1 ሄሳፌ ጉዬ ላፑን ኪታንቻታ “ኢንቴ ቢዲ ፆሳ ሃንቆ ኦይኪዳ ላፑን ፁዓታ ዱጌ ቢታ ቦላ ጉሲቴ!” ጊዛ ጊታ ቃላይ ፆሳ ኬꬃፌ ኬዚሺን ታ ሲያዲስ።

2 ኮይሮ ኪታንቻዚ ቢዲ ፁዓዛ ቢታ ቦላ ጉሲዴስ። ዶዓዛ ማላታይ ኢስታ ቦላኔ ሄ ዶዓዛ ሚሲሌስ ጎይኒዛያታ ቦላ ኢታ ዋይሲዛ ማዱንꬅ ኬዚዴስ። * ኬሳ 9፡10

3 ናምዓንꬆ ኪታንቻዚ ቃስ ፁዓዛ ኣባ ቦላ ጉሲዴስ። ኣባይካ ሃይቂዳ ኣሳ ሱꬃ ማላ ጊዲዴስ። ኣባ ጊዶን ሼምፖራ ዲዛይቲ ዉሪካ ሃይቂዳ።

4 ሄꬓንꬆ ኪታንቻይ ባ ፁዓዛ ሻፋታ ቦላኔ ፑልቶ ሃꬃታ ቦላ ጉሲዴስ። ሄ ኢስቲካ ሱꬅ ጊዲዳ። 5 ሃꬃ ቦላ ኢዛስ ጎዳቴꬂ ዲዛ ኪታንቻዚ፥ “ካሴካ ሃዒካ ዲዛ ጌሻ ጎዶ! ኔኒ ሄሳꬆ ፒርዲዳ ጊሽ ኔኒ ቱማንቻ። 6 ኣሳይ ካሴ ኣማኒዛይታ ሱꬂኔ ናቤታ ሱꬅ ጉሲዳ ጊሽ ኔ ኢስታ ሱꬅ ኡሻዳሳ። ሄሲካ ኢስታስ ቤሴስ” 7 ያርሾ ያርሺዛሶዛፔ ቃስ “ኤ ዉርሳ ዳንዳዪዛ ጎዳ ፆሶ! ኔ ፒርዳቲ ዉሪካ ቱማኔ ሊኬ” ጊዛ ቃላ ሲያዲስ።

8 ኦይዳንꬆ ኪታንቻዚ ባ ፁዓዛ ኣዋ ኣርሼ ቦላ ጉሲዴስ። ኣዋ ኣርሼይካ ኣሳ ባ ሴላን ፁጋና ማላ ኣዋ ኣርሼስ ዎልቃይ ኢሜቲዴስ። 9 ኣሳይካ ዎልቃማ ሴላን ፁጌቲዴስ። ሄ ቦሻታ ቦላ ሼኔይ ኢዛስ ዲዛ ፆሳ ሱንꬅ ኣሳይ ጫዪዴስ ኣቲን ማሮቴꬃን ጌሊቤናኔ ኢዛካ ቦንቺቤና።

10 ኢቻሻንꬃ ኪታንቻይ ባ ፁዓ ዶዓዛ ኣልጋ ቦላ ጉሲዴስ። ሄ ዶዓዛ ካዎቴꬂ ቃስ ꬉሚዴስ። ኣሳይ ቃስ ዋዬዛፔ ዴንዲዳይሳን ባርካ ባ ኢንፃርስ ጋርጪዴስ። 11 ኢስቲ ቃስ ሄ ማዱንꬃ ሳኮፔ ዴንዲዳይሳን ሳሎ ፆሳ ቃንጊዳ ኣቲን ማሮቴꬃን ጌሊቤቴና።

12 ኡሱፑንꬃ ኪታንቻይ ቃስ ባ ፁዓዛ ዎጋ ኤፊራፂሴ ሻፋን ጉሲዴስ። ኣዋ ኣርሼይ ሞኪዛ ባጋፌ ያና ካዎታስ ኦጌ ጊጊሳና ማላ ሻፋዚ ሜሊዴስ። 13 ሄ ዳዌዛ ዱናፔኔ ሄ ዶዓዛ ዱናፔ፥ ዎርዶ ናቤዛ ዱናፔ ኦቃርስ ሚሳቲዛ ሄꬑ ቱና ኣያናቲ ኬዚሺን ታ ቤያዲስ። 14 ሄይቲ ቃስ ማላታታ ኦꬂዛ ዳይዳንꬃ ኣያናታ። ሄይቲ ኣያናቲ ዉርሲ ዳንዳዪዛ ጎዳ ጊታ ጋላስ ሃናና ኦላስ ኣሳ ሺሻናስ ኣላሜ ካዎቲ ዲዛሶ ኡባ ባና።

15 “ሄኮ ታኒ ካይሶ ማላ ቆፖንታ ጋካ ዎꬋና። ኢዚ ካሎቲን ኣሳይ ኢዛ ካሎቴꬅ ቤዮንታ ማላ ቤጊዲኔ ባ ማይዖ ናጊዛ ኣሲ ጋላቴቲዳዴ!” * ማቶ 24፡43-44፤ ሉቃ 12፡39-40፤ ኣጁ 3፡3

16 ኣያናቲካ ካዎታ ኢብራዌ ኣሳ ቃላራ፥ “ኣርማጌዶኔ” ጌቴቲዛ ሶ ሺሺዳ። * 2ካዎ 23፡29፤ ዛካ 12፡11 17 ላፑንꬆ ኪታንቻዚ ባ ፁዓዛ ጫርኮ ቦላ ጉሲዴስ። ፆሳ ኬꬃ ጊዶን ዲዛ ኣልጋዛፔ “ፖሌቲዴስ” ጊዛ ዎልቃማ ቃላይ ኬዚዴስ። 18 ዎልቃንꬂ፥ ዳዳ ጊሪሲኔ ጉጉንꬂ፥ ጊታ ቢታ ቃꬂ ሃኒዴስ። ኣሲ ቢታ ቦላ ሜꬌቶሳፔ ሃኖ ጋካናስ ሄሳ ማላይ ቢታ ቦላ ሃኒ ኤሬና። * ኣጁ 8፡5፤ 11፡13፥19 19 ዎጋ ካታማያ ሄꬑ ኬዛ ሻኬታ ዎꬋዱስ። ኣይዛቤታ ካታማቲ ላሌቲዳ ፆሲ ዎጋ ካታማዮ ባቢሎኔ ዛሪ ቆፒዴስ። ሚኖ ሃንቆ ፁዓን ኩሚ ኣቲዳ ዎይኔ ጫጄ ኡሻ ኡያና ማላ ኦꬂዴስ። * ኢሳ 51፡17 20 ኣባ ጊዶን ዲዛ ዴሬቲ ዉሪካ ባቃቲዳ፤ ዙማቲካ ