1  Matyu 21:1-11; Luku 19:28-40; Jone 12:12-19Dokaita pao Jerusalema tengesa, Olipimanda dokonya taono Betepasapa, Betaniapa dolaponya pyakalyetala, Jisasame baanya disaipolo lapoma wambao pena lea. 2 Pena latala dolapo lamaiyoo, “Yuu yakane nyakambanya enombatena silyamo dokonya pupa. Pao pyakamalu pitambinopa, dongi ŋaŋa, wamba endakali mende napetenge mende anjetae katatamopa kanjambinona, doko tata lao minao ipupape. 3  Endakali mendeme nyakamba langyoo, ‘Aipuma dopa pilyambipi?’ lea-kandeno dokopa, nyakambame lao pituu, ‘Kamongome kalai mende dongi dakeme pipenge jilyamona’ lapape. Dopa latambinopa, dongi doko minao ae yapa ipupale lao baame kaeyalapomona” lea. 4 Dopa lateamopa dolapo pupala, dongi ŋaŋa doko kaitini lembanya anda kambu mendenya kamaka anjetae kateamo kandatala tata leambi. 5 Tata leambinopa endakali dosa kateami dupanya mendapuame dolapo lamaiyoo, “Nyakambame dongi ŋaŋa doko aipuma tata lelyambipi?” leami. 6 Dopa leaminopa, Jisasame lamaina leali pyoo dokaita lamaiyambinopa, nyoo pena kaeyami. 7 Dokopa akali dolapome dongi ŋaŋa doko minao Jisasa katea dokonya ipupala, dolaponya yonge pee kisa pingi dolapo lyokanya dongi ŋaŋa dokonya maitanya setapeambinopa, Jisasa dokonya ketae petea. 8 Pituu peamopa, endakali longome nyakamanya yonge pee kisa pingi dupa kaitini dokonya kuiyami. Yangi dupame ita wangya, yoko longo katenge dupa kepao nyepala kaitini dokonya kuiyamiaka. 9  Sam 118:25-26Dokopa endakali dupa wambata maita pyata pyoo pao pituu, puu lao wii lao, “Gote mambo pilyamano! Kamongonya kengenya epelyamo akali dake Goteme auu pisetae! 10 Kamongonya kengenya, naimanya yumbange Dapitanya kingdom epelyamo dake Goteme auu pisetae. Etete ketae kaiti-kisa katenge Gote doko mambo pilyamanona” leami. 11 Dopa leaminopa Jisasa Jerusalema pupala, lotuu anda nee nyetae kamapu dokonya pyakamea. Pyakamatala dokonya sia dupa pitaka lengeme kandao aowali lao kateamopa niki landa pianya, baa 12 disaipolo dutupa-pipa taono Betani dokonya peami.

12  Matyu 21:18-19Yuu gii mende dokonya, dokaita Betani yakinatala epeaminopa, Jisasa baa lopo kaeya. 13 Dokopa piki ita mende yoko pyoo omosale kateamo baame kandatala, dii lyilyape lao kanja pea. Pupala kandeamopa, piki dii nalyingi gii dokonyana, ita doko dii nalyoo yoko iki pyoo katea. 14 Dokopa Jisasame piki ita doko lamaiyoo, “Tanga-tangapi endakali mendeme embanya dii mende lyao nanatana” lea. Pii doko disaipolo dupame siami.

15  Matyu 21:12-17; Luku 19:45-48; Jone 2:13-22Dokaita Jerusalema pupala, Jisasa baa lotuu anda nee nyetae kamapu dokonya pyakamatala, maketa setao kateamipi, sambao kateamipi, dupa tee pyao watao pia. Dopa petala, muni aloo pingima dupanya tokopi, yaka maiyolee maketa setao petengema dupanya tokopi, dupa minatala kapilyia. 16 Dopa petala endakali mendeme oapi mende soo, lotuu anda nee nyetae kamapu dokonya-kaita poko napina lao daa lea. 17  Ais 56:7; Jer 7:11Dopa latala baame dokaita mana lamaiyoo, “ ‘Nambanya anda doko akali tata dupa pitakanya loma singi anda latamina’ lao pepa pyapae nasilyape? Dopaka doko, nyakamame nambanya anda doko pake nenge dupanya yalo pingi panda jetelyaminona” lea. 18 Endakali kambu kateami dupa pitakame mana leamo doko sepala walu lao paka kaeyami. Tenge dokonya, Mosesanya loo mana nyepaepi, prisa mupapi, dupame Jisasa paka kaeyapala, baa aipa petala pyao kumasemape lao kaitini kutiami. 19 Yuu kuiyala peamopa, Jisasa baa siti doko yakinatala pea.

