽrã israelerãra Aaroʌ̃maa wãnaped̶a nãwã jarasid̶aa:

–Jãʌ̃ Moiseba dairãra Egiptod̶eba ẽdrʌ enesia, baribʌrʌ idji sãwãnada dairãba cawad̶aẽ́a. Maʌ̃ bẽrã dairã nocod̶aa edemãrẽã ãcõrẽda odua.–

2 Aaroʌ̃ba panusia:

–Bia b̶ʌa. Bãrã wẽrãrãba, bãrã warrarãba, bãrã caurã bid̶a pĩrũ oro od̶ada mʌ̃́a jũma ẽrã diad̶adua.–

3 Ara maʌ̃da ãdjirãba pĩrũ oro od̶ara Aaroʌ̃a jũma ẽrã diacuasid̶aa. 4 Aaroʌ̃ba maʌ̃ pĩrũra edaped̶a tʌbʌd̶e dorrab̶aribisia. Maʌ̃ oro dorrab̶arid̶aba paca zaque quĩrãca osia. Maʌ̃ ununaped̶a israelerãba jarasid̶aa:

–Naʌ̃drʌ dadjirã Egiptod̶eba ẽdrʌ enena ãcõrẽa.–

5 Maʌ̃ ũrĩped̶a Aaroʌ̃ba animarã babue diabadada osia paca zaque jʌwaba od̶a caita. Maʌ̃be israelerãa nãwã jarasia:

–Nu ewari dromada Ãcõrẽ itea od̶ia.–

6 Nurẽma diaped̶ed̶a israelerãra pirab̶arid̶aped̶a animarãda babue diacuasid̶aa idjab̶a Ãcõrẽ ume necai b̶ai careabema animarãda beacuasid̶aa. Maʌ̃be chũpanenaped̶a b̶ʌsrid̶a ne co duanasid̶aa idjab̶a itua do duanasid̶aa. Mãwãnacarea pirab̶arid̶aped̶a ãdji cacuaba o quĩrĩã b̶ʌda o duanesid̶aa. 7 Maʌ̃ne Ãcõrẽba Moisea jarasia:

–Isabe ed̶aa wãdua bʌ ẽberãrã Egiptod̶eba enenaba cadjiruada o duanʌ bẽrã. 8 Ãdjirãba dãrãẽ́ne mʌ̃ leyra igarad̶aped̶a oroda dorrab̶aribid̶aped̶a paca zaque quĩrãca osid̶aa. Maʌ̃gʌ́a ãdjirãba bia bed̶ea panʌa idjab̶a animarãda babue diacuad̶aped̶a jara panʌa: “Naʌ̃drʌ dadjirã Egiptod̶eba ẽdrʌ enena Ãcõrẽa.”–

9 Idjab̶a Ãcõrẽba Moisea jarasia:

–Mʌ̃a unu b̶ʌa naʌ̃ ẽberãrãra cʌwʌrʌ zarea b̶eada. 10 Ãdjirã carea mʌ̃́a bed̶ea djuburiarãdua. Mʌ̃ quĩrũbid̶eba ãdjirãra jũma quinibiya. Baribʌrʌ bʌd̶eba mʌ̃a puru waib̶ʌada oya.–

