1 Abraʌ̃ 99 poa b̶asid̶e Ãcõrẽra idjima odjaped̶a nãwã jarasia:

–Mʌ̃ra ne jũma poya obari Ãcõrẽa. Bʌra mʌ̃ quĩrãpita jipa nĩbadua. 2 Mʌ̃a bʌ ume bed̶ea b̶ʌd̶ara wãrãda oya. Mãwã bʌd̶eba zocãrã yõbiya.–

3 Ara maʌ̃da Abraʌ̃ba Ãcõrẽra bio waya b̶ʌ bẽrã chĩrãborod̶e cob̶eped̶a idji dratura egorod̶aa b̶arru tẽũ cob̶esia. Maʌ̃ne Ãcõrẽba jarasia:

4 –Mʌ̃a bʌ ume bed̶ea b̶ʌd̶ara naʌ̃gʌa: bʌra zocãrã puru zeza baya. 5 Maʌ̃ bẽrã bʌra waa Abraʌ̃ ad̶aẽ́a. Id̶iba ʌ̃taa bʌ trʌ̃ra Abrahaʌ̃ ad̶ia, mʌ̃a bʌra zocãrã puru zezada b̶ʌbʌrʌ bẽrã.* Hebreo bed̶ead̶e Abrahaʌ̃ trʌ̃ba jara b̶ʌa “zocãrã puru zeza.” Abraʌ̃ba jara b̶ʌa “zeza jipa b̶ʌ.” Genesi 15:6. 6 Mʌ̃a bʌd̶eba zocãrã yõbiya; bʌd̶eba mʌ̃a puruda zocãrã ocuaya. Idjab̶a bʌd̶eba ẽberãrã bororãda odjad̶ia. 7 Mʌ̃a bʌ ume, bʌd̶eba yõbʌda ume bid̶a bed̶ea b̶ʌd̶ara naʌ̃gʌa: mʌ̃ra ewariza bʌ Ãcõrẽa idjab̶a ãdjirã Ãcõrẽ baya. Mʌ̃a bãrãra waga b̶aya idjab̶a bãrãba mʌ̃ra ẽpẽ panania. 8 Idjab̶a bʌ b̶abari ẽjũãra bʌ́a, bʌd̶eba yõbʌdarãa bid̶a mʌ̃a diaya. Mʌ̃a bãrãa jũma Canaaʌ̃ druara diaya ewariza bãrãne bamãrẽã. Maʌ̃ne mʌ̃drʌ bãrã Ãcõrẽ baya.–

9-10 Idjab̶a Ãcõrẽba Abrahaʌ̃a jarasia:

–Mʌ̃a bʌ ume bed̶ea b̶ʌd̶a bẽrã, bʌa ne oida b̶ʌa. Idjab̶a id̶iba ʌ̃taa bʌ warrarãba, ãdjid̶eba yõbʌdarã bid̶a ab̶arica od̶ida panʌa. Bãrãba nãwã od̶ida panʌa: bãrã tãẽnabema umaquĩrãrã jũmarãba ãdji cacuara wẽãgod̶ida panʌa. 11 Bãrã umaquĩrã cacua wẽãgod̶ara mʌ̃a bãrã ume bed̶ea b̶ʌd̶a sẽyã baya. 12-13 Id̶iba ʌ̃taa umaquĩrã warrada tod̶ibʌrʌ, ocho ewari b̶ʌd̶e idji cacuara wẽãgod̶ida panʌa. Maʌ̃ awara nezoca warrarã bãrã ded̶e tobʌdarãda idjab̶a ãĩbema nẽdod̶a nezocarã sid̶a cacua wẽãgod̶ida panʌa. Mãwã mʌ̃a bãrã ume bed̶ea b̶ʌd̶a sẽyãra ara bãdji cacuad̶e erob̶ead̶ia. Mʌ̃a bed̶ea b̶ʌd̶ara ewariza mãwã b̶aya. 14 Maʌ̃ carea baridua umaquĩrãba idji cacuada wẽãgoẽ́bʌrʌ, maʌ̃ ẽberãra bãrãnebemada ãyã b̶ʌd̶ida panʌa, mʌ̃a bãrã ume bed̶ea b̶ʌd̶ara igara b̶ʌ bẽrã.–

