1 God ingo jigiri eririsewa edo ingo wasiri seka Keriso ga da burisewa awasedo jo ingoda berari mi utu da rovi ravi awa dipapa ewo. Edo utu da ainda Keriso awa God da ingo be kena uso gitijigari anumba da anumbedo atira. 2 Edo iji berari busu da rora awa kotove ta iji berari utu da rora awa kotedo ewo ainda be awa ingoda wasiri mamatu awa atae isira. 3 Edo ingo God da diti da Keriso ga da wasiri seka de atewa awa busu da embobo awa wasiri seka awa gaera. 4 Awarate Iesu Keriso ingoda joda atira awa wasiri seka da ngamo na edo God umo awa embo berari da yei isaga adira iji ainde God ingo awa daedo isaga adira. Edo uso usasa nembodiba awa ingoda yei janibadira.

5 Edo ingoda jo mi busu da embobo da wasiri awa adi ari gido dipapa awa dewo betare. Edo wasiri eiawa busu da embobo mi edo era, viro ise, dita ise, sino da wasiri awa edo era, kotari bebegae de dipapa nembogamo de edo jinaga jiwae edo era. Edo jinaga edo era amone teta ove kewari tumondebain arago edo era. 6 Edo God umo wasiri bebegae eiawa embo umo kera ae era ainda yei tini gambari nembodiba adira. 7 Edo ingo matu dipapa bebegae awa ise atima edo isewa iji ainde awa ingoda jo da dipapa bebegae mi ingo gitijigido isira.

8 Awarate boroko kotari bebegae de ari bebegae de tini gambari de embo nenei ujo ae ari de berari awa pigewo mambare. Edo embo nenei da jawo da ge bebegae seove edo isibari ge seove. 9 Edo ge mina busa eove ainda be awa ingo dipapa bebegae mamatu awa wawara edo dipapa seka awa burisewa teta bo mamatu awa wawara edo bo seka budo ewarago isewa awasedo. 10 Edo ingo jo da dipapa seka awa burisewa amimi God awa iji berari ingoda jo da buro edo ira irirari ingoda jiro gari God da yei awa bajido nembodiba iri ingo God da gari awa burewa. 11 Awasedo embo Jew embo ta embo Jew embo aeri edo embo tamo da andiso diugari wasiri awa burisi ta bae ri ainda sedo gari ainda mina sari awa nembodiba aera ainda be awa Keriso awa embo nembodiba ra edo Keriso awa embo umo gebe edo era ainda jo da atima ira awasedo.

12 Edo ingo awa God da embobo ra. Edo umo ingo dubo budo ingo katabetiri ingo uso embo isewa awasedo wasiri ewagaewa awa budo ombuwo teta bo seka ombarago ewo. Edo embo nenei dubo buwo edo embo nenei da yei kando ewo jariga eove edo wasiri biae embo nenei da yei eove ta saboa ewo. 13 Edo iji berari kondade mina ara ewo edo embo nei mi embo nei bekuba ari gido kotembedo dowo. Kotembedo mina doa ewo teta God mi ingo kotembedo doturisira awodo. 14 Edo dubo bari awa dowo wasiri ewagaewa nenei berari awa derigare ainda be awa dubo bari awa wasiri ewagaewa berari ainda susu ra.

15 Edo God mi ingo jawo setiri Keriso da tamo isewa awa ingo jo jamo jamo de atawase dipapa ira awasedo dubo jamo ari Keriso mi itido ira awa dowo ingoda jo awa dedegare. Edo doio sewo. 16 Edo Keriso da ge be jiwae edo ira awa ingoda jo da atare. Edo jiro gari nembodiba mi atopapotise dengoro mina ara ewo. Edo ingoda jo da God doio sise God da ya edo ya ewagaewa de God jasiga ari ya de awa God da yei sewo. 17 Edo ingo ro adewa edo sadewa awa sise ise gido Bada Iesu da jawo da ewo. Edo awodo ise sise gido Mamo God awa Iesu Keriso da yei awodo jasiga ewo.

18 Ingo aro asini ingoda iubono kera ewo ainda be awa Iesu ge be ari embo evetu awa awodo adera.

19 Edo ingo iubono ingoda aro asini dubo buwo edo ungoda yei tini gambari eova.

20 Edo ingo kinapeina iji berari ingoda aimamo awa kera ewo ainda be awa amone God mi ingo mi awodo awase dipapa ira. Edo kinapeina ungoda aimamo kera adera amimi ari God iaviri adira.

21 Edo ingo aimamo gae gae edo ingoda kinapeina awo jo ambu re iji berari ungoda yei eiawa eose oiawa eose awa seove.

22 Edo ingo agipo embobo ingoda babojegari mi ro awase soro gido ewo. Edo ungo ingo ditini era iji ainde awo ungo iaviri orase sedo eove ta jo ewamei de da ewo ainda be awa ingo God dubo burewa awasedo. 23 Edo ingo ro ewa awa ingoda jo berari mi ewo teta ingo God da buro ae etewa awodo embo da buro aera te. 24 Edo kotewo God mi ingoda riroga awa itadera. Edo unemi uso embo da yei ro itadi sia etira awa imone badesa. Edo Keriso awa bajari be awa imone kera esa. 25 Edo embo ave wasiri bebegae ira embo awa uso wasiri bebegae awasedo mina badira ainda be awa tega da ainda God embo kasedo ira.