11 Mãwãmĩna Moiseba idji Ãcõrẽa bed̶ea djuburiasia. Nãwã jarasia:

–Ay, Ãcõrẽ, bʌ quĩrũbid̶eba bʌ puru Egiptod̶eba enenara mãwã orãdua. ¿Bʌ ʌb̶ʌa waib̶ʌa b̶ʌd̶eba maʌ̃ purura Egiptod̶eba ẽdrʌ enesiẽ́ca? 12 Ãdjirãda mãwã quinibibʌrʌ egiptorãba jarad̶ia bʌa israelerãra ẽdrʌ enesida biẽ́ oi carea. Jarad̶ia naʌ̃ eyad̶aa enesida quenai carea ni ab̶aʌ ãdjid̶ebemada naʌ̃ ẽjũãne b̶erãmãrẽã. ¿Bʌa quĩrĩã b̶ʌca egiptorãba mãwã jarad̶ida? Maʌ̃ bẽrã bʌ quĩrũbira tumadua. Bʌ puru quinibi crĩcha erob̶ʌra quĩrãdoadua. 13 Quĩrãnebadua bʌ nezocarã Abrahaʌ̃ ume, Isa ume, idjab̶a Jacobo ume bid̶a bed̶ea b̶ʌd̶ada. Bʌa ara bʌdji trʌ̃neba ãdjirãa wãrãneba nãwã jarasia: “Mʌ̃a bãrãneba ẽberãrã zocãrã yõbiya chĩdau zocãrã bajãne panʌ quĩrãca.* Genesi 22:16; 26:3-4. Idjab̶a jũma mʌ̃a diai jarad̶a druara mʌ̃a bãrãneba yõbʌdarãa diaya ãdjirãne bamãrẽã.”–† Genesi 17:8.

14 Moiseba jara b̶ʌ carea Ãcõrẽba idji puru quinibi crĩcha erob̶ad̶ara idu b̶ʌsia.

15 Maʌ̃be Moisera Sinai eyad̶eba ed̶aa zesia. Idji jʌwad̶e mõgara pewed̶ea b̶ʌda umé enesia. Maʌ̃ mõgarad̶e Ãcõrẽba ĩjã obi b̶ʌ bed̶eada quĩrã umena b̶ʌ́ b̶asia. 16 Ãcõrẽbʌrʌ maʌ̃ umébema mõgara pewed̶ea b̶ʌda osia; idjiabʌrʌ maʌ̃ mõgarad̶e jaya b̶ʌsia.

17 Maʌ̃ zebʌdad̶e Josueba israelerãra b̶ʌga nũmʌda ũrĩsia. Maʌ̃ne idjia Moisea jarasia:

–Mʌ̃a israelerã duanʌma djõ panʌ quĩrãca ũrĩ b̶ʌa.–

18 Moiseba panusia:

–Mʌ̃a ũrĩ b̶ʌra dji quĩrũ poyabʌdad̶e b̶iabada quĩrãca b̶ʌẽ́a, ni dji quĩrũba poyabʌdad̶e b̶iabada quĩrãca b̶ʌẽ́a. Mʌ̃a ũrĩ b̶ʌ quĩrãca ãdjirãra b̶ʌsrid̶a trʌ̃ã duanʌa.–

19 Moise israelerã duanʌ caita jũẽsid̶e unusia ãdjirãra cari duanʌda idjab̶a paca zaque ãdji jʌwaba oped̶ad̶ada. Maʌ̃ carea bio quĩrũped̶a Ãcõrẽba diad̶a mõgara pewed̶eada Sinai eya carrad̶aa jĩãwẽsia. Maʌ̃ mõgarara jũma tod̶ozoasia. 20 Ara maʌ̃da ãdji jʌwaba oped̶ad̶a paca zaquera edaped̶a tʌbʌd̶e dorrab̶ariped̶a ʌrab̶asia. Maʌ̃ porara doed̶a jĩãposia ãdjirãa dobi carea.

21 Maʌ̃be Moiseba Aaroʌ̃a jarasia:

–¿Naʌ̃ ẽberãrãba bʌra sãwã osid̶a bʌa naʌ̃ cadjirua waib̶ʌada ãdjirãa obi carea?–

22 Aaroʌ̃ba idji djabaa nãwã panusia:

–Ay, mʌ̃ boro, mʌ̃ ume quĩrũrãdua. Bʌa bio cawa b̶ʌa naʌ̃ ẽberãrãba cadjiruadrʌ o quĩrĩãbadada. 23 Ãdjirãba mʌ̃́a jarasid̶aa: “Jãʌ̃ Moiseba dairãra Egiptod̶eba ẽdrʌ enesia, baribʌrʌ idji sãwãnada dairãba cawad̶aẽ́a. Maʌ̃ bẽrã dairã nocod̶aa edemãrẽã ãcõrẽda odua.” 24 Maʌ̃ carea mʌ̃a panusia: “Oro od̶a pĩrũ erob̶eaba mʌ̃́a ẽrã diad̶adua.” Ara maʌ̃da ãdjirãba ẽrã diacuasid̶aa. Maʌ̃da mʌ̃a tʌbʌd̶e b̶atabueped̶a cawaẽ́ne paca zaque quĩrãca b̶ʌda odjasia.–

