1 Maʌ̃ ewarid̶e Jepteda Gala ẽjũãne b̶abadjia. Idjira bio mẽsrã b̶asia idjab̶a sozarra b̶asia. Dji zezara Gala abadjid̶aa. Galaba wẽrã aud̶ua ume Jeptera unusia. 2 Gala quima bid̶a warrarãda tosia. Maʌ̃ warrarã wariped̶ad̶acarea Jeptea jarasid̶aa ãdji zezaba erob̶ʌd̶ebemada edaẽ́da, dewara wẽrãba tod̶a bẽrã. Mãwã jarad̶aped̶a Jeptera ãyã jʌretasid̶aa. 3 Maʌ̃ carea idji djabarã ume b̶ad̶ada Tob ẽjũãne b̶ad̶e wãsia. Mama ẽberãrã cadjirua b̶eada peped̶a ãdjia quĩrĩãbʌdada od̶e wãbadjid̶aa.

4 Maʌ̃misa amonitarãra Mizpa purud̶aa zesid̶aa Galad̶ebema israelerã ume djõni carea. 5 Maʌ̃ carea Galad̶ebema israelerã bororãra Tob ẽjũãnaa Jepte trʌ̃ne wãsid̶aa. 6 Dji bororãba idjía nãwã jarasid̶aa:

–Amonitarãra dairã ume djõne zesid̶a bẽrã daiba quĩrĩã panʌa bʌra dai ume wãped̶a dai sordaorã boro baida.–

7 Dji bororã tãẽna idji djabarãda panʌ bẽrã Jepteba nãwã jarasia:

–¿Bãrãba mʌ̃ra quĩrãma panasid̶aẽ́ca? ¿Mʌ̃ zeza ded̶ebemada ãyã jʌretad̶aẽ́ basica? Bãrãra minijĩchiad̶e panʌ bẽrã ¿mʌ̃ra jãwã jʌrʌd̶e ze panʌca?–

8 Maʌ̃ne dji bororãba nãwã jarasid̶aa:

–Mãẽ, maʌ̃ carea dairãba bʌra jʌrʌd̶e ze panʌa. Quĩrĩã panʌa bʌra dairãare amonitarã ume djõne wãida. Wãsira bʌra dai Galad̶ebema israelerã boro baya.–

9 Jepteba jarasia:

–Bãrãba mʌ̃ra jẽda amonitarã ume djõne eded̶aped̶a Ãcõrẽba mʌ̃́a ãdjirãda poyabibʌrʌ, ¿wãrãda mʌ̃ra bãrã boroda b̶ʌd̶ica?–

10 Dji bororãba panusid̶aa:

–Mãẽ, dairãba Ãcõrẽ quĩrãpita jarabʌdaa bʌa jara b̶ʌra wãrãda od̶ida.–

11 Ara maʌ̃da Jeptera ãdjirã ume wãped̶a Galad̶ebema israelerãba idjira b̶ʌsid̶aa ãdji sordaorã boroda idjab̶a puru boroda. Maʌ̃be Mizpa purud̶e Jepteba dji bororãa jarad̶ara waya Ãcõrẽ quĩrãpita jarasia.

12 Mãwãnacarea Jepteba ʌ̃cʌrʌ diabuesia amonitarã boroa nãwã iwid̶id̶amãrẽã:

–Bʌra ¿cãrẽ cãrẽã dairã ume quĩrũ b̶ʌ? ¿Cãrẽ cãrẽã dai druad̶e djõne ze b̶ʌ?–

13 Amonitarã boroba Jepteba diabued̶arãa nãwã panusia:

–Bãrã israelerã Egiptod̶eba zesid̶ad̶e dai druara jãrĩsid̶aa Arnoʌ̃ dod̶eba ab̶a Jabó dod̶aa. Jũma Jordaʌ̃ do icawa b̶ʌ ẽjũã ʌ̃mãdau odjabariare b̶ʌra jãrĩsid̶aa. Bãrãba maʌ̃ ẽjũãda biad̶eba jẽda diad̶ibʌrʌ bãrã ume djõnaẽ́a.–

