1 Ehud jaid̶ad̶acarea israelerãba wayacusa Ãcõrẽ quĩrãpita cadjiruada o panesid̶aa. 2 Maʌ̃ carea Ãcõrẽba ãdjirãra cananeorã boro Jabiʌ̃ jʌwaed̶a b̶ʌsia. Jabiʌ̃ra Hazor purud̶e b̶abadjia. Jabiʌ̃ sordaorã borora Sisará basía. Maʌ̃ Sisarára Haroset-goiʌ̃ne b̶abadjia. 3 Jabiʌ̃ba djõbada carreta jiorro od̶ada noveciento erob̶asia. Veinte poa israelerãra quĩrã djuburia neẽ́ bio bia mĩga erob̶asia. Maʌ̃ne israelerãba Ãcõrẽa quĩrã djuburiada iwid̶isid̶aa.

4 Maʌ̃ ewarid̶e Deboráda israelerã cawa obari basía. Idjira Ãcõrẽneba bed̶eabadjia. Lapidot quima basía. 5 Maʌ̃ Deborára Epraiʌ̃ eyaid̶a b̶ʌ druad̶e b̶abadjia Ramá puru idjab̶a Betel puru ẽsi. Israelerã nẽbʌrad̶e panʌne idjimaa wãbadjid̶aa cawa omãrẽã. Cawa obʌrʌd̶e Deborára urutaca b̶ʌ edre chũmabadjia. Maʌ̃ bẽrã maʌ̃ bacurura Deborá Uruta trʌ̃ b̶ʌsid̶aa.

6 Ewari ab̶a Deborába Abinoaʌ̃ warra Baracoda trʌ̃bisia. Idjira Neptali druad̶e Quedé purud̶e b̶abadjia. Baraco zed̶acarea Deborába nãwã jarasia:

–Dadji israelerã Ãcõrẽba bʌ́a nãwã jara b̶ʌa: “Sordaorã Neptalid̶ebemada Zabuloʌ̃nebema sid̶a die mil ededua Tabor eyad̶aa. 7 Mʌ̃a Jabiʌ̃ sordaorã boro Sisaráda bʌ ume djõne wãbiya. Dji carretad̶eba djõbadarãda, waabema sordaorã sid̶a eneya Quisoʌ̃ do zaqued̶aa. Baribʌrʌ mʌ̃a bʌ́a ãdjirãra poyabiya.”–

8 Maʌ̃ne Baracoba Deboráa jarasia:

–Bʌda mʌ̃ ume wãibʌrʌ mʌ̃ra wãya. Bʌda wãẽ́bʌrʌ mʌ̃ sid̶a wãẽ́a.–

9 Deborába jarasia:

–Bia b̶ʌa, mãẽteara mʌ̃ra bʌ ume wãya. Baribʌrʌ Sisará poyad̶acarea bʌra trʌ̃ b̶ʌgaẽ́a, Ãcõrẽba Sisarára wẽrãa poyabi bẽrã.–

Ara maʌ̃da Deborára Baraco ume Quedes purud̶aa wãsia. 10 Mama Baracoba sordaorã Zabuloʌ̃nebemada, Neptalid̶ebema sid̶a die mil ãbaa jʌreped̶a Tabor eyad̶aa edesia. Deborá sid̶a idji ume wãsia.

11 Maʌ̃ ewarid̶e quenita Hebere abadada Quedes puru caita b̶abadjia. Naẽna idjira waabema quenitarã ume b̶ad̶ada Zaanaim jewed̶ad̶e idji wua dera o erob̶asia.* Zaanaim jewed̶a. Maʌ̃ bed̶eaba idjab̶a jara b̶ʌa “Zaanaim encina bacuru droma.” Maʌ̃ Heberera Moise zãwãrẽ Hobád̶eba yõna basía.† Moise zãwãrẽ Hobá. Numero 10:29d̶e jara b̶ʌa Hobára Moise zãwãrẽ Reuel warra basida.

12 Maʌ̃ne Sisarába ũrĩsia Abinoaʌ̃ warra Baracora idji sordaorã ume Tabor eyad̶aa wãsid̶ada.‡ Abinoaʌ̃ warra. Ʌ̃cʌrʌ traduccioʌ̃ne maʌ̃ bed̶eara neẽ́a. 13 Maʌ̃ carea idji jiorro od̶a djõbada carreta noveciento panʌda, idji sordaorã sid̶a ãbaa jʌreped̶a Haroset-goiʌ̃neba Quisoʌ̃ do zaqued̶aa wãsid̶aa.

