22
Banndol haala ɲiiri yannge
1 Iisaa haaldiri e maɓɓe banndol kasen, wii ɓe:
2 —Laamu Laamɗo ana wa'i hono no kaananke kuurtinanɗo ɓiyum gorko, so waɗani ɗum yannge. 3 O neli gollooɓe makko noddanoya mo ɲaamooɓe, kaa gansaaɓe ɓee calii warde. 4 O neli kasen gollooɓe woɓɓe, o wii ɗum'en: «Mbiyee gansaaɓe ɓee ɲiiri yannge ndii moƴƴinaama faa gasi, mi hirsii ga'i e ɲalbi payɗi, hankasen fuu lanndinaama, ɓe ngara ɓe nootoo yannge oo.» 5 Kaa gansaaɓe ɓee koyni mo, kiinnii haajuuji mum'en: oo ngesa mum, oo jaagu mum. 6 Heddiiɓe ɓee nanngi gollooɓe ɓee, torri ɓe, mbari ɓe. 7 Kaananke oo mettaa, neli sordaasi'en mum mbaroyi ɓeen ɲaaɗuɓe ko'e, nduppi ngeenndi mum'en. 8 Caggal ɗum, o wii gollooɓe makko ɓee: «Ɲiiri yannge ndii moƴƴinaama, kaa gansaaɓe ɓee kaandaa e ɲaamde ndi. 9 Ɗum nee, njehee dow mbeddaaji mawɗi ɗii, noddon neɗɗo fuu mo kawru-ɗon wara ɲaama ɲiiri yannge oo ndii.» 10 Kaadime'en ɓee njehi dow mbeddaaji ɗii, noddi yimɓe ɓe tawi ton fuu gila e bonɓe faa e moƴƴuɓe faa galle ɗo yannge oo waɗata ɗoo heewi yimɓe.
11 Nde kaananke oo naati faa yiya noddaaɓe ɓee ndee, o soynii gorko mo paraaki. 12 O wii ɗum: «Giɗam, hono naatir-ɗaa ɗoo tawi a paraaki?» Kaa oon deƴƴinii. 13 E ley ɗum, kaananke oo wii gollooɓe ɓee: «Kaɓɓee juuɗe makko e koyɗe makko, tippo-ɗon mo e ley nimre sella ndee, ton o wullata o ŋerƴondira ɲiiƴe.»
14 Iisaa jokki wiide:
—Noddaaɓe ana keewi kaa suɓaaɓe ana pamɗi.
Haala yoɓugol lampo
15 Farisa'en njehi ndawridoyi no tuufiranta Iisaa e ley haala mum. 16 Ɓe neli yoga e taalibaaɓe maɓɓe, kaɲum e howruuɓe Hirudus mbiya mo:
—Moobbo, miɗen anndi a goongirante: aɗa jannginira laawol Laamɗo ngol goonga, a hulataa fay gooto, sabi a ɓurdintaa yimɓe. 17 Ɗum nee, haalan min koɗum anndu-ɗaa e ɗum ɗoo: ana dagoo min ndokka kaananke Roma mawɗo oo lampo naa dagaaki?
18 Kaa Iisaa ana anndi anniyaaji maɓɓe bonɗi ɗii. O wii ɓe:
—Onon naafigi'en! Koɗum waɗi so oɗon tuufana kam? 19 Kollee kam kaalisi joɓirteeɗo lampo oo.
Ɓe ngaddani mo mbuuɗu cardi gooto. 20 O lamndii ɓe, o wii:
—Natal homo e innde homo woni ɗoo?
21 Ɓe njaabii mo, ɓe mbii:
—Kaananke Roma.
O wii ɓe:
—Ndennoo, ndokkee kaananke Roma oo ko jey, ndokkee Laamɗo duu ko jey.