14-15 Maʌ̃be Jepteba dewararãda diabuesia amonitarã boroa nãwã jarad̶amãrẽã:

–Jepteba nãwã jara b̶ʌa: “Dai israelerãba bãrã amonitarã druara ni moabitarã drua sid̶a jãrĩnaẽ́ basía. 16 Dai israelerã Egiptod̶eba ẽdrʌsid̶ad̶e naãrã ẽjũã põãsa ewaraga b̶ʌd̶e Pusa Purrud̶aa wãsid̶aa. Mamaʌba Cadé purud̶e jũẽne wãsid̶aa. 17 Maʌ̃ne dai israelerã bororãba ʌ̃cʌrʌ diabuesid̶aa Edoʌ̃ druad̶ebema boromaa. Idjía iwid̶isid̶aa dai israelerã idji druad̶e wãyã wãbimãrẽã. Baribʌrʌ idjia iduaribiẽ́ basía.* Numero 20:14-21. Moab druad̶ebema boroa bid̶a ab̶arida iwid̶isid̶aa. Baribʌrʌ idjia bid̶a iduaribiẽ́ basía. Maʌ̃ bẽrã dai israelerãra Cadéd̶e duanesid̶aa. 18 Maʌ̃be ẽjũã põãsa ewaraga b̶ʌd̶e Edoʌ̃ drua aud̶u idjab̶a Moab drua aud̶u pʌrrʌga wãnaped̶a Arnoʌ̃ do icawa jũẽne wãsid̶aa. Mama Moab drua quĩrãpe ʌ̃mãdau odjabariare duanesid̶aa baribʌrʌ do chãnaẽ́ basía, wa quĩrãrẽ moabitarã drua bẽrã.† Numero 21:10-15.

19 Maʌ̃be dai israelerã bororãba ʌ̃cʌrʌ Hesboʌ̃ purud̶aa diabuesid̶aa amorreorã boro Sehoʌ̃maa. Idjía bid̶a iwid̶isid̶aa dai israelerãra idji druad̶e idu wãyã wãbimãrẽã dai druad̶aa. 20 Baribʌrʌ dai israelerãba iwid̶iped̶ad̶ara Sehoʌ̃ba sewada crĩchad̶a bẽrã idji druad̶e idu wãyã wãbiẽ́ basía. Maʌ̃ awara idji sordaorãda jũma ãbaa jʌreped̶a Jahaza puru caita zed̶aped̶a dai israelerã ume djõsid̶aa.

21 Baribʌrʌ dai israelerã Ãcõrẽba Sehoʌ̃ra, idji sordaorã sid̶a jũma poyabisia. Maʌ̃be dai israelerãba maʌ̃ druad̶e b̶ea amorreorã ẽjũãra jũma edasid̶aa.‡ Numero 21:21-30. 22 Arnoʌ̃ dod̶eba ab̶a Jabó dod̶aa idjab̶a ẽjũã põãsa ewaraga b̶ʌd̶eba ab̶a Jordaʌ̃ dod̶aa ãdji ẽjũãra jũma edasid̶aa. 23 Dai israelerã Ãcõrẽba amorreorãra ãyã jʌretaped̶a maʌ̃ ẽjũãra dairã, idji purua diad̶a bẽrã ¿bʌra cai mãwã jãrĩ carea? 24 ¿Bʌ ãcõrẽ Quemoba bʌ́a diad̶ara bʌreẽ́ca? Ab̶ari quĩrãca dai Ãcõrẽba dairãa diad̶ara daid̶ea. 25 ¿Bʌa moabitarã boro bad̶a Zipor warra Baláda quĩrãneba b̶ʌca? Naʌ̃ ẽjũã carea idjira dairã ume ijaraẽ́ basía ni djõne zeẽ́ basía.§ Numero 22:1-6. ¿Bʌra Balá cãyãbara dji dromaara b̶ʌca?

