1 Nde Iisaa tilii e ɗiin waajuuji ndee, iwi Galili fa'i bannge Yahuudiya gonɗo caggal maayo Urdun oo. 2 Yimɓe heewɓe njokki e makko, o sellini ton ɲawɓe mum'en.

3 Yoga e Farisa'en ngari e makko, lamndii mo ɗum ɗoo faa itta koro makko:

—Tama ana daganii gorko seerdude jom suudu mum daliili tawaaɗo fuu?

4 O jaabii, o wii:

—Tama on njanngaali ko Binndi ɗii mbii? E fuɗɗoode Laamɗo tagii ɓe waɗii ɓe gorko e debbo, 5 wii: «Ɗum waɗi so gorko yoppan inna mum e baam mum, nanngondira e jom suudu mum, ɓe ɗiɗon fuu ɓe laatoo neɗɗo gooto.»* Puɗɗooɗe 2.24 6 Nii woni ɓe nganaa ɗiɗon kasen, ɓe neɗɗo gooto. Ndennoo, pati neɗɗo seenndu ko Laamɗo reentini.

7 Ɓe lamndii mo, ɓe mbii:

—Ko saabii so Muusaa yamiri gorko hokka jom suudu mum talkuru ceergal nde ana seera ɗum?

8 O jaabii ɓe, o wii:

—On yoorɓe ɓerɗe, ɗum saabii so Muusaa hokki on no ceerdon rewɓe mooɗon. Kaa e fuɗɗoode, wanaa non worrunoo. 9 Miɗo wiya on: ceerduɗo jom suudu mum ko wanaa fijirde, so ɓamii debbo goɗɗo, jeenii.

10 Taalibaaɓe makko ɓee mbii mo:

—So nii hakkunde gorko e debbo worri, waasude ɓamde ɓuri.

11 Iisaa jaabii ɓe, wii:

—Wanaa yimɓe fuu mbaawi jaɓude kaa haala, ɓe Laamɗo hokki ɗum ɓee tan mbaawi jaɓude ka. 12 Daliiliiji kaɗooji worɓe ɓamde ana ngoodi. Sabi won worɓe rimeteeɓe tawa yo waatoraaɓe. Won ɗereteeɓe. Heddiiɓe ɓee noo, kaɲum'en kaɗi ko'e mum'en ɓamde faa ngollana Laamu Laamɗo oo. Neɗɗo fuu jarriiɗo ndee tinndinoore, yo jaɓu!

13 Caggal ɗum, won waddanɓe Iisaa cukaloy yalla omo fawa e makkoy juuɗe makko o duwanoo koy, kaa taalibaaɓe ɓee njahii e yimɓe ɓee. 14 Nden o wii:

—Accee cukaloy koy ngara e am, pati kaɗee koy, sabi wa'uɓe no makkoy nii ɓee njey Laamu Laamɗo oo.

15 O fawi junngo makko dow makkoy, o duwanii koy. Nden o iwi ton.

16 Gorko gooto ɓattitii Iisaa, lamndii mo, wii:

—Moobbo, honde huunde moƴƴunde kaan-mi waɗude faa mi heɓa nguurndam nduumiiɗam?

17 Iisaa wii mo:

—Ko saabii so laamdi-ɗaa kam ko moƴƴi? Laamɗo tan woni moƴƴo! So aɗa yiɗi naatude e nguurndam, jokku sariyaaji ɗii.

18 Gorko oo lamndii Iisaa, wii:

—Hoɗi ngoni sariyaaji ɗii?

Iisaa jaabii, wii:

—Pati ɲaaɗu hoore, pati jeenu, pati wujju, pati seeda fenaande, 19 teddin inna maa e baam maa, njiɗiraa tanaa maa no njiɗir-ɗaa hoore maa nii.

20 Suka jokolle oo wii mo:

—Miɗo haybi ɗum fuu. Koɗum heddii?

21 Iisaa wii mo:

—So tawii aɗa yiɗi hiɓɓude, yaa soottoy ko njogi-ɗaa fuu, ndokkaa kaalisi oo misikiina'en. Nden a heɓan jawdi dow kammu. Caggal ɗum, ngaraa njokkaa kam.

22 Nde suka jokolle oo nani ɗiin haalaaji ndee, yaadi e yoomeende, sabi o arsukunte ɲolɗo.

23 E ley ɗum, Iisaa wii taalibaaɓe mum ɓee:

—Miɗo haalana on goonga: hee naatugol arsukunte e Laamu Laamɗo ana tiiɗi! 24 Miɗo haalana on kasen ɗum ɗoo: ngelooba ƴaɓɓoroo e wuddere mesalal ɓuri newaade diina naatugol arsukunte e Laamu Laamɗo.

25 Haaynii taalibaaɓe ɓee sanne nde nani ɗiin haalaaji ndee, ɓe mbii:

—Ndennoo, homo woni kisoowo?

26 O ƴeewi ɓe, o wii:

—Ɗo yimɓe ɗum laatataako, kaa walaa fuu ko Laamɗo waawaa.

27 Piyeer ɓami haala, wii mo:

—Minen, min njoppii fuu, min njokkii e maa. Koɗum min keɓoyta?

28 Iisaa wii ɓe:

—Miɗo haalana on goonga: so Ɓii Neɗɗo oo jooɗiima e jooɗorgal mum laamu teddungal ley aduna keso, onon sappo e ɗiɗon jokkuɓe e am ɓee duu, on njooɗoto e dow jooɗorɗe kaanankooɓe, caron cuuɗi baaba Israa'iila sappo e ɗiɗi ɗii. 29 Neɗɗo fuu joppirɗo saabe am galle mum naa sakiraaɓe mum worɓe naa sakiraaɓe mum rewɓe naa inna mum naa baam mum naa sukaaɓe mum naa gese mum, heɓan ko ɓuri ɗum cowe teemedere, kasen duu heɓan nguurndam nduumiiɗam. 30 Kaa ardinooɓe heewɓe laatoto caggalaaɓe, caggalaaɓe ɓee laatoto ardiiɓe.