1 Maitakao Kamongome akali 70 makande latala, lapo-lapo lao taonopi, yuu baa patoo lao masiapi, dupa pitakanya wambao pena lea. 2  Matyu 9:37-38Pena latala baame dokaita lamaiyoo, “Nee longo wambu petamupa, kalai akali kuki kalyamino. Dopana, nee mandyoo mau pyapenge kalai akali mendapu peena lao, ee tange Kamongo doko kyeto joo loma salapape. 3  Matyu 10:16Nyakama sipisipi ŋaŋa jepae dupa nambame yana kapu dupanya kainanya pupa lelyona pupape. 4  Matyu 10:7-14; Make 6:8-11; Luku 9:3-5Nyakamame kaita paanya, munipi, nokainapi, moko peepi mende nyoo napupape. Endakali mende kaitinisa kandanyetala pii lamaiyoo lasa nalalapape. 5  Nyakama anda mendenya kolandatami dokopa wambao lao pituu, ‘Mona yaepenge doko andaka dakenya sina’ lao lamaiyepape. 6  Mona yaepenge dokonya ikiningi mende andaka dokonya pititamo doko, nyakamanya mona yaepenge pii epe lamaitami doko baa-kisa seta. Mona yaepenge dokonya ikiningi mende napititamo doko, mona yaepenge pii epe lamaitami doko nyakama-kisa pilyeta. 7  1 Kor 9:14; 1 Tim 5:18Nyakama anda lyaa dii laa naenya, lanyetami andaka dokonya iki kalyepape. Akali kalai pita dokome yole nyepengena, endakali dupame nyakama nee endakipi dupa ditamili pyoo nao kalyepape. 8  Taono mendenya pataminopa nyakama lanyiami-kandeno doko, endakali dokaitame nee mokosoo ditamili pyoo nalapape. 9  Yuu dokonya endakali yaina pyapae dupa nyakamame mee jakamaiyepape. Dopa petala dokaita lamaiyoo, ‘Gotenya kingdom doko nyakama-kisa tengesa ipatelyamona’ lapape. 10  Nyakama taono mendenya pataminopa, endakali dupame nyakama lanyala naeyami-kandeno doko, nyakama taono dokonya kaitini dupanya pupala dapa lapape: 11  Ap 13:51‘Nyakamanya taono dakenya-tae naimanya mokonya yuu katapya dupa kunao nepelyamano dokome, nyakama-kisa tenge silyamona lao panasilyamano. Dopaka doko, pii dake auu pyoo masalapape: Gotenya kingdom doko nyakama-kisa tengesa ipatelyamona’ lapape. 12  Jen 19:24-28; Matyu 10:15; 11:24Goteme endakali dupa yapatamo gii dokopa Sodomo tange dupa tanda andake maitaka doko, nyakamanya mokonya yuu kunao nepatami taono dokonya tange dupa tanda eteteaka andake maitana lao nambame nyakama langilyona” lea.

13  Matyu 11:20-23 Ais 23:1-18; Esek 26:1–28:26; Joele 3:4-8; Emosa 1:9-10; Sak 9:2-4“Korasina tange dupa nyakama koeyatami. Betsaida tange dupa nyakama koeyatamiaka. Nyakamanya taono dupanya mirakolo pio dupa Taeyapa, Saidonepa dolaponya pioli doko, siti dolaponya tange dupame yonge pee meme itimi wasepae dupa pyoo, kenai dupa aiyombanya pyasetala, isa pitipala, wamba mona kapilyiamili. 14  Goteme endakali dupa yapatamo gii dokopa Taeyapa, Saidonepa tange dupa tanda andake maitaka doko, Goteme nyakama tanda eteteaka andake dita. 15  Ais 14:13-15Nyakama Kapename tange dupa Goteme kaiti-kisa lanyoo patana lao masilyaminoaka doko, baame nyakama watao endakali kumapae dupa katengema panda dokonya pyandatana” lea.

16  Matyu 10:40; Make 9:37; Luku 9:48; Jone 13:20Dopa latala baanya disaipolo dupa lamaiyoo, “Endakali mendeme nyakamanya pii silya dokome, nambanya pii doko silyamosaka pingi. Endakali mendeme nyakama maita dilya dokome, namba maita dilyamosaka pingi. Dopa pilya dokome, namba puu lea Akali doko maita mailyamosaka pingina” lea.

17 Akali 70 dutupa eteke pyao pilyetala lao pituu, “Kamongo, embanya kenge doko naimame leamanopa, imambu koo dupame apata naimanya pii sepala, leamali piamina” leami. 18 Dokopa baame dokaita lamaiyoo, “Nambame Satane doko yuu-wapaka pili lao kaiti-kisa katao isa pyakeamo kandeo. 19  Sam 91:13Salapape! Nyakamame nene koopi, kanopatopi dupa-kisa moko katao, nyakamanya yandapipi dokonya pupu lapae dupa pitaka ita minao pitaminopa lao nambame nyakama kyeto dilyo. Dopana, dopale mendeme nyakama koeyasala naeyata. 20  Dopaka doko, imambu koo dupame nyakamanya pii dupa sekelyaminona lao eteke pyala naeyalapape. Nyakamanya kenge dupa kaiti-kisa pepa pyapae silyamo dokonya eteke pyalapape” lea.

21  Matyu 11:25-27Gii dokopaka Spirita dokome Jisasanya mona yaepasiamopa, baame lao pituu, “Apane, emba yuupi, kaitipi dupa pitakanya Kamongo. Mana longo kandenge endakalipi, mana longo nyepaepi, dupame dapale dupa nakandena lao yalo petala, wane koo joo katenge endakali dupame kandena lao embame panasiino dokonya nambame emba yaka pilyino lelyo. Apane, kiningi embame pitona lao auu kaengeme masiinoli pyoo piina” lea. 22  Jone 3:35; 10:15Dopa latala baanya disaipolo dupa enomba maitala dokaita lamaiyoo, “Nambanya Takange dokome dupa pitaka namba-kisa setea. Endakali mendeme Ikiningi doko apipi lao masala naenge. Takange dokome iki masingi. Endakali mendeme Takange doko apipi lao masala naengeaka. Ikiningi dokome iki masingi. Takange doko endakali mendeme masina lao Ikiningi dokome masetala panasilyamopa, endakali dokome Takange doko masingiakana” lea.

23  Matyu 13:16-17Dopa latala baanya disaipolo dupa enomba maitala elyakalao dokaita lamaiyoo, “Nyakamame kandelyamino dupa endakali mendeme kandatamo doko, baa Goteme auu pisetae. 24  Nyakamame kandelyamino dupa, propetapi, kiŋipi, longo mendapuame kandamu laka lao masiamiaka doko, angi nakandeami. Pii nyakamame silyamino dupa simu laka lao masiamiaka doko, angi nasiamina lao nambame nyakama langilyona” lea.

25  Matyu 22:34-40; Make 12:28-34Dokopa looya mendeme toeya katapala Jisasa makande pyoo, “Mana Lenge, lete etete katenge doko nambame aipa petala nyotope?” lea. 26 Dokopa Jisasame baa lamaiyoo, “Mosesanya loo dupanya aipa lao pepa pyapae silya? Tenge aipale mende dokonya silyamopa embame itaki pyao kandengepe?” lea. 27  Lep 19:18; Diut 6:5Dopa leamopa baame yanu pyao, “Embanya monapi, embanya imambupi, embanya kyetopi, embanya masingipi, dutupa pitakame embanya Kamongo Gote doko auu kaeyape. Emba tange auu kaengeli pyoo, embanya patali maki dupa auu kaeyape lapae silyamona” lea. 28  Lep 18:5Dokopa Jisasame baa lamaiyoo, “Pii doko tolao yanu pilyinona, embame dopaka pyoo katateno doko, emba lete katatena” lea.

29 Dopa leamo sepala, akali dokome baa tange tolataepe lao sotoo latala Jisasa lamaiyoo, “Nambanya patali maki dupa apitupape?” lea. 30 Dokopa Jisasame yanu pyao, “Akali mende Jerusalema katao, Jeriko paanya lanao pea. Peamopa pake nenge mendapuame kaitinisa kandanyetala, baanya yonge pee dupa lyokao nyepala, baa pyao indyepala, kumapenge joo sina latala peami. 31  Dopa petala pateaminopa, prisa mende kaitini dokonya lanao ipupala, akali pyapae sia doko kandatala, baa lemba pyatala pea. 32  Pateamopa akali Lipai mende panda dokonya ipupala, akali pyapae sia doko kandatala, dopaka pyoo baa lemba pyatala pea. 33  2 Kron 28:15Pateamopa akali Samaria tange mende kaitini dokonya epea dokome akali pyapae sia doko kandatala kondo kaeya. 34  Kondo kaeyapala akali pyapae sia dosa pupala, welepi, waenepi dupame pyapae dupanya kai latala yaki pyakamaiya. Dopa petala, baanya dongi maita dokonya akali doko setapala, mandyoo endakali opone palenge anda mendenya pao setapala isoo katea. 35  Yuu gii mende dokonya baa paanya pituu, anda isoo katenge doko baame silipa muni lapoma maitala baa lamaiyoo, ‘Embame akali dake isoo katape. Namba pilyoto dokopa, embanya muni wakao akali dake-kisa nepate dutupa yanu pyakatona’ lea. 36  Dopana, embame aipa lao masilyi? Pake nenge dupame kandanyetala pyanya seteami doko, akali tepoma epeami dutupanya andukumi baanya patali maki joo nisia-lumu lao masilyipi?” lea. 37 Dokopa looya dokome lao pituu, “Akali kondo kaeyapala nisia-lumu dokona” lea. Dopa leamopa Jisasame baa lamaiyoo, “Emba pupala dopaka pipi” lea.

38  Jone 11:1Jisasa baanya disaipolo dupa-pipa kaitini pao, yuu yakane mendenya pyakameaminopa, enda Mata lenge mendeme Jisasa baanya andaka epena lao andiki pyoo lanyia. 39 Lanyoo ipateamopa, Mata kakingi Maria lenge doko Jisasanya moko setea dosa pitipala, baanya pii lea doko soo petea. 40 Pii soo peteamopa, Matame nee akipi depa lao kalai longo piamosa, baa mona lombea. Dokopa Jisasa petea dosa Mata pupala baa lamaiyoo, “Kamongo, nambame iki nee depa laale latala, nambanya kakingi dokome namba yakinelyamo doko embame nakandelyepe? Namba nisina lamai” lea. 41 Dopa leamopa Jisasame baanya pii yanu pyakamaiyoo, “Mata, Mata, embame dopale longo dupa nee kaeyao masepae longo nyilyino. 42  Dopaka doko, mendai iki mende nee kaeyapenge jilyamo. Mariame epe mende yapao nyepala pilyamo doko mendeme nyoo nepakamaiya naeyatana” lea.