1 Majoya mecajjeahua nei Eyacuiñajji nijje emimijji etii cuana, Jodioja edejja tii cuana, Moisesija etehueꞌyo huohuijji poani, pea Jodio etii ejjachichaqui nequi cuana peaꞌai, 71 huisome jjachichaquinaje. Ojee jjachichaqui majje miminaje Jesosa quecuaꞌyojji: —¿Achajja amajje acuae seya Jesosa quecua meejeꞌyo soꞌo? —acanaje oya cuaa.

Jamajjeya Jesosa me jeyo majje dojo canaje Shomano meshi mese Pinato bajjani yasijje. 2 Jesosa ba majje Pinatohua huohuiꞌajja canaje jama baꞌa: —¿Aꞌya cuae mi soꞌo? ¿Aꞌa miya Jodioja Emeshi Mese nei poajeꞌyo?

—Eꞌe, joya ecua miyaya aña jamaya epoꞌyojji eya —Jesosaa sajaꞌa canaje.

3 Eyacuiñajji nijje emimijji etii cuaa quea huiso siajje acanaje Pinato Jesosajo. Jamatii Jesosaa sajaꞌa jjima acanaje. 4 Jamajjeya Pinatohua oya huohuiꞌajja canaje: —¿Yajjajje acuae mi mi jjasajaꞌaquiani soꞌo? ¿Aꞌa jje shajjaꞌajja jjima ojaya esohui mijo? Quea huiso nee miya niñeba cani Jodio etii cuaa.

5 Jesosa mimishiꞌama. Jamajjeya siajjepojji cuana o niñebajji sajaꞌa jjima acanaje. Jjasajaꞌaqui ajja nei nei ba majje Pinatohua niñeba caꞌyonaje: —¿Yajjajje acuae Jesosa mi jjasajaꞌaquiani soꞌo, de? —poanaje Pinato.

6 Majoya Pinatohua niñeba caꞌyonaje jama baꞌa: —Jjeya nei Jodio cuana ojee ijjiaꞌijjiani esohuidojojjiya yahuajo nei ojaya etiiquianaja bacua cuana cuiaꞌyo jjima shejo. Ojjaña shequiaja jiquio shejo eyaya oe Jodio dejja ejeanobiajaa huoojeacuayajeajeꞌyo, ma Jodio cuaa sa cani, Jodio quea bihui epojji. Jamajjeya jiquio shejo eꞌe pojjaꞌa eyaya Jesosa pichojea meejeꞌyo, jjeyahua nei. 7 Pea yani, Mashamaꞌ bajjani, Shomano meshi mese quecua panajji epo. Oya dejja tai, ejeanobiajaa ona quecuaꞌyojji cuana nijje. Eꞌe pojjaꞌa eyaya Mashamaꞌ huoojeacuayajea meejeꞌyo —jamaya Pinato jjashahuabaquinaje.

8 Jjeyahua nei Jodio dejja cuana Pinato que poeyanaje. Huohui canaje jama baꞌa: —Emeshi mese Pinato, ¡jjeyahua nei huoojeacuayajeaꞌyocue oe Jodio dejja, ecuana quea bihui nee epojji! —poanaje.

9 Pinato jama poanaje baꞌa: —Eꞌe, jjeyahua nei eyaya pichojeajeꞌyo oe Jodio dejja. ¿Ache acuae jja oe pichojeajeꞌyo soꞌo? Eꞌe pojjaꞌa eyaya Jodio cuanaja Emeshi Mese nei Jesosa bajjani pichojeajeꞌyo. ¿Aꞌa eꞌe? —poanaje Pinato.

10 Pinatoja eba poanaje Jodio etii quea quene nee poani pea cuaa Jesosa nijje jjapeequi majje Jodio etiiquianaja esohui pajea cani. Jamajjeya Jesosa iña mee canaje equecuajeaꞌyojji, Jodio etiiquiaa. Jamajjeya Pinatohua Jesosa pichojea mee sa acanaje. 11 Jamatii Eyacuiñajji nijje emimijji etiiya ojjaña Jodio ejjachichaqui nequi taaa mee canaje: —¡Mashamaꞌ oe huoojeacuayajeaꞌyocue! ¡Jesosa aꞌa pichojeaꞌyojji! —taaame poanaje.

