1 Nama b̶ʌ́ b̶ʌa Esaúd̶eba yõped̶ad̶ad̶ebemada. Esaúra idjab̶a Edoʌ̃ abadjid̶aa. 2 Esaúba quimada ũbea erob̶asia. Canaaʌ̃nebemada umé erob̶asia. Ab̶a Adá abadjid̶aa. Adára hitita Eloʌ̃ cau basía. Dewarabemara Aholibamá basía. Aholibamára Aná cau basía; Anára heveo Zibeoʌ̃ warra basía. 3 Dewarabema quima Esaúba erob̶ad̶ara Ismael cau Basemá basía. Basemára Nebayo djabawẽrã basía. 4-5 Esaúra wad̶ibid̶a Canaaʌ̃ druad̶e b̶asid̶e warrarãda unusia. Dji quima Adába Elipada tosia. Basemába Reuelda tosia. Aholibamába Jeúda, Jaalaʌ̃da, Core sid̶a tosia.

6-7 Maʌ̃ne Esaúba idji djaba Jacobo bid̶a animarãra, nebia sid̶a zocãrã eropanasid̶aa. Ãdjia animarãra zocãrã eropanʌ bẽrã dji ẽjũãba araẽ́ basía. Maʌ̃ bẽrã ãdjira poya ãbaa pananaẽ́ basía. Maʌ̃ carea Esaúra Jacobo umebemada ãyã wãsia dewara druad̶e b̶ai carea. Idji quimarãda, warrarãda, caurãda, ẽberãrã idji ded̶e erob̶ʌda, idji animarãda, idjia Canaaʌ̃ne edad̶a sid̶a jũma edesia. 8 Mãwã Esaú, Edoʌ̃ abadara Seír eyaid̶a b̶ʌ druad̶e b̶esia.

9 Esaúd̶eba Edoʌ̃ puruda yõsia. Maʌ̃ edomitarãra Seír eyaid̶a b̶ʌ druad̶e duanabadjid̶aa. 10 Esaú warrarã trʌ̃ra naʌ̃gʌrãa: Elipa idjab̶a Reuel. Esaú quima Adába Elipada tosia. Esaú quima Basemába Reuelda tosia. 11 Elipaba naʌ̃ warrarãda unusia: Temaʌ̃, Omar, Zepo, Gataʌ̃, Quenaz sid̶a. 12 Elipaba Timnada idji quima quĩrãca erob̶asia. Timnaba Amaleda tosia. Maʌ̃ warrarãra Adá wiuzaquerã basía. 13 Maʌ̃ne Reuelba naʌ̃ warrarãda unusia: Nahat, Zerá, Samá idjab̶a Miza. Maʌ̃ warrarãra Basemá wiuzaquerã basía. 14 Esaú quima Aholibamáda Aná cau basía, Zibeoʌ̃ ãĩzaque basía. Aholibamába naʌ̃ warrarãda Esaúa to diasia: Jeú, Jaalaʌ̃, Core sid̶a.

15-16 Esaúd̶eba yõna purud̶ebema bororã trʌ̃da nama b̶ʌ́ b̶ʌa. Dji warra iwina Elipad̶eba yõna bororãda naʌ̃gʌrã basía: Temaʌ̃, Omar, Zepo, Quenaz, Core, Gataʌ̃, Amale sid̶a. Ãdjirãra Edoʌ̃ druad̶e duanabadjid̶aa. Jũma ãdjirãda Esaú quima Adád̶eba yõsid̶aa. 17 Esaú warra Reueld̶eba yõped̶ad̶a bororãda naʌ̃gʌrã basía: Nahat, Zerá, Samá, Miza sid̶a. Ãdjirã sid̶a Edoʌ̃ druad̶e duanabadjid̶aa. Jũma ãdjirãda Esaú quima Basemáneba yõsid̶aa. 18 Esaú quima Aholibamáneba yõped̶ad̶a bororãda naʌ̃gʌrã basía: Jeú, Jaalaʌ̃, Core sid̶a. Aholibamára Aná cau basía. 19 Maʌ̃ ẽberãrãra jũma Esaú, Edoʌ̃ abadad̶eba yõsid̶aa. Ãdjirãra Edoʌ̃ druad̶e ãdji ẽberãrã bororã basía.

