1 Josueba Siqueʌ̃ purud̶e israelerãra jũma ãbaa jʌresia. Maʌ̃ne dji drõãrãda, dji bororãda, dji cawa obadarãda, dji dromarã sid̶a caita trʌ̃cuaped̶a Ãcõrẽ quĩrãpita nũpanesid̶aa. 2 Maʌ̃be Josueba purua nãwã jarasia:

–Dadji Ãcõrẽba nãwã jara b̶ʌa: “Bãrã drõã naẽnabemarã Euprate do quĩrãrẽ panabadjid̶ad̶e jʌwaba od̶a ãcõrẽrãda ẽpẽbadjid̶aa. Tareba mãwã obadjia. Abrahaʌ̃ba, Naco bid̶a Tarera ãdji zeza basía. 3 Baribʌrʌ mʌ̃a Abrahaʌ̃da Euprate do quĩrãrẽba eneped̶a naʌ̃ Canaaʌ̃ druad̶e pʌrrʌabisia. Idjid̶eba mʌ̃a ẽberãrãda zocãrã yõbisia. Mʌ̃a idji warra Isada unubisia. 4 Mʌ̃a Isaa warrada umé unubisia: Jacobo idjab̶a Esaú. Esaúa Seír eyaid̶a b̶ʌ druada diasia. Maʌ̃ne Jacobora idji warrarã sid̶a Egiptod̶e panane wãsid̶aa.* Genesi 46:8d̶eba ab̶a 47:12d̶aa. 5 Mãwãnacarea mʌ̃a Moiseda Aaroʌ̃ sid̶a Egiptod̶aa diabuesia bãrã ẽdrʌ enenamãrẽã. Mʌ̃a egiptorãra bia mĩgabiped̶a bãrãra ẽdrʌ enesia. 6 Egiptod̶eba ẽdrʌ enebʌrʌd̶e Pusa Purru icawa jũẽsid̶aa. Maʌ̃ne Egiptod̶ebema carretad̶eba djõbadarãba, cawayod̶eba djõbadarã bid̶a bãrãra ẽpẽsid̶aa ab̶a Pusa Purrud̶aa. 7 Maʌ̃ne bãrãba quĩrã djuburiada iwid̶id̶aped̶a mʌ̃a bãrã jẽdaare jʌ̃rãrã pãĩmada jira b̶ʌsia egiptorã nocoare. Egiptorãba Pusa Purrud̶e bãrã ẽpẽsid̶ad̶e mʌ̃a pusaa ãdjirãra ãnẽb̶ari edabisia.† Exodo 14:15-30. Mʌ̃a egiptorã cawa od̶ara bãrãba bio cawa panʌa bãrã drõãrãba unuped̶ad̶a bẽrã.

Mãwãnacarea bãrãra ẽjũã põãsa ewaraga b̶ʌd̶e bio dãrã pʌrrʌa nĩbasid̶aa. 8 Mãwã nĩnane mʌ̃a bãrãra Jordaʌ̃ dod̶eba ʌ̃mãdau odjabariare panʌ amorreorãmaa edesia. Maʌ̃ne ãdjirãra bãrã ume djõsid̶aa. Baribʌrʌ mʌ̃a bãrãa ãdjirãra poyabisia. Bãrã djõsid̶ad̶e mʌ̃a ãdjirãra quenabiped̶a bãrãba ãdji ẽjũãra jũma edasid̶aa. 9 Mãwãnacarea moabitarã boro Zipor warra Baláda bãrã israelerã ume djõ quĩrĩã b̶asia. Maʌ̃ne idjia Beor warra Balaaʌ̃da trʌ̃bisia bãrã biẽ́ jara b̶ʌmãrẽã. 10 Baribʌrʌ mʌ̃a Balaaʌ̃a idu mãwã obiẽ́ basía. Ãtebʌrʌ idjia bãrãra b̶arima zocãrã bia jara b̶ʌsia.‡ Numero 22:1neba ab̶a 24:25d̶aa. Mãwã idjia biẽ́ jara b̶ʌi bad̶ad̶ebemada mʌ̃a bãrãra ẽdrʌ edasia.