12 —Jamajjeya ¿yajja acuae oe eyaya Jesosa Quito aje soꞌo, Jodio cuanaja Emeshi Mese nei ca pa coma? —Pinatohua huohuiꞌajja canaje.

13 Jama taaame poanaje baꞌa: —¡Oya me cacajea meecue oe, acui ecueataꞌapeejo! ¡Acui cueataꞌapeejo baꞌehuanasohuajea meecue oe emanoꞌyojji! —taaa neineinaje cuana.

14 —¿Yajjajo acuae oya quecuajeꞌyo soꞌo? Oya mimishiꞌama. ¿Apiojji acuaeya jjaya quecuaꞌyo sa aña Jesosa? —Pinatohua huohuiꞌajja canaje.

Jamatii taaa majamaja canaje Jodio cuana: —¡Jesosa oe me cacajea meecue oe; acui ecueataꞌapeejo baꞌehuanasohuajea meecue Jesosa, de! —jama taaameya poa Jodio etii cuana.

15 Jamajjeya Pinatohua ohua sa cajo Mashamaꞌ huoojeacuayajea mee caꞌyonaje. Jesosa ca ca huoojea canaje cuiasejjajea majje me cacajeaa emanoꞌyojji.

16 Jamajoya emeshi meseja sohuinano cuaa Jesosa dojo canaje emeshi mese chacochacoañani equi dojjo huasijje. Ojjaña sohuinano Jesosa que jjachichaquinaje. 17 Jesosaja daqui oshe huijjiajea mee majje daqui huoꞌo nei huosho mee canaje emeshi mese nisho epojji. Acuisha sipi majje sapahuahuo iya canaje, emeshi mese jayojja nisho epojji. 18 Majoya ecuiꞌoshajjajo nequinaje ojjaña, Jesosa bihuiajji nisho. Jama bihuia nishome acanaje baꞌa: —¡Miya Jodioja emeshi mese quea caꞌa nee! ¡Baꞌe tiitiiꞌyocue! —sajea nisho canaje cuaa Jesosa. 19 Majoya oya sapa cuiapeꞌejea canaje acuiya. Cuia huichaꞌa huichaꞌa canaje. Jesosa cuichojea huichaꞌa huichaꞌa canaje oja yami yasijje. Ecuiꞌoshajjajo nequiya bihuia nisho canaje cuaa. 20 Ojo soa neineiꞌyo majje daqui huoꞌo nei huijjiajeajea canaje; ojaya daqui quia ca oꞌoyanaje. Majoya Jesosa quea huesha dojo canaje me cacajeaa, baꞌehuanasohuajeaa peaꞌai, sohuinano cuaa.

21 Jenosanenajo aniya sohuinanohua Jesosa dojo caje, ba cajjequinaje pea dejja Simoni bajjani, Simoni Sinene meshijo baꞌe poeꞌyo; oya Anejanoja ejeajji, oja chahua Shopoja ejeajji. Jamajjeya sohuinano cuaa Simoni acui ecueataꞌapee quea biquie dojo mee canaje Jesosa baꞌehuanasohuajeajji. 22 Jamaya oya poquinaje eyiyo bajjani Jonijota eyiyo huasijje, Ese Ejjaja esohuijo Esapa Jjii anijji bajjani yasijje. 23 Esapa Jjii anijji eyiyo huasijje jaasohuaquinaje cuana. Bañaqui majje Jesosa ishi meeꞌajja canaje cuaa acuijjajja na quea sese, pasejo ꞌia jayojja. Ishi meeꞌajja canaje quecua caꞌyajje neeꞌama epojji. Sio majje ishi jjima acanaje Jesosaa. 24 Majoya me cacajea caꞌyonaje; baꞌehuansohuajea caꞌyonaje daquimaꞌ. Baꞌehuanasohuajeyo majje oja daqui cuana chicha caꞌyonaje sohuinano cuaa. Iyachichaꞌyo majje, onaaya hueꞌe nisho majje daqui majjo caꞌyonaje ojaya pojji epoꞌyojji.

