Leta usuf Fan Ibru.
1.
Tinpakanini, God i orek la usuf foron tubutamat kerer na ngusun foron profet na ifuun e aunbiing, ke na marmarsan sal. 
Isau le, na foron farfarop na biing igii, i orek usuf kerer na ngusu ke Kalalik, ae i fakale ta u ini foron tier tikii, ma lo i sau, God ka fakiis ta foron tier tikii na piklinbat turan bat. 
Ke Kalalik i fapil memeh ke God, ma ifasi arae God tom. I pose turim na foron tier tikii ini rakrakai na orek kia. Ma aunbiing ka fafuu ta kerer koseng foron sinang laulau kirer, ka kiis na mia God, Tara King buuii na kukulii. 
Ma ka kep tara kiiskiis ae i liuliu kulkulef lon foron angelo tikii. Ma as sabin ae Tama i ta ta u usuf i, i liuliu kulkulef na asan foron angelo tikii. 
Wara le God biil i tara ta sing ti angelo aragii, “O keng Kalalik, igii ia ka tapiek Tamam.” Ma biil sabin i tara ta sing ti angelo aragii, “Ian Tama, ma in keng Kalalik.” 
Ke aunbiing ka wuun ufu ta Kalalik famu kia uga na piklinbat, ka tarah, “Foron angelo tikii ke God rin lotu tom unaisa.” 
Ma ulon foron angelo, ka tarah, “I tel foron angelo kia arae kif, ke foron fafauun kia arae karfian yiif.” 
Isau le, ulon ke Kalalik ka tarah, “God, nian kiiskiis an king kiam in kiis fitliu ma biil ti farfarop lo, ma na tortores na sinang sau on nagogon matanfuntih kiam ini. 
O ier isi sinang ae i tortores, ma o ka ememse sinang laulau. I e wara ae God, God kiam, ka ta ta laes sing o, arae i to wel na olom, ke ka falaumet o lon foron talam.” 
Ke God i tara sabin sing ke Kalalik aragii, “Kumguui, tina tanwaran fakfakiis o luun ta waransinglen na piklinbat, ma o fakiis ta bat ini limam. 
Run mangmangal, isau le on kiis fitliu. Run mutmut arae kaen ae i tofe. 
On finris ru arae nenge kaen. On kiliis ufu ru arae tikas i kiliis ufu kaen tofe. Isau le wo, biil o sokiliis la, ma biil ti farfarop lo e foron bet kiam.” 
God biil i tara ta sing ti angelo sabin le, “Kiis na miang, papang na aunbiing ian luun foron tuui kiam na piklin kekem.” 
Foron angelo tikii ri foron tanwa, ae ri tel foim la ke God. I wuun ri la isi rin lupes fanu ae rin kep fafaliu.