1 Endakali dupa peaminopa Jisasa baa Olipimanda pea. 2 Yongama wamba utunya baa lotuu anda nee nyetae kamapu dokonya deaka ipao katea. Dokopa Israele tata dupa pitaka epeaminopa, baa pitipala dupa mana lamaiya. 3 Lamaiyoo peteamopa, enda mendeme kepo koleamopa endakali dupame kandao nyiami mende Mosesanya loo mana nyepaepi, Parasipi dupame laminao Jisasa petea dokonya ipupala, endakali kateami kaina dokonya katasiami. 4 Katasetala dupame Jisasa makande pyoo dapa lamaiyami: “Mana Lenge, enda dake kepo kolamupa kandao nyalamini-lamo. 5  Lep 20:10; Diut 22:22-24Mosesanya loo setapae dokome enda dopale dupa kaname pyao kumasalapape lapae singina, embame dokonya aipa lelyepe?” leami. 6 Jisasame kopeta mende latamopa baa-kisa tenge setamana latala baa makande pyoo dopa leami. Dopa leaminopa, Jisasame pii doko nasili pyoo baa pongatala, kingi kondeme yuunya pepa pia. 7 Pepa piamopa, Parasipi, Mosesanya loo mana nyepaepi, dupame Jisasa tipaka pyoo kateaminosa, baa toeya katapala dokaita lamaiyoo, “Nyakamanya mende koo napingi dokome wambao kana mende pyale lao enda dake pyalapa” lea. 8 Dopa latala baa dee pongatala yuunya pepa pia. 9 Dokopa Jisasanya pii dutupa sepala, dokaitanya moname nyakama koelyaminona leamosa, endakali angili dupa mendai-mendai lao wambao peaminopa, kole dupa watao peami. Pao etapeaminopa, enda doko iki Jisasa petea dosa katea. 10 Dokopa Jisasa toeya katapala enda doko iki kateamo kandatala baa lamaiyoo, “Emba-kisa tenge setalamino endakali dokaita anja pami? Mendeme emba-kisa tenge setapala pyao kumasalanya nakalyape?” lea. 11 Dokopa enda dokome lao pituu, “Akali Andake, mende nakalyamona” lea. Dopa leamopa Jisasame lao pituu, “Nambame apata emba yapala naelyona, emba pupala dee koo mende napipi” lea.

12  Matyu 5:14; Jone 9:5Dokopa Jisasame deaka dokaita lamaiyoo, “Yuu dake tii pisingi doko namba. Namba watao ipata endakali doko-kisa lete katenge tii pipae doko setamopa, iminjetae dokonya baa napaeyatana” lea. 13  Jone 5:31Dopa leamopa Parasi dupame baa lamaiyoo, “Emba dopalena lao emba tange lao panasilyino dokonya, embanya pii doko kiningina lao naimame nyala naelyamanona” leami. 14 Dokopa Jisasame dokaitanya pii yanu pyakamaiyoo, “Namba katao epeo yuu doko nyakamame masala naeyao, namba pelyo yuu doko nyakamame masala naeyaowaka pilyamino. Dopaka doko namba katao epeo yuu doko nambame kandao, namba pelyo yuu doko nambame kandaowaka pingi. Dokonya namba dopalena lao namba tange lapuli doko, kiningi lapuli. 15  Nyakamame endakali ketae kandao yapengema. Nambame endakali mende yapala naenge. 16  Namba iki nakalyo. Nambanya Takange, namba puu lea dokopa namba tole kalyambano. Tenge dokonya, nambame endakali mende yapapuli doko tolao yapapuli. 17  Diut 19:15Nyakamanya loo dupanya dapa lao pepa pyapae singi: ‘Endakali lapomame pii mendai dokoaka lao panelyambino doko, pii doko kiningina’ lapae singi. 18  Namba dopalena lao namba tange lao panasipupa, nambanya Takange, namba puu lea dokome apata namba dopalena lao, lao panasilyamoakana” lea. 19 Dokopa Parasi dupame baa lamaiyoo, “Embanya takange lelyeno doko anja kalyape?” leami. Dopa leaminopa Jisasame yanu pyao, “Nambapa, nambanya Takange dokopa nyakamame masala naengema. Namba akali doko-lamo lao nyakamame masimili doko, nambanya Takange doko apata masimiliakana” lea. 20 (Lotuu anda nee nyetae kamapu dokonya opaa pyandenge penge doko singi dosa katao, Jisasame pii dutupa mana lamaiyoo lea. Baanya gii doko naepea dokonya, pii dutupa leamopa endakali mendaipi mendeme baa anjalanya minala naeyami.)