25 Eshequi poe pishanajo, onaaya Jesosa acui ecueataꞌapeejo baꞌehuanasohuajea canaje. 26 Etehueꞌyo o baꞌe sapa biajje oja bajjani caca canaje, Jesosa bajjani, oya apiojji me cacajea caꞌyonaje huohui epoꞌyojji. Etehueꞌyo jama poa baꞌa: OYA JESOSA JODIOJA EMESHI MESE EPOꞌYOJJI

27 Jesosa baꞌe pejjejo beca siipojji pea acui ecueataꞌapee cuanajo baꞌe huanasohuajea peaꞌai caꞌyonaje, Jesosaja ebianei mijijje, pea shani mijijje. 28 Eꞌe, Eyacuiñajjija esohui huohuijjija etehueꞌyo yahuajo nei nei jayojja jama, jamaya acanaje baꞌa: “Ojjaña cuana jjashahuabaquije jamaya: —Oya dejja mimishi nijje nequinaje”. Yahuajo nei nei jamaya poa.

29 Pea dejja cuana ejiojjijje poquianiya Jesosa ba majje esapa jeacajjacajja canaje, soa huisahuisa nequinaje. Jama mimijajime poanaje baꞌa: —¿Aꞌa cuae oe miyaya Eyacuiñajjija mei equi iñajeabichajeaꞌyo majje pea equi iyaje oꞌoya soꞌo, pea beca peejjima cahuime? ¡Baꞌajja socue! 30 Ache baꞌajja; miya Eyacuiñajjija Bacua Ejja nei jjabaqui majje ca oe ¡acui ecueataꞌapeejo baꞌe nequioqueꞌajjaꞌyo socue, emanoꞌyojji pojjeama! —poanaje cuana.

31 Moisesija etehueꞌyo huohuijji, Eyacuiñajji nijje emimijji etii peaꞌai ojo soa neineinaje. Ojee mimimiminaje jama baꞌa: —¿Aꞌa Jesosa ojjaña jaahuanajji epoꞌyojji? Chojja, ona nahuejji pojjeama. Oya ca ca oma nequioqueꞌyo ajja, de —poanaje.

32 Jesosa niñeba canaje peaꞌai: —¿Aꞌa cuae jja oe miya Jodioja Emeshi Mese nei poajeꞌyo? ¡Jjabaꞌajjaqui socue! Miya Eyacuiñajjija huoojeaꞌyo ojjaña jaahuanajji jjabaqui majje ¡acui ecueataꞌapeejo baꞌe ca oe nequioqueꞌajjaꞌyo socue jjeyahua nei, ecuanaja ebajji! Ba majje ecuaaya: “Miya eꞌe jojo nei Eyacuiñajjija Bacua Ejja poanaje” ajeꞌyo.

Siipojji cuaa ma o pejjejo ebaꞌehuanasohuajea baꞌeya peaꞌai Jesosa jamaya niñebame acanaje quea huiso nee.

33 Majoya eshequi biacojjajja nequijo shequimaꞌ jayojja poanaje; quea misi nee poanaje ojjaña meshi yasijje. Quijje sinecua eshequi jjajeapaaquiꞌyo majje jiji oꞌoyanaje. 34 Sinecua, quea misi poajo, Jesosa quea yeno neineijo taaa neineinaje: —¿Eli, eli, lama sabactani? —taaame poanaje—; ecue Chii, ecue Chii, ¿yajjajo acuae mo ya jeanaꞌyonaje soꞌo? —Jesosa poanaje Jodioja esohuijo.

35 Shajjaꞌajja majje joya quea chipi nee nee nequi jama poanaje baꞌa: —¡Bacue oe! ¡Ohuaya etiiquiana Enia iyaa cani pojjaꞌa, ma yahuajo nei baꞌya poa Enia iyaa cani chi, de! —jama posoya acanaje cuaa.

36 Jamajjeya oe dejja poquicuajinaje acuijjajja na sese jjequiya. Jjequi majje shajashaja iyanobia canaje ena ejjequi yasijje. Majoya bequiobo sajo quecuahuosho majje Jesosaja enaba huasijje huoo canaje, ojaya eꞌishijji nisho: —¡Ishoa socue! ¡Enia pojjaꞌa poeje o nahueya, o jjequioqueaꞌyohua! —poanaje.

