1 Mãwãnacarea Abrahaʌ̃ra idji b̶ad̶amaʌba Negue ẽjũãnaa wãped̶a Guerar purud̶e b̶esia. Maʌ̃ purura Cadé puru idjab̶a Sur ẽjũã ẽsi b̶ʌa. 2 Mama b̶asid̶e Abrahaʌ̃ba jarabadjia idji quima Sarara idji djabawẽrãda. Maʌ̃ bẽrã Guerard̶ebema boro Abimele abadaba Sarara idji ded̶aa edebisia edai carea. 3 Mãwãmĩna diamasi Ãcõrẽba Abimelea cãĩmocarad̶e nãwã jarasia: “Bʌra beuya bʌa edebid̶a wẽrãra quima bara b̶ʌ bẽrã.”

4-5 Baribʌrʌ Abimelera wad̶i Sara ume cãĩẽ́ b̶asia. Maʌ̃ bẽrã idjia Ãcõrẽa jarasia:

–Mʌ̃ Boro, Abrahaʌ̃ba mʌ̃́a jarasia jãʌ̃gʌ wẽrãra idji djabawẽrãda. Dji wẽrã bid̶a jarasia Abrahaʌ̃ra idji djabada. Maʌ̃ bẽrã mʌ̃a crĩcha biad̶eba edai carea enebisia. Mʌ̃ra bed̶ead̶e b̶ʌẽ́a. ¿Bʌa nẽbʌra neẽ́ b̶ʌda cawa oica?–

6 Maʌ̃ne Ãcõrẽba cãĩmocarad̶e panusia:

–Mʌ̃a bio cawa b̶ʌa bʌa crĩcha biad̶eba mãwã osida. Maʌ̃ bẽrã mʌ̃a bʌra mʌ̃ quĩrãpita idu cadjirua obiẽ́ basía. Mʌ̃a bʌra maʌ̃ wẽrã ume idu cãĩbiẽ́ basía. 7 Jãʌ̃be idjira Abrahaʌ̃a jẽda diadua. Abrahaʌ̃ra mʌ̃neba bed̶eabaria. Idjia mʌ̃́a iwid̶ida b̶ʌa bʌ beurãmãrẽã. Baribʌrʌ bʌa jẽda diaẽ́bʌrʌ, bʌra bʌ ẽberãrã sid̶a ab̶ed̶a jũma quininia.–

8 Nurẽma diaped̶a Abimelera pirab̶ariped̶a idjiare dji droma b̶eara jũma trʌ̃sia. Maʌ̃be Ãcõrẽba jarad̶ara ãdjirãa jũma jarasia. Maʌ̃ bed̶ea ũrĩbʌdad̶e ãdjirãra bio dauperasid̶aa. 9 Mãwãnacarea Abimeleba Abrahaʌ̃ra trʌ̃ped̶a jarasia:

–¡Bʌa mʌ̃ra, mʌ̃ druad̶ebemarã sid̶a Ãcõrẽ quĩrãpita bed̶ead̶e b̶ʌsia! Mʌ̃a bʌra biẽ́ oẽ́ basía. Baribʌrʌ bʌa mʌ̃ ume osia mĩã oiẽ́ b̶ʌda. 10 Bʌa ¿cãrẽ crĩchad̶eba jãwã osi?–

11 Maʌ̃ne Abrahaʌ̃ba panusia:

–Mʌ̃a crĩchasia namabemarãba Ãcõrẽra wayad̶acada. Maʌ̃ bẽrã crĩchasia mʌ̃ra bead̶ida mʌ̃ quima edad̶i carea. 12 Idjira wãrãda mʌ̃ djabawẽrãa mʌ̃ zeza cau bẽrã, baribʌrʌ mʌ̃ papa cauẽ́a. Maʌ̃ bẽrã mʌ̃a edasia. 13 Ãcõrẽba mʌ̃ra mʌ̃ zeza diguid̶abemada ãyã wãbisid̶e mʌ̃a mʌ̃ quimaa nãwã jarasia: “Bʌa wãrãda mʌ̃da quĩrĩã b̶ʌbʌrʌ, dadji wãbʌdama ẽberãrãa jaradua mʌ̃ra bʌ djabada.”–

14 Maʌ̃be Abimeleba Abrahaʌ̃ quima Sarara jẽda diasia. Idjab̶a ovejada, pacada, nezoca umaquĩrãda, nezoca wẽrã sid̶a zocãrã diacuasia. 15 Diacuaped̶a jarasia:

–Acʌdua, mʌ̃ druara b̶ʌa. Bʌdjia ẽjũã awuabʌrʌmaa b̶ad̶e wãdua.–

16 Maʌ̃ne Abimeleba Saraa jarasia:

–Mʌ̃a bʌ djabamanaa parata torroda mil diasia bʌ ume b̶eaba cawad̶amãrẽã bʌra daunemaẽ́ basida. Bʌra bed̶ead̶e b̶ʌẽ́a.–

17-18 Abimeleba Abrahaʌ̃ quima Sara edai basid̶e Ãcõrẽba wẽrãrã Abimele ded̶e panabadada idu b̶iogoabigaẽ́ basía. Maʌ̃ carea Abrahaʌ̃ba Ãcõrẽa iwid̶isia. Maʌ̃be Ãcõrẽba Abimele cacua biẽ́ b̶ad̶ada biabisia. Maʌ̃ awara dji quimada, nezocawẽrãrã sid̶a biabisia warra ununamãrẽã.