21 Dokopa Jisasame deaka dokaita lamaiyoo, “Nambame nyakama yakinatala pelyo. Namba pelyo dokonya nyakama kapa pao naipatami. Nyakamame namba kutapala, nyakamanya koo dupanya nyakama kumatamina” lea. 22 Dokopa Juu dupame lao pituu, “ ‘Namba pelyo dokonya nyakama kapa pao naipatamina’ lelyamo doko, baa tange pyao kumasalanya lelyape?” leami. 23 Dopa leaminopa baame dokaita lamaiyoo, “Namba kaiti ulunya-tae. Namba isa yuu dakenya tange daa. Nyakama isa yuu dakenya-tae. Tenge dokonya nyakama isa yuu dakenya tange. 24  Namba akali doko-lamo lao nyakamame masala naeyatamino doko, nyakamanya koo dupanya nyakama kumatami. Tenge dokonya, nyakamanya koo dupanya nyakama kumatamina lao nambame langyona” lea. 25 Dopa leamopa dokaitame baa lamaiyoo, “Emba apipi?” leami. Dokopa Jisasame dokaita lamaiyoo, “Namba akali dokona lao tee pyao langio dokoaka namba. 26  Nyakama koelyaminona lao nambame yapao pii longo langipuliaka doko, namba puu lea Akali kiningi pii lenge dokome pii langiamopa sio dutupa iki, isa yuu dakenya endakali dupa nambame panao lamailyona” lea. 27 (Jisasame lea doko, Takange doko lao lelyamona lao dokaitame masala naeyami.) 28 Dokopa Jisasame dokaita lamaiyoo, “Nyakamame Akalinya Ikiningi doko minalyetaminopa, nyakamame namba akali doko-lamo lao kandatami. Nambame kalai pilyo dupa nambanya kyetome napinya, nambanya Takange dokome namba mana leali pyoo pii dutupa lea-lamo lao nyakamame kandatamiaka. 29  Namba puu lea Takange dokonya auu kaenge kalai dupa nambame koteaka lao pingi. Dopa pingi dokonya, baame namba iki kalyale lao yakinala naenge. Nalimba tole katengena” lea. 30 Pii dutupa leamopa endakali longome baa tungi piami.

31 Dokopa Jisasame baa tungi pilyamano leami Juu dupa lamaiyoo, “Nyakamame nambanya pii doko wata-minao katatamino doko, nyakama nambanya disaipolo angi katatami. 32  Dokopa nyakamame kiningi pii doko masetaminopa, kiningi pii dokome nyakama mokao nyetana” lea. 33  Matyu 3:9; Luku 3:8Dokopa dokaitame baanya pii yanu pyakamaiyoo, “Naima Abraamenya puu dokonya mandipae dupa paa mendaipi mende endakali mendenya kendemane nakatengena, kiningi pii dokome naima mokao nyetana lao embame lelyeno doko, aipa pyoo lelyepe?” leami.

34 Dopa leaminopa Jisasame yanu pyakamaiyoo, “Nambame nyakama etete kiningi langilyo: Endakali koo pingi dupa pitaka koonyaka kendemane katengema. 35  Kendemane mende baanya akali andake dokonya andaka etete nakatenge. Akali andake dokonya ikiningi doko andaka dokonya etete katenge. 36  Dopana, Ikiningi dokome nyakama mokao nyetamo doko, kiningi etete nyakama mokao nyepaeyaka katatami. 37  Nyakama Abraamenya puu dokonya mandipaena lao nambame masilyoaka doko, nambanya pii doko nyakama-kisa sepenge panda mende nasipya dokome, nyakamame namba pyao kumasepenge kaitini kutilyamino. 38  Nambanya Takange doko-pipa tole katao kandeo dokoaka lelyo. Dopaka pyoo, nyakamanya takange doko-pipa tole katao kandeamino dokoaka pilyaminona” lea.