20  Matyu 21:20-22Yongama wamba, kaita dokonya pao pituu kandeaminopa, piki ita doko tengenya pituu sapuu pao, mangenya tuu latae katea. 21 Dokopa Jisasame pii lea doko Pitame masetala baa lamaiyoo, “Mana Lenge, embame piki ita dake koena lapino doko sapupya-lamo kanda” lea. 22 Dopa leamopa Jisasame dokaita lamaiyoo, “Nyakamame Gote tungi pyalapape. 23  Matyu 17:20; 1 Kor 13:2Nambame nyakama kiningi langilyo: Endakali mende mona lapo palya naenya, baanya pii latamoli pyoo kiningi pyaapomona lao masetala, yuu manda dake lamaiyoo, ‘Emba sakatatala, solowatanya pyakala puu’ latamopa, kiningi lataliaka pita. 24  Dopana, nambame nyakama dapa langilyo: Dopale mende dina lao nyakamame loma setami dupa pitaka nyepelyamanona lao masalapape. Dokopa dopale mende nyetami doko nyakamanya jeta. 25  Matyu 6:14-15Nyakamame loma soo katao, endakali mende imbu kaelyona lao masepae epea-kandeno doko, nyakamanya Takange kaiti-kisa katenge dokome nyakamanya koo dupa kame sekena lao, endakali dokonya koo dupa nyakamame kameaka sakamaiyepape. 26  Dopaka doko, nyakamame endakali dokonya koo dupa kame sakamaiya naeyatamino doko, nyakamanya Takange kaiti-kisa katenge dokome nyakamanya koo dupa kame sakala naeyatakana” lea.

27-28  Matyu 21:23-27; Luku 20:1-8Dokaita Jerusalema deaka ipupala, Jisasa baa lotuu anda nee nyetae kamapu dokonya paeya. Dokopa, prisa mupapi, Mosesanya loo mana nyepaepi, Juumanya isingi akalipi, dupa ipupala baa tipa pyoo, “Embame kalai pilyino datupa kyeto aipale mendeme pilyi? Kyeto doko apimi emba ditala pii lamupa pilyipi?” leami. 29 Dokopa Jisasame dokaitanya pii yanu pyakamaiyoo, “Nambame nyakama tipa mende pitoakana, nyakamame yanu pyakalapape. Yanu pyakatamino doko, nambame kalai datupa kyeto dopale mendeme pilyona lao nyakama langitoo. 30  Joneme kaimbu piamo doko, kaiti-kisa katao Goteme pina leape, pande endakalimi pina leami? Nyakamame nambanya pii doko yanu pyakalapa” lea. 31 Dokopa dokaitame nyakama-lapo laloo pyoo, “ ‘Kaiti-kisa katao Goteme pina leana’ latamano doko, baame lao pituu, ‘Aipuma nyakamame Jonenya pii doko kiningina lao masala naeyamipi?’ laapomo. 32 Dopaka doko, endakalimi pina leamina lamape?” leami. Endakali dupa pitakame Jone baa kiningi propetana lao masingima dokonya, endakalimi pina leamina laanya paka kaeyami. 33 Paka kaeyapala dokaitame Jisasanya pii yanu pyakamaiyoo, “Naimame masala naelyamanona” leami. Dopa leaminopa Jisasame dokaita lamaiyoo, “Nambame kalai pilyo datupa kyeto dopale mendeme pilyona lao nyakama langya naeyatoakana” lea.