14 Maʌ̃be Deborába Baracoa jarasia:

–¡Ãdjirã ume isabe djõne wãnadua! ¡Id̶ibʌrʌ Ãcõrẽba bʌ́a Sisarára poyabiya! ¡Ãcõrẽra bʌ na wãbʌrʌa!–

Ara maʌ̃da Baracora idji sordaorã die mil panʌ ume Tabor eyad̶eba ed̶aa djõne wãsid̶aa. 15 Djõne wãbʌdad̶e Ãcõrẽba Sisarára, carretad̶eba djõbadarãra, waabema sordaorã sid̶a bio ne wayabisia. Maʌ̃ bẽrã Baracoba idji sordaorã ume necoba zocãrã quenasid̶aa. Baribʌrʌ Sisarára idji carretad̶eba ud̶u jʌ̃drʌped̶a mĩrũ pira wãsia. 16 Maʌ̃ne Baracoba Sisará carretad̶eba djõbadarãra, waabema sordaorã sid̶a ẽpẽsid̶aa ab̶a Haroset-goiʌ̃naa. Mãwã Sisará sordaorãra jũma quenasid̶aa. Ni ab̶a bid̶a zocai b̶eẽ́ basía.

17-18 Maʌ̃ ewarid̶e Hazord̶ebema boro Jabiʌ̃ra quenita Hebere ẽberãrã ume necai b̶asia. Maʌ̃ carea Sisarára ãdjimaa mĩrũ wãsia. Jũẽsid̶e wẽrã Jael abadaba idjira audiab̶arid̶e wãsia. Maʌ̃ wẽrãra Hebere quima basía. Jaelba nãwã jarasia:

–Mʌ̃ boro, diguid̶aa zedua. Ne wayarãdua.–

Ara maʌ̃da Sisarára Jael wua ded̶e ed̶aa wãped̶a tab̶esia. Maʌ̃ne Jaelba idjira borob̶aba ãnẽb̶ari b̶ʌsia. 19 Sisarába jarasia:

–Mʌ̃ quĩrã djuburia baidoda diadua. Mʌ̃ra opichia b̶ʌa.–

Jaelba paca jub̶ada animarã e od̶ad̶e tʌ erob̶asia. Maʌ̃ra ewaped̶a paca jub̶ara diasia. Maʌ̃be Sisarára wayacusa ãnẽb̶ari b̶ʌsia.

20 Sisarába jarasia:

–Wua ded̶e ed̶a wãbadama chũmedua. Bariduada zeped̶a nãwã iwid̶ibʌrʌ: “¿caida nama b̶ʌ?”, jaradua ẽberã neẽ́da.–

21 Sisarára sẽ b̶ʌ bẽrã bio cãĩ b̶esia. Maʌ̃be Hebere quima Jaelba wua de egorod̶aa cachibada bacuru cũmiada, dji cachibada sid̶a edasia. Jaelera chupea ed̶a wãped̶a maʌ̃ bacuruba Sisará borora egorod̶aa wãyã cachi nũmʌsia. Mãwã Sisarára beasia.

22 Baracoba Sisará jʌrʌ b̶ʌd̶e Jael purud̶e jũẽsia. Maʌ̃ne Jaelba idji audiab̶arid̶e wãped̶a nãwã jarasia:

–Zedua, bʌa jʌrʌ b̶ʌra mʌ̃a acʌbiya.–

Ara maʌ̃da Baracora Jael wua ded̶e ed̶a wãped̶a Sisarára beu tab̶ʌda unusia. Jaelba cachid̶a bacurura wad̶i Sisará borod̶e su nũmasia.

23 Maʌ̃ ewarid̶e Ãcõrẽba israelerã quĩrãpita cananeorã boro Jabiʌ̃ra mãwã poyasia. 24 Mamaʌba ʌ̃taa israelerãra cananeorã boro Jabiʌ̃ ume djõbʌdaza poyabadjid̶aa ab̶a idji beabʌdad̶aa.