25 Moiseba unusia israelerãba baridua quĩrã perada o duanʌda Aaroʌ̃ba iduaribid̶a bẽrã. Idjia cawasia maʌ̃gʌ carea dji quĩrũba ãdjida ipid̶a jara duananida. 26 Maʌ̃ carea Moisera ãdji duanʌma ed̶a wãbada od̶e ʌ̃ta nũmeped̶a jarasia:

–Ãcõrẽare panʌra mʌ̃maa zed̶adua.–

Ara maʌ̃da jũma Levid̶eba yõped̶ad̶adrʌ idjimaa wãsid̶aa. 27 Maʌ̃ne Moiseba ãdjirãa jarasia:

–Dadji israelerã Ãcõrẽba nãwã jara b̶ʌa: “Bãdjiza bãrã djõbada necora edad̶aped̶a jẽda wãnadua israelerã duanʌmaa. Deza mʌ̃ igara panʌra bead̶e wãnadua. Bãrã djabarã sid̶a, bãrã ume dji biarã sid̶a, bãrã de caitabemarã sid̶a bead̶adua.”–

28 Ara maʌ̃da Levid̶eba yõped̶ad̶arãba Moiseba jarad̶a quĩrãca osid̶aa. Maʌ̃ ewarid̶e ãdjirãba israelerãda mil ũbea beasid̶aa.

29 Maʌ̃be Moiseba jarasia:

–Bãrã warrarãra, bãrã djabarã sid̶a beasid̶a bẽrã id̶ira Ãcõrẽ itea panesid̶aa. Ãcõrẽba obid̶ara ĩjãsid̶a bẽrã id̶ira idjia bãrãra bia carebaya.–

30 Nurẽma Moiseba israelerãa jarasia:

–Bãrãba cadjirua waib̶ʌada osid̶aa. Maʌ̃ bẽrã mʌ̃ra Sinai eyad̶e ʌ̃taa Ãcõrẽmaa wãya. Ãĩbẽrã mʌ̃a Ãcõrẽa bãrãba cadjirua oped̶ad̶ara quĩrãdoabisicada.–

31 Ara maʌ̃da Moisera wayacusa Sinai eyad̶e ʌ̃taa wãped̶a Ãcõrẽa nãwã bed̶ea djuburiasia:

–Wãrãda jãʌ̃ ẽberãrãba cadjirua waib̶ʌada osid̶aa. Paca zaque orod̶eda osid̶aa ãdji ãcõrẽ bamãrẽã. 32 Mãwãmĩna mʌ̃ quĩrã djuburia ãdjirãba cadjirua oped̶ad̶ara quĩrãdoadua. Baribʌrʌ poya quĩrãdoaẽ́bʌrʌ, mʌ̃ trʌ̃ sid̶a ãyã b̶ʌdua bʌ ẽberãrã trʌ̃ b̶ʌ́ erob̶ʌd̶ebemada.–

33 Ãcõrẽba Moisea panusia:

–Mʌ̃a ab̶abe cadjirua od̶a ẽberã trʌ̃da ãyã b̶ʌya. 34 Jãʌ̃be wãdua. Jãʌ̃ ẽberãrãra ededua mʌ̃a bʌ́a jarad̶a druad̶aa. Mʌ̃ nezoca bajãnebemara bãrã na wãya. Baribʌrʌ mʌ̃a cawa oi ewarid̶e ãdjirãra cawa oya cadjirua oped̶ad̶a carea.–

35 Maʌ̃be Ãcõrẽba israelerãra zocãrã quinibisia Aaroʌ̃ba jʌwaba od̶a paca zaquea bia bed̶ea duanana carea.