1 Ingo awa God da kinapeina na awasedo ingo edo gido God edo ira da awodo adewa. 2 Edo Keriso ingodena dubo burisira da awodo ingo iji berari embo nenei dubo buwo. Edo Keriso umo umosuka betadi etiri ungo mi teta rorou God da yei itarago isera. Edo God rorou muno ewamei de awa gido iaviri isira.

3 Edo ingo awa God da embomei na awasedo dita baita ari da wasiri awa eove edo wasiri bebegae adi kotove edo embo nenei da rora dipapa eove. Edo wasiri bebegae be eiawa adi sedo ge seove. 4 Edo daedo embo nenei isibeove edo kiki bebegae awa seove awarate iji berari God jasiga ewo. 5 Edo ingo gosewa embo ave dita baita ari wasiri edo ira edo wasiri bebegae adi kotedo ira edo embo nenei da rora dipapa edo ira embo awa mana ewamei ari God de Keriso de mi ungo gitijigadera iji ainde itadera awa mana badera.

6 Edo embo jiro bebegae da ge sera awa gaegae edo ingo gandubeore ungoda ge ingove ainda be re embo berari God da ge kera ae edo era awa God ungoda yei tini gambari edo ira awasedo. 7 Awasedo embomei einde anumbedo kiki dirise atove. 8 Edo matu ingo wasiri bebegae ise umenga da atima isewa awarate boroko ingo awa God da embobo edo usasa da atewa awasedo wasiri embo usasa da atima era ainda awa ewo. 9 Edo awodo ewo ainda be awa usasa mi euri ari wasiri ewagaewa bugudo ira teta ri ewamei mi be ewamei edo ira da awodo ra. 10 Edo ingo mi wasiri ewagaewa irirowo God mi gido iaviri arase sedo re God ingo ro awase sira awa dengoro edo ingiwo.

11 Edo embo wasiri bebegae umenga da atise edo era ainde da atise kiki dirise atove ta embo mi wasiri biae awa gorase re isaga ewo. 12 Edo na boroko mana embo mi wasiri bebegae unjugari da edo era awa mana sadena ainda be awa amimi ari ingodena me nembodiba gadera awasedo. 13 Edo ingode rora usasa da itoro embo mi rora awa rori awa isaga gido era da awodo ingo embo da wasiri bebegae awa isaga oro embobo awa usasa da atari embobo aderita rora. 14 Awasedo God mi jiwari da sisira,

15 Edo ingodena awa iji biae da atera awasedo atise gido gogowo ise atiwo. Edo teta embo jiro ae mi atarago eove ta jiro gari embobo edo atiwo. 16 Edo iji dada ari ewagaewa ari iji iso yei bugadira awa ewamei eio. 17 Edo awasedo jiro bebegae embobo awodo eove ta iji berari God ingo ro awase sira awa gosise atiwo.

18 Gaegae edo umo okain indari embobo eove edo umo okain indove ainda be awa umo okain indadewa amimi ingo ari usibesi adewa. Awarate God da yei sedo giwo God da Asisi Ewamei Be mi ingoda jo awa sirare. 19 Edo ingo God da ge da ya de ya ewagaewa de ge ewagaewa de mi ge mina sara ewo. Edo ingo God da yei ge sise edo ya ewagaewa sise re iji berari ingoda jo berari mi God jasiga ewo. 20 Edo ingoda yei ro adira awa ingo Mamo God da yei edo Bada Iesu Keriso da jawo da awodo doio sewo.

21 Ingo awa saboa ari mi Keriso sapo ewa da awodo saboa ari mi sapo mina ara ewo.

22 Edo ingo aro asini saboa ari mi ingoda iubono sapo ewo teta ingo Keriso sapo edo ewa da awodo. 23 Amone ko iu mi aro awa bajari ira awasedo teta Keriso awa Iesu gebe ari embobo bajari edo ira da awodo ra. Edo Iesu gebe ari embobo awa Keriso da tamo na edo umone ungoda soregari ra. 24 Edo awasedo ingo aro asini saboa ari mi ingoda iubono sapo ewo teta Iesu gebe ari embobo mi saboa ari mi Keriso sapo edo era da awodo.

25 Ingo iubono ingoda aro asini dubo buwo teta Keriso mi Iesu gebe ari embobo dubo budo ungo embo bebetisira awodo. 26 Edo Iesu Keriso mi betedo sekago erido edo uso ge de sasaka de mi uso gebe ari embobo segari edo uso sekago engenembari sia orase sedo isira teta ademei mi uso jimbari iji simba edo ira da awodo. 27 Edo Iesu gebe ari embobo mi sia edo dongono nei ro atae edo gari ewamei be teta ademei tamo andiso evetu ogo da tamo andiso awodo ae ewamei be adera. Edo ungo awawa wasiri bebegae de ae adera. 28 Edo embo ungoda tamo simba edo era da awodo ungoda aro asini simba ore. Edo embo uso aro simba adira awa umo uso tamo simba adira.

29-30 Edo embo ungoda tamo topo awa ujo ae edo eri ta? Awodo aera. Awarate embo ungoda tamo simba edo era teta Keriso mi ingodena Iesu gebe ari embobo simba edo ira da awodo ra ainda be awa ingodena awa Keriso da tamo patu awasedo, 31 Edo jiwari mi sira,

32 Edo iu de aro de da ge amone gebe ra te daedo Keriso uso embo Iesu gebe ari embobo awa dubo budo ira ainda emboro awa isaga edo ira. 33 Awara na ro setena amone eire ingo iubono saboa ari mi ingoda aro asini sapo ewo teta ingo saboa ari mi ingosuka sapo edo ewa da awodo. Edo ingo aro asini ingoda iubono awa saboa ari mi sapo ewo.