Yuhanna.
13.
Gila iidi Paska yottaaki, Iisaa ana anndi wakkati mo iwata e aduna so hootana Baabiraaɗo oo warii. Ga aduna gaa omo yiɗi yimɓe makko, omo yiɗi ɓe kaaddi jilli. 
Wakkati mo ɓe kirtotoo oo, Ibiliisa waɗi e ɓernde Yahuuda ɓii Simon Isikariyota jammbaade mo. 
Iisaa e hoore mum ana anndi to Laamɗo iwri to Laamɗo hootata. Laamɗo waɗii huunde fuu e junngo makko. 
O immii e hiraande ndee, o ɓoortii saaya makko, o ɓami disawel, o fiili e makko. 
Non o wayli ndiyam e feere lootorde, o naati e lootude koyɗe taalibaaɓe makko, omo soccira ɗe disawel o fiilii ngel. 
Nde o yottinoo Simon Piyeer ndee, oon wii mo: —Moobbo, aan lootata koyɗe am naa? 
Iisaa jaabii mo: —A faamaali ko ngaɗan-mi koo tafon, kaa a faamoyan caggal jooni. 
Piyeer wii mo: —A lootataa koyɗe am abada! Iisaa jaabii mo: —So mi lootanaali ma, a walaa ngeɗu e am. 
Simon Piyeer wii mo: —Moobbo! So non, pati haaɗu e koyɗe am tan, lootu juuɗe am e hoore am duu. 
Iisaa wii mo: —Lootiiɗo fuu yo laaɓuɗo. Mo hasindinaa e lootaneede kinaa koyɗe tan. Onon on laaɓuɓe, kaa wanaa on fuu. 
Tawi omo anndi jammbotooɗo mo oo. Ɗum waɗi so o wii wanaa on fuu ngoni laaɓɓe. 
Nde Iisaa lootunoo koyɗe maɓɓe ndee, ɓamti saaya muuɗum, joottii, wii ɓe: —On paamii ko ngaɗu-mi on koo naa? 
Oɗon noddira kam «Moobbo» oɗon noddira kam «Kalfaaɗo». Ko mbiyaton koo ana moƴƴi, sabi ɗum ngon-mi. 
Ndennoo, miin Kalfaaɗo, miin Moobbo, mi lootii koyɗe mon, waajibi onon duu gooto fuu lootana goɗɗo koyɗe mum. 
Ko ngaɗu-mi on koo yo tinndinol yalla onon duu, oɗon ngaɗondira hono ko ngaɗu-mi on koo. 
Miɗo haalana on goonga: maccuɗo ɓurataa kalfaaɗo mum teddude, nelaaɗo duu ɓurataa nelɗo ɗum. 
Nde wonnoo on anndii ɗum jooni, so nii on njokkirii non, on mbelan hoore. 
Wanaa haala mon on fuu kaal-mi. Miɗo anndi ɓeen ɓe cuɓii-mi, kaa kinaa ko Binndi ɗii mbii koo tabita: «Ɲaamduɗo e am latiri kam teppere muuɗum.» 
Gila jooni miɗo haalana on ɗum, fade majjum yottaade, yalla nde ɗum yottii fuu, oɗon ngoonɗina miin woni mo ngon-mi. 
Miɗo haalana on goonga: neɗɗo fuu jaɓɓiiɗo nelaaɗo am, jaɓɓike kam. Neɗɗo fuu jaɓɓiiɗo kam, jaɓɓike nelɗo kam oo duu. 
Nde o haalnoo ɗum ndee, yonki makko ɲawi, o wii: —Miɗo haalana on goonga: gooto mooɗon jammboto kam. 
Taalibaaɓe ɓee ƴeewondiri. Ɓe anndaa mo o haalata haala mum. 
Gooto e taalibaaɓe ɓee, mo Iisaa horsini oo, ana jooɗinoo bannge mum. 
Simon Piyeer himƴi mo gite mo lamndoo Iisaa homo o haalata haala mum. 
Non taalibbo oo naayorii hedde Iisaa, wii: —Moobbo, ɗum homo? 
Iisaa jaabii: —Mo ndokkan-mi lonngere nde cuuwan-mi ndee oo. O suuwi lonngere, o hokki Yahuuda ɓii Simon Isikariyota oo. 
Caggal lonngere ndee, Ibiliisa naati e Yahuuda. Iisaa wii mo: —Waɗu ko ngaɗataa koo law! 
Tawi fay gooto e jooɗiiɓe ɗon ɓee faamaali ko Iisaa haalani mo koo. 
Nde wonnoo Yahuuda woni kawjotooɗo jawdi maɓɓe, yoga miilii Iisaa wii mo somonoyoo iidi, naa daɲa ko o hokki misikiina'en. 
Yahuuda nanngu lonngere ndee tan, yalti oon wakkati fuu. Ɗum jemma. 
Nde Yahuuda yaltunoo ndee, Iisaa wii: —Jooni Ɓii Neɗɗo teddinaama, Laamɗo duu teddiniraama saabe makko. 
So Laamɗo teddiniraama saabe makko, kaɲum duu teddinan mo e hoore mum, teddinan mo law. 
Sukaaɓe am, miɗo wondi e mon seeɗa tafon. On tewtan kam. Miɗo wiya on jooni hono ko mbiinoo-mi Yahuudiyankooɓe e ɓettaade: on mbaawaa yaade to njahan-mi too. 
Miɗo hokka on yamiroore heyre: njiɗondiree! Hono no njiɗir-mi on nii, onon duu njiɗondiron hono non! 
So on njiɗondirii, yimɓe fuu annditan on taalibaaɓe am. 
Simon Piyeer wii mo: —Moobbo, hoto njahataa? Iisaa jaabii mo: —To njahan-mi jooni too, a waawaa jokkude e am. Kaa caggal jooni a jokkan e am! 
Piyeer wii mo: —Moobbo, ko saabii so mi waawaa jokkude e maa jooni? Miɗo hokkitira yonki am saabe maa. 
Iisaa jaabii mo: —Goonga fuu, a hokkitiran yonki maa saabe am naa? Miɗo haalane goonga: fade ndontoori jogginde hannde a wiyan a anndaa kam cili tati.