Ɓanngingol.
5.
Caggal ɗum, njii-mi e junngo ɲaamo jooɗiiɗo dow bimmbeere laamu ndee oo dewtere nde dow mum e ley mum winndaa, uddiraande peɗooɗe jeɗɗi maanduɗe. 
Non njii-mi malaa'ika jom semmbe ana ooynoo e daande toownde, ana wiya: —Homo haandi e fettude peɗooɗe ɗee uddita dewtere ndee? 
Fay gooto walaa dow kammu walaa dow leydi walaa ley leydi kaanɗo udditidde dewtere ndee naa ƴeewde ley mayre. 
Ngullu-mi gullaali cattuɗi, sabi heɓaaka kaanɗo udditidde dewtere ndee naa ƴeewde ko woni e mayre. 
Non gooto e mawɓe ɓee wii kam: —Pati woy! Rawaandu ladde haliindu jeyaandu e suudu baaba Yahuuda nduu, iwndu e Daawuuda nduu, jaalike. Endu waawi fettude peɗooɗe jeɗɗi ɗee, ndu uddita dewtere ndee. 
Nden njii-mi Njawdiri ana darii hakkunde bimmbeere ndee, kuɗɗe nay guurɗe ɗee e mawɓe ɓee ana pilii ndi. Endi nanndi e kirsanoondi. Endi jogii luwe jeɗɗi e gite jeɗɗi, ɗum woni ruuhuuji Laamɗo jeɗɗi neleteeɗi e aduna oo fuu ɗii. 
Ndi yehi nanngoyde dewtere ndee e ɲaamo jooɗiiɗo dow bimmbeere ndee oo. 
Ko ndi nanngi dewtere ndee koo, kuɗɗe nay guurɗe ɗee e mawɓe noogayon e nayon ɓee cujidi yeeso mayri. Gooto e maɓɓe fuu ana jogii hoddu e urdude kaŋŋeere heewnde uurdi, ɗum woni duwaawuuji seniiɓe ɓee. 
Hedde eɓe njima jimol kesol eɓe mbiya e maggol: «Aan haani ɓamde dewtere ndee pettaa peɗooɗe mayre, sabi a hirsanooma, a soottitanike Laamɗo yimɓe e suudu baaba fuu e ɗemngal fuu e jaaleɲol fuu e leɲol fuu, ƴiiƴam maa coottitori-ɗaa ɓe, yalla eɓe tawdee e Laamɗo. 
A waɗii ɓe kaanankooɓe e yottinooɓe sadaka Laamɗo meeɗen oo, ɓe laamoo aduna oo.» 
E ley holleede am, nan-mi daaɗe malaa'ika'en heewɓe, ujunaaji ujunaaji. Eɓe pilii bimmbeere ndee e kuɗɗe guurɗe ɗee e mawɓe ɓee, 
eɓe njima eɓe toowna daaɗe maɓɓe: «Njawdiri kirsanoondi ndii ana haandi e heɓude baawɗe e jawdi e hakkilantaaku e semmbe e teddungal e darja e jettooje!» 
Non nan-mi huunde fuu ko tagaa ko woni dow kammu e ko woni dow leydi e ko woni ley leydi e ko woni dow geeci e ko woni e mum'en fuu, ana wiya: «Jettooje e teddungal e darja e baawɗe ngoodanii jooɗiiɗo dow bimmbeere ndee oo e Njawdiri ndii faa abada!» 
Kuɗɗe nay guurɗe ɗee njaabii: —Aamiina! Mawɓe ɓee duu, kippii e leydi cujidani ɓe.