1 Embobo ingo roedo iji berari ge bagise embogo ewovi? Edo dipapa bebegae awa ingoda jo da embogo ise ungo mi ero embogo de ge bagari de ingoda teda eririra. 2 Edo ingo rora kumbari dipapa ewa te kumbari sago ae ewa awasedo ingo dawo betorase sia ewa. Edo ingo rora kumbadi jo mi goroba ewa te ingo kumbari sago ae ewa awasedo ingo ge bagewa edo embogo ewa. Edo ingo ro dipapa edo ewa kumbae edo ewa ainda be awa ingo God da yei sedo gawo ingoda yei itari sae edo ewa awasedo. 3 Edo ingo God da yei sedo gido ewa kumbae edo ewa ainda be awa ingoda kotari awa bebegae awasedo. Edo ingo rora kumbudo amimi ari iaviri adi sedo gosewa.

4 Edo embobo ingo ari bebegae edo ewa teta evetu mi uso iu da gitopo awa dubo barago edo ira da awodo. Edo ingo busu da rovi ravi da otao awa ingo awa God da gitopo ra. Ingo awa gadi jarevita? Embo ave busu da roviravi da otao adi dipapa adira embo awa God da gitopo adira. 5 Edo jiwari mi sira, “Asisi God mi ingodenaso jo da ititisira awa iji berari unemi gogo edo simba edo ira.” Edo ge ainda be awa ingo ro kotevi? 6 Awarate God da soregari kando mi ingodenaso dipapa bebega awawa derigedo be atira. Edo jiwari mi sira,

7 Awasedo dowo God mi ingoda jo da gitijigare. Edo Satan ingoda yei purirari goroba edo deriwo. Edo goroba edo derawo umo dodo sumbudo mambadira. 8 Edo God da yei asusubedo puwo edo God ingoda yei asusubedo purare. Edo ingo wasiri bebegae embobo ingoda ingo wasiri bebegae edo ira awa segewo. Edo ingo ise sarago ari embobo ingoda jo bebegae awa segewo. 9 Edo ingo berari wasiri bebegae ewowa dubo vevera edo ji sewo. Edo ingo wasiri bebegae embobo iaviri ewa ji sewo. Edo ingo iaviri ewa dubo vevera ewo. 10 Edo ingo God da yei pewa saboa ewo. Edo ingo saboa awa God mi ingo jigari eradewa.

11 Naso nanonamendi ingoda jawo da kiki mina dira eove. Edo embo ave uso namendi kiki dirira embo amone agodari ge awa kiki dirira. Edo embo amemi uso namendi kasira amone agodari ge awa kasira. Edo imo agodari ge kasadesa awa imo agodari ge kera ari embo awa atae edo imo awa agodari kasari embo etesa. 12 Edo God mi agodari ge awa ititisira edo umo umosuka kasadira. Edo God umo umosuka soregadira edo God umo umosuka usibesi adira. Edo ingo embo nenei kasewa embobo ingo mo ave awa kotise evi?

13 Naso ge ingiwo. Ingo sewa boroko ta euma awa ingode nati nembodiba da mambudo gaeko da atadera. Edo ainda gaeko da atise rora origarori edo ingode gano jiwae be badera sewa. 14 Edo ingo awodo sewa te ingo euma ingoda yei ro adiri awa ingo gaera. Edo ingoda wasiri mo rawodo ri? Ingoda wasiri awa teta umbosi iji tupo vitido ira te burigi be atae edo ira da awodo ra. 15 Edo ingo re eiedo sari katogo ra God umo dipapa adira awa ingode atise eia edo oia adera sari katogo ra. Awarate boroko awa ingo jariga embobo ra. Edo jariga ge awa biae ra. 16 (-)

17 Awasedo embo ave ro ewamei unemi ae etira awa ae adira embo awa rora ewamei awa ae etira awasedo amone wasiri biae ra.