1 Ara maʌ̃da Jacobo Israel abadara wãsia jũma idjia erob̶ʌ bara. Wãbʌrʌd̶e Beersebád̶e jũẽsia. Mama idjia animarãda idji zeza Isaba ĩjã b̶ad̶a Ãcõrẽa babue diacuasia. 2 Maʌ̃ diamasi Israelba cãĩmocara quĩrãca ũrĩsia Ãcõrẽra idji ume bed̶ea b̶ʌda. Ãcõrẽba trʌ̃ jarasia:

–Jacobo, Jacobo.–

Jacoboba panusia:

–Mʌ̃ra nama b̶ʌa.–

3 Ãcõrẽba jarasia:

–Mʌ̃ra bʌ zezaba ĩjã b̶ad̶a Ãcõrẽa. Wayarãdua Egiptod̶aa wãi carea. Jãma mʌ̃a puru waib̶ʌada bʌd̶eba yõbiya. 4 Mʌ̃ra bʌ ume Egiptod̶aa wãya. Maʌ̃be bʌd̶eba yõbʌdarãra jẽda eneya. Idjab̶a bʌ beubʌrʌd̶e Josera arima b̶aya.–

5 Ara maʌ̃da Jacobora Beersebád̶eba wãsia. Egiptod̶ebema boroba carreta diabuecuad̶ad̶e Jacobo warrarãba idjira, ãdji warrarãra, ãdji quimarã sid̶a edesid̶aa. 6 Jacoboba idji warrarã bid̶a ãdji animarã b̶eara idjab̶a jũma ãdjia Canaaʌ̃ druad̶e edaped̶ad̶a sid̶a Egiptod̶aa edesid̶aa. 7 Jacoboba idji warrarãra, idji caurãra, idji wiuzaquerãra, idji ãĩzaquerã sid̶a Egiptod̶aa jũma edesia.

8 Jacobo Israel abada warrarã Egiptod̶aa wãped̶ad̶ara naʌ̃gʌrã basía:

Jacobo warra iwina Rubeʌ̃da wãsia. 9 Rubeʌ̃ba edesia idji warrarã Hanoc, Palú, Hezroʌ̃, Carmi sid̶a.

10 Jacobo warra Simeoʌ̃ sid̶a wãsia. Simeoʌ̃ba edesia idji warrarã Jemuel, Jamiʌ̃, Ohad, Jaquiʌ̃, Zohar, Saul sid̶a. Saulora cananeo wẽrãba tod̶a basía.

11 Jacobo warra Levi sid̶a wãsia. Leviba edesia idji warrarã Gersoʌ̃, Coá, Merari sid̶a.

12 Jacobo warra Juda sid̶a wãsia. Judaba edesia idji warrarã Sela, Paré, Zará sid̶a. Idji warrarã Erera, Onaʌ̃ sid̶a Canaaʌ̃ druad̶e beusid̶aa. Paréba idji warrarã Hezroʌ̃da, Hamul sid̶a edesia.

13 Jacobo warra Isacar sid̶a wãsia. Isacarba idji warrarã Tola, Puvá, Job, Simroʌ̃ sid̶a edesia.

14 Jacobo warra Zabuloʌ̃ sid̶a wãsia. Zabuloʌ̃ba idji warrarã Sered, Eloʌ̃, Jahleel sid̶a edesia.

15 Maʌ̃ warrarã sei panʌra Leaba Jacoboa Araʌ̃ druad̶e to diasia. Leaba Jacobo cau Dina sid̶a tosia. Ãdjid̶eba yõped̶ad̶ara 33 wãsid̶aa dji umaquĩrãrã, dji wẽrãrã ãbaa.

16-18 Jacoboba Lea edasid̶e dji zãwãrẽ Labaʌ̃ba nezocawẽrã Zilpara Leaa diasia. Zilpaba warrarãda Jacoboa to diasia. Maʌ̃gʌrã sid̶a Egiptod̶aa wãsid̶aa ãdji warrarã bara. Jũma ãbaa diecisei wãsid̶aa.

Ãdji warra Gaba idji warrarã Zipioʌ̃, Hagui, Ezboʌ̃, Suni, Eri, Arodi, Areli sid̶a edesia.