11 Mamaʌba Jordaʌ̃ do chãnaped̶a bãrãra Jerico caita jũẽne wãsid̶aa. Maʌ̃ne Jericod̶ebemarãra bãrã ume djõsid̶aa baribʌrʌ mʌ̃a bãrãa poyabisia. Ara maʌ̃ quĩrãca mʌ̃a amorreorãda, perezeorãda, cananeorãda, hititarãda, gergeseorãda, heveorãda, jebuseorã sid̶a bãrãa jũma poyabisia. 12 Bãrãba chaba idjab̶a necoba ãdjirãra poyad̶aẽ́ basía. Ãtebʌrʌ bãrã djõne wãsid̶ad̶e mʌ̃abʌrʌ ãdjirãra ne wayabiped̶a mĩrũ wãbʌrʌsid̶aa nedʌrrʌba orrabʌrʌ quĩrãca. Ara maʌ̃ quĩrãca mʌ̃a naẽna osia amorreo bororã umé pananara.§ Numero 21:21-35. Ab̶arid̶ebemada bed̶easia versículo 8d̶e. 13 Mʌ̃a ãdji ẽjũãra néu bara, puru sid̶a bãrãa jũma diasia. Mãwã uva, olivo sid̶a bãrãba uped̶ad̶aẽ́da cobadaa. Idjab̶a bãrãba oped̶ad̶aẽ́ puru b̶ead̶e panabadaa.”–

14 Maʌ̃ awara Josueba nãwã jarasia:

–Ãcõrẽba mãwã od̶a bẽrã idjira wayad̶adua. Ewariza sod̶eba idjira ĩjã pananadua. Jʌwaba od̶a ãcõrẽ b̶ea dadji drõã naẽnabemaba Euprate do quĩrãrẽ ẽpẽ pananada idjab̶a Egiptod̶e ẽpẽ panana sid̶a jũma b̶atacuad̶adua. Ab̶abe dadjirã Ãcõrẽdrʌ ẽpẽnadua. 15 Baribʌrʌ bãrãba dadji Ãcõrẽda ẽpẽ quĩrĩãnaẽ́bʌrʌ, id̶i jarad̶adua sãʌ̃gʌda ẽpẽnida: dadji drõã naẽnabemaba Euprate do quĩrãrẽ ẽpẽ pananada wa naʌ̃ druad̶e amorreorãba ẽpẽ panʌda. Baribʌrʌ mʌ̃a, mʌ̃ quimaba, mʌ̃ warrarã bid̶a Ãcõrẽdrʌ ẽpẽnia.–

16 Josueba mãwã jarad̶acarea israelerãba nãwã panusid̶aa:

–Dairã bid̶a Ãcõrẽdrʌ ẽpẽnia. Idjira ni maãrĩ bid̶a igarad̶aẽ́a dewara ãcõrẽ ẽpẽni carea. 17 Dadji Ãcõrẽbʌrʌ dadjirãra, dadji drõãrã sid̶a Egiptod̶e nezocarã pananada ẽdrʌ enesia. Idjiabʌrʌ dadjirã quĩrãpita ne ununaca dromada ocuasia. Dadjirã Egiptod̶eba zesid̶ad̶e idjiabʌrʌ od̶e, djãrã druaza bid̶a waga b̶asia. 18 Idjiabʌrʌ jũmarãda dadjirã quĩrãpitabemada ãyã jʌretacuasia. Amorreorã naʌ̃ druad̶e panana sid̶a ãyã jʌretacuasia. Maʌ̃ bẽrã dairã bid̶a idjidrʌ ẽpẽnia. Idjidrʌ dai Ãcõrẽa.–

19 Maʌ̃ne Josueba nãwã jarasia:

–Bãrãba Ãcõrẽra poya ẽpẽnaẽ́a. Dewarada idji quĩrãca neẽ́a. Idjia quĩrĩã b̶ʌa bãrãba ab̶abe idjidrʌ quĩrĩãnida. Maʌ̃ bẽrã idjia jara b̶ʌda ĩjã od̶aẽ́bʌrʌ idjab̶a cadjiruada od̶ibʌrʌ idjia maʌ̃ra quĩrãdoaẽ́a. 20 Bãrãba Ãcõrẽda igarad̶aped̶a dewara ãcõrẽ b̶eada ẽpẽnibʌrʌ, idjia bãrãra biẽ́ b̶ʌya. Mãwã bãrã careba b̶ad̶ada idjia quinibiya.–

