1 Maʌ̃be Nuʌ̃ warra Josueba ẽberãda umé trʌ̃ped̶a nãwã jarasia:

–Canaaʌ̃ druara acʌd̶e wãnadua. Sãwã b̶ʌ cawaya Jerico puruda chupea acʌd̶adua.–

Mãwã jaraped̶a Josueba ãdjira Sitiʌ̃ ẽjũãneba diabuesia. Wãbʌdad̶e Jericod̶e jũẽne wãsid̶aa. Mama wẽrã aud̶ua b̶ʌ Rahá abada ded̶e cãĩne wãsid̶aa. 2 Baribʌrʌ ʌ̃cʌrʌba ãdjira ununaped̶a Jericod̶ebema boroa nãwã jarad̶e wãsid̶aa:

–Queubʌrʌd̶e israelerãda umé jũẽsid̶aa. Dadjirã drua acʌd̶e ze panʌa sãwã poyad̶i cawaya.–

3-4 Maʌ̃ carea Jericod̶ebema boroba zarrarãda Rahámaa diabuesia. Maʌ̃misa Rahába israelerã umé panʌra mĩrũbisia. Zarrarãra jũẽnaped̶a nãwã jarasid̶aa:

–Ẽberãrã bʌ diguid̶a jũẽped̶ad̶ara isabe dajadaa zebidua. Dadjirã drua acʌd̶e ze panʌa sãwã poyad̶i cawaya.–

Rahába jarasia:

–Wãrãda mʌ̃ ded̶e ẽberãrãra zesid̶aa, baribʌrʌ ãdjira sãmabemada mʌ̃a adua b̶asia. 5 Queubʌrʌd̶e purud̶e ed̶a wãbada jũãtrʌd̶i naẽna ãdjira wãsid̶aa. Mʌ̃a adua b̶ʌa sãmaa wãsid̶ada. Baribʌrʌ bãrãda ãdji caid̶u isabe wãnibʌrʌ jidad̶e wãnisicada.–

6 Rahába jarad̶ara sewa basía. Idjia maʌ̃ ẽberãrãra idji de ʌ̃rʌ̃ edeped̶a lino cajʌ̃na pae erob̶ʌ edrecare mĩrũbisia.

7 Rahába mãwã jarad̶a bẽrã zarrarãra israelerã caid̶u wãsid̶aa jidad̶i carea. Puru dajadaa wãnaped̶a dewararãba purud̶e ed̶a wãbadara jũãtrʌsid̶aa. Zarrarãra Jordaʌ̃ dod̶aa wãbada od̶e israelerã jʌrʌd̶e wãsid̶aa ab̶a Jordaʌ̃ do chãbadamaa.

8 Israelerã cãĩni naẽna Rahára idji de ʌ̃rʌ̃ wãped̶a jarasia:

9 –Mʌ̃a cawa b̶ʌa Ãcõrẽba wãrãda naʌ̃ Canaaʌ̃ druara bãrãa diaida. Maʌ̃ bẽrã dairãba bãrãra bio waya panʌa. Jũma naʌ̃ druad̶ebemarãra bãrã bio waya panʌneba ure duanʌa. 10 Daiba cawa panʌa bãrã Egiptod̶eba ẽdrʌsid̶ad̶e Ãcõrẽba Pusa Purrud̶e oda ewasida bãrã chãnamãrẽã.* Exodo capítulo 14. Maʌ̃ awara cawa panʌa bãrãba amorreorã Jordaʌ̃ do quĩrãrẽ pananara poyad̶aped̶a ãdji bororã Sehoʌ̃da, Og sid̶a beasid̶ada.† Numero 21:21-35. 11 Maʌ̃ cawasid̶ad̶e dairãra bio ne waya panesid̶aa. Sozarra b̶ea sid̶a ne wayasid̶aa bãrã Ãcõrẽra dji wãrã Ãcõrẽ bẽrã. Idjia bajãne, naʌ̃ ẽjũãne bid̶a ne jũmada poya b̶ʌa. 12-13 Maʌ̃ carea mʌ̃ quĩrã djuburia, Ãcõrẽ trʌ̃neba bãrãba wãrãneba jarad̶adua mʌ̃ ẽberãrãra carebad̶ida mʌ̃a bãrã carebad̶a quĩrãca. Mʌ̃ djibarirãra, mʌ̃ djabarãra, mʌ̃ djabawẽrãrãra, jũma ãdji ẽberãrã sid̶a bearãnadua. ¡Daira zocai b̶ʌd̶adua! Bãrãba mãwã wãrãneba jarad̶ibʌrʌ, mʌ̃́a ebud̶a cawabid̶adua.–

