1 Maʌ̃ ewarid̶e Isa druad̶e jarrabada zesia Abrahaʌ̃ ewarid̶e zed̶a quĩrãca.* Genesi 12:10. Maʌ̃ carea Isara Guerar purud̶aa wãsia pilisteorã boro Abimelemaa. 2 Isa mama b̶ʌd̶e Ãcõrẽra idjimaa zeped̶a jarasia:

–Egipto druad̶aa wãrãdua, ãtebʌrʌ mʌ̃a jarabʌrʌ druad̶e b̶edua. 3 Bʌra drua ãĩbemamĩna nama b̶edua. Mʌ̃ra bʌ ume b̶aya. Mʌ̃a bʌra carebaya: mʌ̃a bʌ́a, bʌ warrarãa bid̶a naʌ̃ druara diaya. Mãwã mʌ̃a bʌ zeza Abrahaʌ̃a wãrãneba jarad̶ara oya. 4 Mʌ̃a bʌ warrarãra zocãrã yõbiya bajãne chĩdau zocãrã panʌ quĩrãca. Mʌ̃a jũma naʌ̃ druara bʌd̶eba yõbʌdarãa diaya idjab̶a mʌ̃a bʌd̶eba yõbʌrʌd̶eba naʌ̃ ẽjũãne b̶ea purura jũma carebaya. 5 Mʌ̃a mãwã oya Abrahaʌ̃ba mʌ̃ bed̶eara jũma ĩjã od̶a bẽrã; mʌ̃a obid̶ada, mʌ̃a jara b̶ʌd̶ada, mʌ̃a jaradiad̶ada, mʌ̃ ley sid̶a idjia jũma ĩjã osia.–

6 Maʌ̃ bẽrã Isara Guerar purud̶e b̶esia. 7 Maʌ̃ne Guerard̶ebemarãba Isaa dji quima Rebecad̶ebemada iwid̶isid̶aa, idjira quĩrãwãrẽã b̶ʌ bẽrã. Maʌ̃ carea Isara ne wayasia. Idub̶a crĩcha b̶esia mʌ̃ quimaana aibʌrʌ, mʌ̃ra bead̶isicada edad̶i carea. Maʌ̃ carea ãdjia iwid̶ibʌdad̶e panubadjia: “Idjira mʌ̃ djabawẽrãa.”

8 Isa mama dãrã b̶ʌd̶e pilisteorã boro Abimeleba dajadaa acʌbadad̶eba unusia Isaba idji quima Rebecara yãga nũmʌda. 9 Maʌ̃ bẽrã Abimeleba Isara trʌ̃biped̶a jarasia:

–Jãʌ̃ wẽrãra wãrãda bʌ quimaa. ¿Cãrẽ cãrẽã bʌa jarasi bʌ djabawẽrãda?–

Isaba panusia:

–Mʌ̃a crĩchasia bãrãba mʌ̃ra bead̶ida mʌ̃ quima edad̶i carea.–

10 Abimeleba jarasia:

–¿Cãrẽ cãrẽã jãwã osi? Mʌ̃ purud̶ebemarã ab̶aʌda bʌ quima ume cãĩnabara, bʌabʌrʌ daia maʌ̃ cadjiruara obicasia.–

11 Maʌ̃ bẽrã Abimeleba idji ẽberãrãa jarasia:

–Bariduaba Isada mĩã sẽibʌrʌ wa dji quimada mĩã sẽibʌrʌ, maʌ̃ ẽberãra beuida b̶ʌa.–

12 Maʌ̃ druad̶e Isara ne úsia. Ab̶ari poad̶e idjia waib̶ʌa ewasia, Ãcõrẽba idjira ne jũmane careba b̶ad̶a bẽrã. 13 Mãwã idjira bio bara b̶esia. 14 Ovejada, pacada, nezocarã sid̶a zocãrã erob̶esia. Maʌ̃ carea pilisteorãra idji ume biẽ́ panesid̶aa. 15 Idji zeza Abrahaʌ̃ zocai b̶asid̶e Abrahaʌ̃ nezocarãba baido juebada uriada corocuasid̶aa. Baribʌrʌ pilisteorãra Isa ume biẽ́ panʌ bẽrã maʌ̃ baido juebada uriara jũma egoroba ãnãcuasid̶aa. 16 Maʌ̃be dji boro Abimeleba Isaa jarasia:

–Dai tãẽnabemada ãyã wãdua, bʌra dairã cãyãbara dji dromaara b̶ebʌrʌ bẽrã.–

17 Ara maʌ̃da Isara Guerar purud̶e b̶ad̶ada ãyã wãsia. Guerar jewed̶ad̶e jũẽped̶a idji wua dera oped̶a mama b̶esia. 18 Abrahaʌ̃ wad̶i zocai b̶asid̶e idjia baido juebada uriada mama corobicuasia.† Genesi 21:25-31. Idji beud̶acarea pilisteorãba maʌ̃ baido juebada uriara egoroba jũma ãnãcuasid̶aa. Baribʌrʌ Isa mama b̶ad̶e zesid̶e waya corobicuaped̶a ab̶ari trʌ̃da b̶ʌcuasia dji zezaba naẽna b̶ʌd̶ada.