21 Maʌ̃ne puruba jarasia:

–Dairãba dewara ãcõrẽ b̶eara ẽpẽnaẽ́a; ab̶abe Ãcõrẽdrʌ ẽpẽnia.–

22 Josueba wayacusa jarasia:

–Bãrãne b̶ʌa. Bãrãba wãrãneba jarabʌdaa Ãcõrẽdrʌ ẽpẽnida.–

Ãdjirãba jarasid̶aa:

–Mãẽ, mãwã wãrãneba jarabʌdaa.–

23 Maʌ̃ne Josueba jarasia:

–Mãwã b̶aibʌrʌ bãrã jʌwaba od̶a ãcõrẽ b̶eara isabe b̶atacuad̶aped̶a sod̶eba dadji israelerã Ãcõrẽda ẽpẽnadua.–

24 Puruba panusia:

–Dadji Ãcõrẽdrʌ ẽpẽnia; ab̶abe idjia jara b̶ʌdrʌ ĩjã od̶ia.–

25 Maʌ̃ ewarid̶e Siqueʌ̃ purud̶e Josuera israelerã ume bed̶ea b̶ʌsid̶aa ab̶a Ãcõrẽdrʌ ẽpẽnida. Maʌ̃be idjia leyda b̶ʌsia ãdjirãba ĩjã od̶amãrẽã. 26 Maʌ̃gʌra Josueba Ãcõrẽ ley cartad̶e b̶ʌsia. Maʌ̃be mõgara waib̶ʌada ʌ̃ta nũmʌsia encina bacuru edre Ãcõrẽ wua de caita. 27 Maʌ̃ne jũma israelerãa nãwã jarasia:

–Za b̶ʌ mõgarara b̶ʌbʌrʌa bãrãba Ãcõrẽ ẽpẽniana aped̶ad̶ara quĩrãnebad̶amãrẽã. Bãrãba Ãcõrẽda igarad̶ibʌrʌ naʌ̃ mõgaraba jũmarãa cawabiya bãrãba sewada osid̶ada.–

28 Mãwã jaraped̶a Josueba purura ãdjia edaped̶ad̶a ẽjũãza wãbisia.

29 Mãwãnacarea Nuʌ̃ warra Josue Ãcõrẽ nezocara 110 poa b̶asid̶e jaid̶asia. 30 Timnat-sera abadad̶e idjia edad̶a ẽjũãne israelerãba idjira tʌb̶arisid̶aa. Maʌ̃ ẽjũãra Epraiʌ̃ eyaid̶a b̶ʌ druad̶e b̶ʌa Gaa eya caita. 31 Josue zocai b̶asid̶e israelerãba Ãcõrẽra ẽpẽ panasid̶aa. Idji jaid̶ad̶acarea dji bororã idji ume panana zocai panasid̶ad̶e bid̶a ẽpẽ panasid̶aa. Maʌ̃ bororãba jũma unusid̶aa Ãcõrẽba israelerã itea od̶ada.

32 Israelerãba Jose querasi b̶ʌwʌrʌ Egiptod̶eba eneped̶ad̶ara Siqueʌ̃ne tʌb̶arisid̶aa.* Genesi 50:25; Exodo 13:19. Dji ẽjũãra Jacoboba Hamo warrarãa cien parata torrobari nẽdosia. Hamora Siqueʌ̃ zeza basía. Maʌ̃ ẽjũãra Josed̶eba yõped̶ad̶arãba edasid̶aa.

33 Aaroʌ̃ warra Eleaza sid̶a jaid̶asia. Idjira Epraiʌ̃ eyaid̶a b̶ʌ druad̶e tʌb̶arisid̶aa idji warra Pinéba eya zaque edad̶ad̶e.