Ãdji warra Aserba edesia idji warrarã Imna, Isúa, Isúi, Beria, dji cau Será sid̶a. Beria warrarãra Hebere idjab̶a Malquiel basía.

19 Jacobo quima Raquel warrarãra Jose idjab̶a Benjamiʌ̃ basía. 20 Jose warrarã Egiptod̶e toped̶ad̶ara Manase idjab̶a Epraiʌ̃ basía. Ãdji papara Asena basía. Asena zezara Potipera basía. Idjira Oʌ̃ purud̶e ʌ̃mãdaúa bia bed̶eabadarã sacerdote basía. 21 Benjamiʌ̃ warrarãra naʌ̃gʌrã basía: Bela, Bequer, Asbel, Gera, Naamaʌ̃, Ehi, Ros, Mupiʌ̃, Hupiʌ̃, idjab̶a Ard. 22 Jũma maʌ̃gʌrãra Raqueld̶eba Jacobo ume yõsid̶aa. Jũma ãbaa catorce wãsid̶aa.

23-25 Jacoboba Raquel edasid̶e dji zãwãrẽ Labaʌ̃ba nezocawẽrã Bilhara Raquelea diasia. Bilhaba warrarãda Jacoboa to diasia. Maʌ̃gʌrã sid̶a Egiptod̶aa wãsid̶aa ãdji warrarã bara. Ãdji warra Daʌ̃ba idji warra Husiʌ̃ edesia. Ãdji warra Neptaliba edesia idji warrarã Jahzeel, Guni, Jezer, Sileʌ̃ sid̶a. Jũma ãbaa siete wãsid̶aa.

26 Jũma Jacobod̶eba yõped̶ad̶arãra idji ume Egiptod̶aa wãsid̶aa. Idji ãĩgurã juachaẽ́, jũma ãbaa 66 wãsid̶aa. 27 Maʌ̃gʌ awara Jose warrarã Egiptod̶e toped̶ad̶ada umé panasid̶aa. Jũma ãbaa Jacobo ẽberãrã Egiptod̶e jũẽped̶ad̶ara setenta panasid̶aa.

28 Jacobo Israel abadaba Judada Josemaa na wãbisia ãdjira Goseʌ̃ ẽjũãne acʌd̶e zemãrẽã. Maʌ̃misa ãdjirãra Goseʌ̃ ẽjũãne jũẽsid̶aa. 29 Ãdji jũẽsid̶ad̶e Joseba idji nezocaa jarasia idji carreta enemãrẽã. Ara maʌ̃da Goseʌ̃naa idji zeza Israel audiab̶arid̶e wãsia. Idji zeza unusid̶e ojũẽped̶a dãrã jĩãsia. 30 Mãwã b̶ʌd̶e Israelba Josea jarasia:

–Mʌ̃a bʌ quĩrãra unubʌrʌ bẽrã cawa b̶ʌa bʌra wad̶i zocai b̶ʌda. Jãʌ̃be mʌ̃ra necai beuya.–

31 Maʌ̃be Joseba idji djabarãa, jũma idji zeza ẽberãrãa bid̶a jarasia:

–Egiptod̶ebema boromaa mʌ̃a jarad̶e wãya bãrãra jũẽsid̶ada. Mʌ̃a idjía jaraya: “Mʌ̃ djabarãra, mʌ̃ zeza ẽberãrã Canaaʌ̃ druad̶e duananara jũma mʌ̃maa zesid̶aa. 32 Ãdjirãra animarã wagabada bẽrã ãdji ovejada, paca sid̶a enesid̶aa. Jũma ãdjirãba erob̶ea sid̶a enesid̶aa.” 33-34 Maʌ̃be dji boroba bãrã trʌ̃ped̶a iwid̶ibʌrʌd̶e “¿Bãrãba cãrẽda obada?”, nãwã jarad̶adua: “Daira warra ed̶aʌba animarã daupẽ cawa b̶eaa, dai drõã naẽnabemarãba obadaped̶ad̶a quĩrãca.” Mãwã jarasid̶ara dji boroba bãrãra jĩga Goseʌ̃ ẽjũãne idu b̶ebiya, egiptorãmaarã oveja wagabadara dji biaẽ́ bẽrã.–