26 Dai israelerãra Hesboʌ̃ purud̶e, Aroer purud̶e, maʌ̃ caita b̶ea puru zaqued̶e, idjab̶a Arnoʌ̃ do icawa b̶ea purud̶e bid̶a tresciento poa panʌa. Dairãra naʌ̃ druad̶e dãrãbʌdaa. Bãrãba ¿cãrẽ cãrẽã ʌ̃rãbʌrʌ naʌ̃ druara iwid̶i panʌ? 27 Mʌ̃a bʌra biẽ́ oẽ́ b̶ʌa. Bʌdrʌ dairã ume djõ quĩrĩã b̶ʌ bẽrã biẽ́ o b̶ʌa. Ãcõrẽ dadji cawa obariba id̶i cawabiya cairãba jipa o panʌda: dai israelerãba wa bãrã amonitarãba.”–

28 Jepteba mãwã jarabid̶amĩna amonitarã boroba ĩjãẽ́ basía.

29 Maʌ̃ne Ãcõrẽ Jaurera Jeptemaa zesia. Maʌ̃ bẽrã Jeptera Gala ẽjũãne, Manased̶eba yõped̶ad̶arã ẽjũãne bid̶a jũma pʌrrʌasia sordaorã jʌrei carea. Sordaorã ãbaa jʌreped̶a Gala druad̶e b̶ʌ Mizpa purud̶e jũẽsia. Mamaʌba amonitarã ume djõne wãsia. 30-31 Mãwã b̶ʌd̶e Jepteba Ãcõrẽa wãrãneba nãwã jarasia:

–Bʌa amonitarãda mʌ̃́a poyabibʌrʌ, diguid̶aa wãbʌrʌd̶e naãrã mʌ̃ audiab̶arid̶e zebʌrʌda mʌ̃a bʌ́a babue diaya.–

32 Mãwã jaraped̶a amonitarã ume djõne wãsia. Maʌ̃ne Ãcõrẽba idjía poyabisia. 33 Jepteba amonitarãra zocãrã quenasia. Aroer purud̶eba ab̶a Minit purud̶aa idjab̶a Abel-queramiʌ̃ purud̶aa bid̶a veinte puru poyasia. Mãwã amonitarãra israelerã jʌwaed̶a panesid̶aa.

34 Mãwãnacarea Jeptera Mizpa purud̶aa jẽda wãsia. Diguid̶aa jũẽbʌrʌd̶e idji cauba audiab̶arisia. Tõnõã zá b̶ʌd̶e cari b̶asia. Jepteba dewara cauda ni warra sid̶a neẽ́ b̶asia. Ab̶a idjidrʌ erob̶asia. 35 Idji cau unubʌrʌd̶e Jeptera bio sopuasia. Maʌ̃ carea idjia cacuad̶e jʌ̃ b̶ʌda cũẽtacuaped̶a idji caua nãwã jarasia:

–¡Ay, cau, bʌa mʌ̃ra bio sopuabibʌrʌa! Mʌ̃a Ãcõrẽa wãrãneba diai jarad̶ara diaida b̶ʌa.–

36 Dji cauba nãwã jarasia:

–Zeza, bʌa Ãcõrẽa iwid̶id̶a quĩrãca idjia amonitarã bʌ dji quĩrũra poyabisia. Maʌ̃ bẽrã bʌa idjía wãrãneba jarad̶ara odua. Mʌ̃ra Ãcõrẽa babue diadua. 37 Baribʌrʌ mʌ̃ quĩrã djuburia jed̶eco umé mʌ̃ra eyad̶e idu pʌrrʌad̶e wãbidua. Mʌ̃ dji biarã ume jĩãne wãya mʌ̃ra quima edaẽ́ beui bẽrã.–

38 Jepteba panusia:

–Bia b̶ʌa. Wãdua.–

Idjira jed̶eco umé idu wãbisia. Maʌ̃ne idji biarã ume eyad̶e jĩã nĩbasid̶aa, quima edaẽ́ beui bẽrã.

39 Mãwãnacarea idjira Jeptemaa jẽda zesia. Maʌ̃be Jepteba Ãcõrẽa wãrãneba jarad̶ara osia. Mãwã idji caura umaquĩrã adua b̶ʌda jaid̶asia. 40 Maʌ̃ carea Israeld̶ebema awẽrãrãba poaza ewari quĩmãrẽ Galad̶ebema Jepte cau carea jĩãbadaa.