20-21 Esaú Edoʌ̃ druad̶aa wãi naẽna horeorãda maʌ̃ druad̶e panabadjid̶aa. Maʌ̃ horeorãra Seírd̶eba yõsid̶aa. Seír warrarãra naʌ̃gʌrã basía: Lotaʌ̃, Sobal, Zibeoʌ̃, Aná, Disoʌ̃, Ezer, Disaʌ̃ sid̶a. Maʌ̃gʌrãra Edoʌ̃ druad̶e horeorã bororã basía. 22 Seír warra Lotaʌ̃ba unusia Hori, Hemaʌ̃ sid̶a. Lotaʌ̃ djabawẽrãra Timna basía. 23 Seír warra Sobalba unusia Alvaʌ̃, Manahat, Ebal, Sepo, Onaʌ̃ sid̶a. 24 Seír warra Zibeoʌ̃ba Ajada idjab̶a Aná sid̶a unusia. Maʌ̃ Anába idji zeza burrora ẽjũã ewaraga b̶ʌd̶e ne cobi b̶asid̶e egorod̶eba baidoda ʌ̃taa bogadrʌ b̶ʌda unusia.* Baidoda. Hebreo bed̶ead̶e maʌ̃ra ebud̶a b̶ʌẽ́a. Ʌ̃cʌrʌmaarã jara b̶ʌa baido jʌ̃wʌ̃rʌ̃ãda. 25 Aná warrara Disoʌ̃ basía. Dji caura Aholibamá basía. 26 Disoʌ̃ warrarãra naʌ̃gʌrã basía: Hemdaʌ̃, Esbaʌ̃, Itraʌ̃, Queraʌ̃ sid̶a. 27 Seír warra Ezerba unusia Bilhaʌ̃, Zaavaʌ̃, Acaʌ̃ sid̶a. 28 Seír warra Disaʌ̃ba unusia Uz, Araʌ̃ sid̶a.

29 Horeorã bororãra naʌ̃gʌrã basía: Lotaʌ̃, Sobal, Zibeoʌ̃, Aná, 30 Disoʌ̃, Ezer, Disaʌ̃ sid̶a. Jũma maʌ̃gʌrãra Seír druad̶e ãdji ẽberãrã bororã basía.

31 Israelerãba ãdji boro eropanani naẽna Edoʌ̃ ẽberãrã bororãra naʌ̃gʌrã basía: 32 Beor warra Belara Edoʌ̃ ẽberãrã boro basía. Idji purura Dinabá abadjid̶aa. 33 Bela beud̶acarea Zerá warra Jobáda dji boro basía. Jobára Bosra purud̶ebema basía. 34 Jobá beud̶acarea Husaʌ̃da dji boro basía. Husaʌ̃ra Temaʌ̃ druad̶ebema basía. 35 Husaʌ̃ beud̶acarea Bedad warra Hadada dji boro basía. Hadaba madianitarãra Moab druad̶e poyasia. Idji purura Avit abadjid̶aa. 36 Hada beud̶acarea Samlada dji boro basía. Samlara Masreca purud̶ebema basía. 37 Samla beud̶acarea Saulda dji boro basía. Saulora dji do icawa b̶ʌ Rehobo purud̶ebema basía.† Dji do icawa b̶ʌ Rehobo. Ʌ̃cʌrʌmaarã Euprate dod̶ebemada bed̶ea b̶ʌa. 38 Saul beud̶acarea Baal-hanaʌ̃da dji boro basía. Idjira Acbor warra basía. 39 Baal-hanaʌ̃ beud̶acarea Hadarda dji boro basía. Idji purura Pau abadjid̶aa. Hadar quimada Mehetabel abadjid̶aa. Idjira Matred cau basía idjab̶a Mezaab ãĩzaque basía.

40-43 Esaúd̶eba yõped̶ad̶a bororãra naʌ̃gʌrã basía: Timna, Alva, Jetet, Aholibamá, Ela, Pinoʌ̃, Quenaz, Temaʌ̃, Mibzar, Magdiel, Iraʌ̃ sid̶a. Jũma maʌ̃gʌrãra Edoʌ̃ purud̶ebema bororã basía. Maʌ̃ bororãneba yõped̶ad̶arãba dji bororã trʌ̃ra ẽpẽsid̶aa. Idjab̶a ãdji b̶eaza dji bororã trʌ̃da b̶ʌcuasid̶aa.