22 Haaynii ɓe nde ɓe nani oo jaabu ndee. Ɓe celi mo, ɓe mbitti.
Haala immital maayɓe
23 E ley oon ɲalooma jaati, yoga e waaldeSaduki'en ngari e Iisaa. Kamɓe ngoni fennuɓe immital. 24 Ɓe lamndii mo, ɓe mbii:
—Moobbo, Muusaa wii: «So neɗɗo maayii heɓaali ɓiɗɗo, miɲum naa mawnum ɓamta debbo ɗalaaɗo oo, yalla ana heɓana ɗum ɓeyngu.»* Fillitagol Tawreeta 25.5 25 Waɗiino e ɓettaade to amen rimdaaɓe njeɗɗon worɓe. Arano oo caggal dewlii, maayi heɓaali ɓiɗɗo. Miɲiiko gorko ɓamti debbo makko oo, 26 kaɲum duu maayi heɓaali ɓiɗɗo. Tataɓo oo duu jokki hen faa yottii njeɗɗaɓo oo. 27 Caggal maɓɓe ɓe fuu, debbo oo duu maayi. 28 Ɲannde immital nee, homo e njeɗɗon ɓee debbo oo laatotoo jom suudu mum? Sabi ɓe fuu ɓe ɓamiino mo.
29 Iisaa jaabii ɓe, wii:
—On majjii, sabi on paamaali Binndi ɗii, on anndaa baawɗe Laamɗo ɗee duu. 30 Sabi so maayɓe immitike, worɓe ɓamataa, rewɓe ɓamataake, ɓe laatoto hono no malaa'ika'en wonɓe dow kammu ɓee nii. 31 E haala immital maayɓe, tama on njanngaali ko Laamɗo wii on koo? O wii: 32 «Miin woni Laamɗo Ibarahiima, Laamɗo Isiyaaka, Laamɗo Yaakuuba.»† Pergu 3.6 Laamɗo yo Laamɗo wuurɓe, wanaa Laamɗo maayɓe.‡ Gila e jamaanu Muusaa tawi Ibarahiima e Isiyaaka e Yaakuuba maayii gila ko ɓooyi. Ko Laamɗo wii yo Laamɗo maɓɓe koo, holli eɓe nguuri.
33 Waaju makko oo haaynii yimɓe hettindotooɓe mo ɓee fuu.
Haala yamiroore ɓurnde fuu teentilaade
34 Nde Farisa'en ɓee nani o muɓɓii kunduɗe Saduki'en ɓee e haala ndee, ɓe kawriti. 35 Gooto e maɓɓe jannginoowo Sariya yiɗi tuufande mo, lamndii mo, wii:
36 —Moobbo, honde woni yamiroore ɓurnde fuu teentilaade e ley Tawreeta?
37 Iisaa jaabii mo, wii:
—Yiɗir Laamɗo Joomiraaɗo maa ɓernde maa fuu e yonki maa fuu e hakkille maa fuu.§ Pergu 6.5 38 Nden woni yamiroore ɓurnde mawnude, ɓurnde teentilaade. 39 Yamiroore ɗiɗaɓere hono mayre annii: «Njiɗiraa tanaa maa no njiɗir-ɗaa hoore maa nii.»* Lewinkooɓe 19.18 40 Tawreeta Muusaa e dewte annabaaɓe ɗee fuu e ɗeen jamirooje ɗiɗi pawii.
Kabaaru Almasiihu e Daawuuda
41 Nde wonnoo Farisa'en ɓee ana kawriti, Iisaa lamndii ɓe, wii:
42 —Koɗum miilu-ɗon e Almasiihu oo? O taanii homo?
Ɓe njaabii, ɓe mbii:
—O taanii Daawuuda.
43 O wii ɓe:
—Ndennoo, hono Daawuuda noddirta mo Joomiraaɗo? Ruuhu Laamɗo anndini mo ɗum, saabe majjum o wii:
44 «Joomiraaɗo wii Joomam:
Jooɗa ɲaamo am,
faa mi waɗa njaɓɓaa wayɓe maa.»† Jabuura 110.1
45 So Daawuuda ana noddira mo «Joomam», ndennoo, hono mo laatortoo taanum tan?
46 Ɓe fuu ɓe ndonki jaabaade mo fay karrol. Gila ɲannde nden, fay gooto suusaali lamndaade mo lamndi goɗɗi.