1 Rubeʌ̃neba yõped̶ad̶aba, Gad̶eba yõped̶ad̶a bid̶a pacada, oveja sid̶a zocãrã eropanasid̶aa. Ãdjirãba cawasid̶aa Jazer ẽjũãra Gala ẽjũã sid̶a animarã daupẽni carea bia b̶ʌda. 2 Maʌ̃ bẽrã Moisemaa, sacerdote Eleazamaa, israelerã dji dromarãmaa bid̶a wãnaped̶a nãwã jarasid̶aa:

3-4 –Ãcõrẽba dadjirãa naʌ̃ puru b̶eada poyabisia: Atarot, Diboʌ̃, Jazer, Nimra, Hesboʌ̃, Eleale, Sebaʌ̃, Nebo, Beoʌ̃ sid̶a. Maʌ̃ ẽjũãra bio bia b̶ʌa animarã daupẽni carea. Dairãba animarãda zocãrã eropanʌa. 5 Maʌ̃ bẽrã dai quĩrã djuburia maʌ̃ ẽjũãra dairãa diad̶adua. Dairãra Jordaʌ̃ do wa quĩrãrã wãbirãnadua.–

6 Baribʌrʌ Moiseba panusia:

–Mãwãra dewararã nocod̶aa djõne wãbʌdad̶e ¿bãrãra nama panenica? 7 Bãrãda nama panesid̶ara ¿dewararã sid̶a Ãcõrẽba diad̶a ẽjũãnaa wãna ama panenaẽ́ca? 8 ¿Ara maʌ̃ quĩrãca bãrã drõã naẽnabemarãba osid̶aẽ́ca mʌ̃a ãdjirã Cadé-barnead̶eba Canaaʌ̃ drua acʌd̶e diabuesid̶e? 9 Jũma maʌ̃ drua pʌrrʌa acʌd̶aped̶a Escol jewed̶ad̶e jũẽne wãsid̶aa. Baribʌrʌ jẽda zed̶aped̶a ẽjũãra biẽ́ tab̶ʌad̶a asid̶aa, purura Ãcõrẽba dia b̶ʌ ẽjũãnaa wãrãnamãrẽã.* Numero 13:17-33. 10-11 Maʌ̃ carea Ãcõrẽra ãdjirã ume bio quĩrũsia. Maʌ̃ ewarid̶e idjia wãrãneba jarasia jũma Egiptod̶eba ẽdrʌped̶ad̶arã veinte poa ʌ̃taa b̶eaba sod̶eba ĩjãnaẽ́ bẽrã, idjia Abrahaʌ̃a, Isaa, Jacoboa bid̶a diai jarad̶a ẽjũãra ununaẽ́da. 12 Ab̶abe Jepone warra Calebʌrʌ idjab̶a Nuʌ̃ warra Josue bid̶a sod̶eba ĩjã panʌ bẽrã maʌ̃ ẽjũãra ununiana asia. (Jeponera cenezeo basía.) 13 Maʌ̃ ewarid̶e Ãcõrẽra dadji israelerã ume bio quĩrũna bẽrã, ẽjũã põãsa ewaraga b̶ʌd̶e cuarenta poa pʌrrʌabisia jũma maʌ̃ ẽberãrã Ãcõrẽ quĩrãpita biẽ́ oped̶ad̶a beubʌdamisa.† Numero 14:26-35. 14 ¿Id̶i bid̶a bãrã zezarãba cadjirua oped̶ad̶a quĩrãca o quĩrĩã panʌca? ¡Bãrã dji cadjirua obadarãba wetara Ãcõrẽra dadji israelerã ume quĩrũbid̶ia! 15 Bãrãba Ãcõrẽda igara pananibʌrʌ, idjia dadjirãra wad̶ibid̶a naʌ̃ ẽjũã põãsa ewaraga b̶ʌd̶e pʌrrʌabiya. Mãwã bãrãra bed̶ead̶e panania jũma dadjirã biẽ́ panebʌda carea.–

16 Dji ẽjũã iwid̶i panʌra Moisemaa caitaara wãnaped̶a jarasid̶aa:

–Dai boro, nama puru b̶eada o quĩrĩã panʌa dai wẽrãrã itea, dai warrarã itea bid̶a. Idjab̶a corra b̶eada o quĩrĩã panʌa dai animarã itea. 17-18 Maʌ̃be dairãra djõne wãni carea panania. Bãrã djõne wãbʌdad̶e dairãra bãrã na nĩbad̶ia idjab̶a djõnia ab̶a jũmarãba ẽjũã edabʌdad̶aa. Mãwã djõ panʌne dairãra jẽda dai ẽberãrãmaa zed̶aẽ́a. Baribʌrʌ dai wẽrãrãra, dai warrarã sid̶a nama puru mõgaraba aud̶u jũrã ca b̶ead̶e duanania naʌ̃ druad̶ebemarãba bearãnamãrẽã. 19 Dairãra djõne wãbʌdamĩna Jordaʌ̃ do quĩrãrẽbema ẽjũãra edad̶aẽ́a bãrã quĩrãca, ãtebʌrʌ dairãba edabʌda ẽjũãra nama b̶aya Jordaʌ̃ dod̶eba ʌ̃mãdau odjabariare.–

20-22 Moiseba ãdjirãa jarasia:

–Bãrãba wãrãda mãwã od̶ibʌrʌ naʌ̃ ẽjũãra edad̶ia. Baribʌrʌ Ãcõrẽba jara b̶ʌ quĩrãca djõni carea pananida panʌa. Jũma bãrã dji mẽsrã b̶eada Jordaʌ̃ do wa quĩrãrẽ wãnaped̶a djõnida panʌa ab̶a Ãcõrẽba dji quĩrũrã ãyã jʌretabʌrʌd̶aa. Jũma maʌ̃ drua Ãcõrẽ jʌwaed̶a b̶ed̶acareabʌrʌ bãrãra namaa jẽda zed̶ida panʌa. Ãcõrẽba bãrãa waabemarã itea obi b̶ʌra jũma osid̶ara Ãcõrẽba jara b̶ʌ quĩrãca naʌ̃ ẽjũãra bãrãne baya.