37 Jamatii, taaa neinei oꞌoya majje Jesosa manoꞌyonaje. Chamaꞌyo tii poanaje. 38 Jesosa manoꞌyajo tii, Eyacuiñajjija equijo daqui quea moo ebaꞌehuana baꞌe Eyacuiñajjiya eyajje jjaisajea meequi caꞌyonaje; biacuajje ebionei jjaisajeaqui meecoo canaje.

39 Ojjaña ba majje, Jesosa taaa neinei majje, manoꞌyonaje ba majje peaꞌai sohuinano huoojeajji poani, ma Jesosa nahuejji poani quea mete nee poanaje: —¡Eꞌe jojo nei de, oya Jesosa Eyacuiñajjija Bacua Ejja poanaje! —sohuinano poanaje.

40-41 Quea huesha nequiya epona cuaa peaꞌai Jesosa ebaꞌehuanasohuajea baꞌe ba cani. Oya cuana yahuajo Jesosa nijje Janinea meshijo ania poa. Onijje Jenosanena huasijje poeyanaje, oja bobi cuacua meesahuaa. Oya cuana ma bajjani baꞌa: Mania Madanena; Satiaco, oja chahua Jose peaꞌaija enaese Mania bajjani; Semeneoja ehuanase Sanome bajjani peaꞌai; pea epona cuana quea huiso peaꞌaiya ba canaje.

42 Majoya sinenaje. Mecahuajje epojja ejomishocajji, quea bihui nee ojee eꞌijjiaꞌijjiajji peaꞌai. Jamajjeya acui ecueataꞌapeejo ebaꞌehuanasohua baꞌe meemee ajja.

43 Jamajjeya sinecua nei dejja Jose bajjani poeyanaje, pea Jose, Amatea meshijo baꞌe. Oya Jodio etii ejjachichaqui nequi cuana nijje nequi. Oya ojjañaja quea boti nee. Ohuaya Eyacuiñajji ojjaña huoojeaꞌyojji poaje ishoaꞌajja cani. Oya Jesosaja epeejji peaꞌai yahuajo. Jamajjeya oya meteꞌama po majje Pinato huasijje poquinaje Jesosajo huohuiya. Poeꞌyo majje ohuaya Pinato huohui cañaꞌyonaje: —Emeshi mese Pinato, Jesosa manoꞌyonaje. Eyaya oya jjequioqueajeꞌyo jjani yasijje ehuananobiaquiꞌyojji —poanaje Jose.

44 Joseja esohui shajjaꞌajja majje Pinato jama poanaje baꞌa: —¡De! ¿Aꞌa oya Jesosa manocuajiꞌyonaje?

Jamajjeya Pinatohua sohuinano huoojeajji poani, ma Jesosa me cacajeajji epo iyaa canaje. O poeyajo huohuiꞌajja canaje jama baꞌa: —¿Aꞌa eꞌe jojo nei Jesosa manocuajiꞌyonaje? —poanaje.

45 —Eꞌe, oya manoꞌyonaje —poanaje.

Jamajoya Pinatohua Jose huoojea canaje jama baꞌa: —Eꞌe, ¡Jesosa dojocue! ¡Mei jjani yasijje huananobiaquicue!

46 Jamajjeya daqui oshe quea ao nee jjeshe majje Jose poquinaje Jesosa acui ecueataꞌapeejo emanoꞌyo baꞌe yasijje. Jesosa emanoꞌyo baꞌe jjequioquea caꞌyonaje. Daqui oshe eyacua neijo bebo canaje. Dojo canaje mei jjani yasijje, ma oja jjeya nei tio huasijje. Huananobia caꞌyonaje. Majoya mei quea quemo nee jeacajjajjajea canaje mei jjani naba capaꞌyojji. Jesosa mei jjani dojjojo jaa capaꞌyo majje poquinaje Jose pea cuana nijje. 47 Mania Madanena, Joseja enaese Mania bajjani peaꞌai mei jjani yasijje poeyanaje peaꞌai. Jomajo Jesosa jjani yasijje ehuananobiajaa ba canaje, epona cuaa.