14 Ãdjia panusid̶aa:

–Bia b̶ʌa. Bãrãnebemada bead̶ibʌrʌ, dai sid̶a beud̶ida panʌa. Baribʌrʌ daiba o panʌra bʌa djãrãa jaracara b̶ʌa. Ãcõrẽba naʌ̃ drua dairãa diabʌrʌd̶e bãrãra biad̶eba carebad̶ia. Daiba jara panʌ quĩrãca wãrãda od̶ia.–

15 Rahá dera dji puru mõgaraba jũrã ca b̶ʌd̶e ed̶a b̶asia. Maʌ̃ bẽrã dajadaa acʌbadad̶e idjia jʌ̃carada jʌ̃ jira b̶ʌsia ãdji ẽdrʌd̶amãrẽã. 16 Wãni naẽna Rahába nãwã jarasia:

–Ẽjũã eyaid̶a b̶ʌd̶aa mĩrũ wãnadua zarrarãba unurãnamãrẽã. Mama ewari ũbea mĩrũ pananadua ab̶a bãrã jʌrʌ panʌra jẽda zebʌdad̶aa. Maʌ̃bebʌrʌ wãnadua bãdji wãbʌdamaa.–

17 Ãdjia nãwã jarasid̶aa:

–Daiba bʌ́a wãrãneba jaraped̶ad̶ara jũma od̶ia. 18 Baribʌrʌ naʌ̃ druad̶e djõne zebʌdad̶e bʌa dai ẽdrʌ b̶ʌd̶a dajadaa acʌbadad̶e naʌ̃ jʌ̃cara purruda jʌ̃ jira b̶ʌida b̶ʌa. Idjab̶a bʌ djibarirãda, bʌ djabarãda, jũma bʌ ẽberãrã sid̶a nama bʌ diguid̶a eneida b̶ʌa. 19 Ab̶aʌda dajadaa wãibʌrʌ maʌ̃ne daiba bead̶ibʌrʌ, daira bed̶ead̶e pananaẽ́a. Baribʌrʌ nama bʌ diguid̶a b̶eada bead̶ibʌrʌ, dai sid̶a wãrãda beud̶ida panʌa. 20 Maʌ̃ awara daiba o panʌda bʌa djãrãa jaraibʌrʌ, daiba bʌ́a wãrãneba jaraped̶ad̶ara od̶aẽ́a.–

21 Maʌ̃ne Rahába jarasia:

–Bia b̶ʌa, bãrãba jara panʌ quĩrãca od̶ia.–

Maʌ̃be ãdjira wãbisia. Wãped̶ad̶acarea Rahába jʌ̃cara purrura dajadaa acʌbadad̶e jʌ̃ b̶ʌsia.

22 Israelerã umé panʌra ẽjũã eyaid̶a b̶ʌd̶aa wãnaped̶a ewari ũbea mĩrũ panasid̶aa. Maʌ̃misa zarrarãba ãdjira o b̶eaza jʌrʌ panʌmĩna ununaẽ́ basía. Maʌ̃ bẽrã wayacusa Jerico purud̶aa jẽda wãsid̶aa. 23 Maʌ̃bebʌrʌ ẽjũã eyaid̶a b̶ʌd̶e mĩrũ pananara ẽdrʌsid̶aa. Jordaʌ̃ do chãnaped̶a wayacusa Nuʌ̃ warra Josue b̶ʌma jũẽsid̶aa. Ãdji sãwãped̶ad̶ara idjía jũma nẽbʌrʌsid̶aa. 24 Ãdjia Josuéa nãwã jarasid̶aa:

–Wãrãda Ãcõrẽba jãʌ̃ Canaaʌ̃ druara dadjirãa diaya. Dadjirã carea ãdjirãra bio ne waya panʌa.–