19 Ewari ab̶a Isa nezocarãba dji jewed̶ad̶e coro panasid̶aa. Coro panʌne baido ʌ̃taa bogadrʌ b̶ʌda unusid̶aa. 20 Baribʌrʌ maʌ̃ baido carea Guerard̶ebema oveja wagabadada Isa oveja wagabada ume ijarasid̶aa. Guerard̶ebemarãba jarasid̶aa:

–Naʌ̃ baidora dairãnea.–

Maʌ̃ carea ijaraped̶ad̶a bẽrã Isaba baido juebada uriara trʌ̃ b̶ʌsia Esec.‡ Hebreo bed̶ead̶e esec trʌ̃ba jara b̶ʌa: “Ijara panʌ.” 21 Mãwãnacarea Isa nezocarãba dewara baido juebada uriada corosid̶aa. Baribʌrʌ maʌ̃ carea bid̶a ijarasid̶aa. Maʌ̃ baido juebada uriara trʌ̃ b̶ʌsia Sitna.§ Hebreo bed̶ead̶e Sitna trʌ̃ba jara b̶ʌa: “Dji quĩrũ panʌ.”

22 Maʌ̃be Isara mamabemada ãyã b̶ad̶e wãsia. Mama dewara baido juebada uriada corosia. Maʌ̃ baido carea ijarad̶aẽ́ basía. Maʌ̃ne Isaba jarasia:

–Ʌ̃rãbʌrʌ Ãcõrẽba dadjirãra bia b̶ʌsia naʌ̃gʌ ẽjũãne ne bara paneni carea.–

Mãwã dji baido juebada uriara trʌ̃ b̶ʌsia Rehobo.* Hebreo bed̶ead̶e Rehobo trʌ̃ba jara b̶ʌa: “Ẽjũã baraa.”

23 Mamaʌba Beersebád̶aa wãsia. 24 Maʌ̃ diamasi Ãcõrẽra Isama odjaped̶a nãwã jarasia:

25 Ãcõrẽda mama odjad̶a bẽrã Isaba mõgarada ʌ̃tʌ pã bueped̶a idjía ewari iwid̶isia. Maʌ̃be idji wua dera osia mama dãrã b̶ai carea. Idjab̶a idji nezocarãba mama baido juebada uriada corosid̶aa.

26 Ewari ab̶a Guerar purud̶ebema boro Abimelera Isamaa zesia. Abimelera zesia idji crĩcha diabari Ahuzat ume, idji djõbadarã boro Picol ume bid̶a. 27 Maʌ̃ne Isaba Abimelea jarasia:

–Bãrãba mʌ̃ra unu ama panana bẽrã, bãrã tãẽnabemada ãyã jʌretasid̶aa. Maʌ̃da ¿cãrẽ cãrẽã mʌ̃maa ze panʌ?–

28-29 Maʌ̃ne ãdjia panusid̶aa:

–Daiba unu panʌa Ãcõrẽra bʌ ume b̶ʌda. Maʌ̃ carea daiba crĩcha panʌa bʌ ume necai panani carea bed̶eada b̶ʌd̶ida. Daiba bʌra necai wãbisid̶aa idjab̶a bʌ ume ab̶abe biada osid̶aa. Maʌ̃ bẽrã wãrãneba nãwã bed̶ea b̶ʌd̶ia: daiba bʌ mĩã sẽnaẽ́ panʌ quĩrãca bʌa bid̶a daira mĩã sẽẽ́da. Wãrãda Ãcõrẽba bʌra bio careba b̶ʌa.–

30 Maʌ̃ carea Isaba b̶ʌsrid̶a ne cobada waib̶ʌada oped̶a ãdjirãra ne codruasid̶aa. 31 Nurẽma pirab̶arid̶aped̶a wãrãneba bed̶ea b̶ʌsid̶aa necai panani carea. Maʌ̃be Isaba ãdjía bia wãnaduad̶a asia. Ãdjirã bid̶a bia b̶eduad̶a ad̶aped̶a wãsid̶aa.

32-33 Maʌ̃misa Isa nezocarãba egoro coro panʌne baidoda unusid̶aa. Ununaped̶a Isamaa jarad̶e zesid̶aa. Idjia maʌ̃gʌ ewarid̶e bed̶ea b̶ʌd̶a carea maʌ̃ baido juebada uriara trʌ̃ b̶ʌsia Sebá.† Hebreo bed̶ead̶e Sebá trʌ̃ba jara b̶ʌa: “Bed̶ea b̶ʌped̶ad̶a.” Genesi 21:30-31. Maʌ̃ carea mamabema purura wad̶ibid̶a Beersebá abadaa.

34 Isa warra Esaú cuarenta poa b̶asid̶e Beerí cau Judida edasia. Maʌ̃ awara edasia Eloʌ̃ cau Basemá sid̶a. Maʌ̃ Judira, Basemá sid̶a hitita wẽrãrã basía. 35 Maʌ̃ne ãdji umena Isa ume Rebeca ume bid̶a bia pananaca basía.