23 Baribʌrʌ mãwã od̶aẽ́bʌrʌ bio cawad̶adua Ãcõrẽ quĩrãpita cadjiruad̶e pananida. Maʌ̃ cadjirua carea Ãcõrẽba bãrãra wãrãda cawa oya. 24 Bãrã ẽberãrã itea puru b̶eada naʌ̃ druad̶e ocuad̶adua. Idjab̶a bãrã animarã itea corra b̶eada naʌ̃ druad̶e ocuad̶adua. Baribʌrʌ wãrãda djõni carea pananadua bãrãba jara panʌ quĩrãca.–

25 Maʌ̃be Gad̶eba yõped̶ad̶aba, Rubeʌ̃neba yõped̶ad̶a bid̶a panusid̶aa:

–Dai boro, dairãba jũma od̶ia bʌa jara b̶ʌ quĩrãca. 26 Naʌ̃ Gala druad̶e b̶ea purud̶e dai wẽrãrãra, dai warrarãra, dai animarã sid̶a b̶eed̶ia. 27 Baribʌrʌ dairãra djõne wãni carea panʌa. Ãcõrẽba jarabʌrʌd̶e dairãra Jordaʌ̃ do wa quĩrãrẽ djõne wãnia bʌa jara b̶ʌ quĩrãca.–

28 Maʌ̃be Moiseba sacerdote Eleazaa, Nuʌ̃ warra Josuéa, jũma Israeld̶eba yõped̶ad̶a puru bororãa bid̶a nãwã jarasia:

29 –Dadji israelerã Jordaʌ̃ do wa quĩrãrẽ djõne wãbʌdad̶e Gad̶eba yõped̶ad̶ara, Rubeʌ̃neba yõped̶ad̶a sid̶a Ãcõrẽba jara b̶ʌ quĩrãca wãnibʌrʌ, maʌ̃ drua poyaped̶ad̶acarea bãrãba ãdjirãa naʌ̃ Gala druara diad̶adua ãdjirãne bamãrẽã. 30 Baribʌrʌ bãrã ume Jordaʌ̃ do wa quĩrãrẽ djõne wãnaẽ́bʌrʌ, ãdjirãba ẽjũãda Canaaʌ̃ druad̶e edad̶ida panʌa bãrã quĩrãca.–

31 Gad̶eba yõped̶ad̶arãba, Rubeʌ̃neba yõped̶ad̶arã bid̶a jarasid̶aa:

–Dai boro, dairãba jũma od̶ia Ãcõrẽba jara b̶ʌ quĩrãca. 32 Dairãra Jordaʌ̃ do wa quĩrãrẽ Canaaʌ̃ druad̶aa djõne wãnia Ãcõrẽba jara b̶ʌ quĩrãca. Baribʌrʌ dairãba edabʌda ẽjũãra Jordaʌ̃ do namaarecare b̶aya.–

33 Maʌ̃be Moiseba Gad̶eba yõped̶ad̶arãa, Rubeʌ̃neba yõped̶ad̶arãa, idjab̶a ʌ̃cʌrʌ Jose warra Manased̶eba yõped̶ad̶arãa bid̶a amorreorã boro Sehoʌ̃ba erob̶ad̶a druara, Basaʌ̃nebema boro Ogba erob̶ad̶a drua sid̶a diasia. Jũma maʌ̃ druara, puru b̶ea sid̶a ãdjirãa diasia.

34 Maʌ̃ druad̶e Gad̶eba yõped̶ad̶arãba naʌ̃ puru b̶eada wayacusa osid̶aa: Diboʌ̃, Atarot, Aroer, 35 Atarot-sopaʌ̃, Jazer, Jogbeha, 36 Bet-nimra idjab̶a Bet-Araʌ̃. Jũma maʌ̃ puru b̶eara mõgaraba aud̶u jũrã casid̶aa. Idjab̶a corra b̶eada ãdjirã animarã itea osid̶aa.

37 Rubeʌ̃neba yõped̶ad̶arãba naʌ̃ puru b̶eada wayacusa osid̶aa: Hesboʌ̃, Eleale, Quiriataim, 38 Nebo, Baal-meoʌ̃, Sibmá sid̶a. Maʌ̃ puru b̶eara trʌ̃ awara b̶ʌsid̶aa.

39 Manase warra Maquid̶eba yõped̶ad̶arãda Gala druad̶aa wãnaped̶a amorreorã mama b̶eara poyad̶aped̶a ãyã jʌretasid̶aa. 40 Moiseba ãdjirãa maʌ̃ druara diad̶a bẽrã mama panesid̶aa. 41 Manased̶eba yõna Jaír sid̶a wãped̶a ʌ̃cʌrʌ puru zaquerãda poyasia. Maʌ̃ puru b̶eara idjia trʌ̃ b̶ʌsia Havot-Jaír. 42 Ara maʌ̃ quĩrãca Nobá abadada wãped̶a puru zaquerã Kenat druad̶e b̶eara poyasia. Mama idjia trʌ̃ b̶ʌsia Nobá.