15-16 Maʌ̃ awara Ãcõrẽba Abrahaʌ̃a jarasia:

–Mʌ̃a bʌ quima Saraira nãwã bia b̶ʌya: idjid̶eba mʌ̃a bʌ́a warrada wãrãda diaya. Maʌ̃ awara idjid̶eba puruda zocãrã yõnia idjab̶a idjid̶eba ẽberãrã bororãda odjad̶ia. Maʌ̃ carea bʌ quimara waa Sarai arãdua, ãtebʌrʌ idji trʌ̃ra Sara adua.–† Hebreo bed̶ead̶e Sara trʌ̃ba jara b̶ʌa “ẽberãrã boro cau.”

17 Maʌ̃be Abrahaʌ̃ba Ãcõrẽra waya b̶ʌ bẽrã chĩrãborod̶e cob̶eped̶a idji dratura egorod̶e b̶arru tẽũ cob̶esia. Baribʌrʌ ipid̶asia. Idji sod̶e crĩchasia: “Ẽberã cien poa b̶ʌba ¿sãwã warrada oi? Sara noventa poa b̶ʌda ¿sãwã mãwã b̶iogoa b̶ei?”

18 Maʌ̃ne Abrahaʌ̃ba Ismaeld̶ebemada crĩchasia. Maʌ̃ bẽrã Abrahaʌ̃ba Ãcõrẽa jarasia:

–¡Ismaelda bʌ quĩrãpita bia b̶ʌbara bia b̶acasia!–

19 Maʌ̃ne Ãcõrẽba panusia:

–Mãwãẽ́a. Bʌ quima Sarabʌrʌ umaquĩrã warrada bʌ́a to diaya. Bʌa idji trʌ̃ra b̶ʌdua Isa. Mʌ̃a bʌ ume bed̶ea b̶ʌd̶ara jõca baya. Maʌ̃ bẽrã maʌ̃ bed̶eara idjab̶a Isa itea b̶aya, idjid̶eba yõbʌdarã itea bid̶a. 20 Idjab̶a bʌ warra Ismaeld̶ebema jarad̶ara mʌ̃a ũrĩsia. Mʌ̃a idji sid̶a bia b̶ʌya. Maʌ̃ bẽrã warra zocãrã unubiya. Mãwã idjid̶eba ẽberãrã zocãrã yõnia. Idjia doce warra dji dromarãda unuya. Mãwã mʌ̃a idjid̶eba puru waib̶ʌada oya.‡ Genesi 25:16. 21 Baribʌrʌ mʌ̃a bʌ ume bed̶ea b̶ʌd̶ara Isa itea b̶aya. Id̶iba poa ab̶a babʌrʌd̶e Isara Saraba bʌ́a to diaya.–

22 Ãcõrẽra Abrahaʌ̃ ume bed̶ea b̶aped̶a wãsia. 23 Ara maʌ̃ ewarid̶e Abrahaʌ̃ba idji warra Ismaelda, nezocarã idji ded̶e toped̶ad̶arãda, idjia nẽdod̶a nezocarã sid̶a trʌ̃cuaped̶a Ãcõrẽba jarad̶a quĩrãca jũmarãda cacua wẽãgocuasia. 24 Abrahaʌ̃ra 99 poa b̶asia idji cacua wẽãgosid̶e. 25 Dji warra Ismaelera trece poa b̶asia idji cacua wẽãgosid̶e. 26 Abrahaʌ̃ cacua wẽãgosid̶e ab̶ari ewarid̶e dji warra Ismael sid̶a cacua wẽãgosia. 27 Jũma umaquĩrãrã idji ded̶e panabadada, nezocarã idji ded̶e toped̶ad̶ada, ãĩbemarã nẽdod̶arã sid̶a ab̶ari ewarid̶e cacua wẽãgosid̶aa.