39 Dokopa dokaitame baanya pii yanu pyakamaiyoo, “Naimanya takange doko Abraamena” leami. Dopa leaminopa Jisasame dokaita lamaiyoo, “Nyakama Abraamenya wane-pyali doko, Abraameme pia dupa nyakamame pimili. 40  Dopaka doko, nambame Gote-kisa kiningi pii sio dupa nyakama langipupa, indupa nyakamame namba pyao kumasepenge kaitini kutilyamino. Nyakamame pilyamino doko Abraameme napia. 41  Nyakamanya takange dokome pingi dupaka nyakamame pilyaminona” lea. Dokopa dokaitame baa lamaiyoo, “Naima mandinya nepatae mendapu nakalyamano. Naimanya Takange mendai iki doko Gotena” leami. 42 Dokopa Jisasame dokaita lamaiyoo, “Namba Gote-kisa katao ipupala yuu dakenya kalyo. Namba tangeme masoo naepeo. Baame namba puu leamopa epeo. Gote nyakamanya Takange-pyali doko, nyakamame namba auu kaeyamili. 43  Nambame pii lelyo doko aipuma nyakamame soo nanyilyami? Nambanya pii doko nasimi dokome, nyakamame kapa pao tenge doko soo nyala naelyamino. 44  Nyakamanya takange doko Satane. Baa sambo piinya takange dokonyana, baa-kisa sambo pii iki singi. Baame pii lelyamo dokopa, sambo pii iki lenge. Tee pia dokonya pituu, baame endakali pyao kumasia. Baa-kisa kiningi pii doko nasingi dokonyana, baa kiningi pii dokonya nakatenge. Nyakamanya takange Satane dokome pingili pyoo nyakamame pimu laka lao masilyamino. 45  Tenge dokonya, nambame kiningi pii doko langipupa, kiningi lelyenona lao nyakamame masala naelyamino. 46  Nambame koo mende pipina lao nyakamanya mendeme lao tata latepe? Nambame kiningi pii lenge-tamo doko, aipuma kiningi lelyenona lao nyakamame masala naelyami? 47  Endakali Gote tata dupame Gotenya pii dupa singima. Nyakama Gote tata nakalyamino dokonya, baanya pii dupa nasilyaminona” lea.

48 Dokopa Juu dupame Jisasanya pii yanu pyakamaiyoo, “Naimame emba Samaria tangena lelyamano dokopa, emba-kisa imambu koo mende palelyamona lelyamano dokopa, dolapo kopeta lelyamape?” leami. 49 Dopa leaminopa Jisasame yanu pyao, “Namba-kisa imambu koo mende napalelyamo. Nambanya Takange doko anda-anda semaiyoo katapupa, nyakamame namba anda-anda singyala naelyamino. 50  Namba tange kenge andake nyalanya kaitini kutao nakalyo. Akali mendeme namba kenge andake dyaanya pilyamo dokome endakali dupa tolao yapenge. 51  Nambame nyakama etete kiningi langilyo: Endakali mendeme nambanya pii doko wata-minatamo doko, baa tanga-tangapi kumingi doko nakandatana” lea. 52-53 Dopa leamopa Juu dupame baa lamaiyoo, “Abraamepi, propetapi dupa kumiami-pyaa. Dopaka doko, endakali mendeme embanya pii doko wata-minatamo doko, baa tanga-tangapi kumingi doko nakandatana lelyeno doko, embame naimanya takange Abraamepi, propetapi kumiami dupa ita minao kalyepe? Indupa naimame emba-kisa imambu koo mende palelyamo lao kandelyamanona, emba tange apina lelyepe?” leami. 54 Dopa leaminopa Jisasame yanu pyao, “Namba tange kenge andake nyoto doko, angi mende nanjeta. Nambanya Takange dokome namba kenge andake dingi. Baa lao nyakamame lao pituu, ‘Naimanya Gote dokona’ lengema. 55  Nyakamame baa nakandengema. Dopaka doko, nambame baa kandenge. Nambame baa nakandengena lapuli doko, namba sambo lenge nyakama-yale jipuli. Dopaka doko, nambame baa kandenge dokonyana, baanya pii doko nambame wata-miningi. 56  Nyakamanya takange Abraameme nambanya gii doko kandatona lao eteke pia. Baame gii doko kandatala auu kaeyana” lea. 57 Dopa leamopa Juu dupame baa lamaiyoo, “Emba ee kana 50 latala naelyamo doko, embame aipa petala Abraame kandeepe?” leami. 58 Dokopa Jisasame dokaita lamaiyoo, “Nambame nyakama etete kiningi langilyo: Abraame manja naengesa, namba wamba-waka kateo dokoaka katengena” lea. 59 Dopa leamosa Juu dupame baa pyalanya kana nyiaminopa, Jisasa baa yalo pyoo, dokaitanya kaina dupanya-kaita lotuu anda nee nyetae kamapu doko yakinatala pea.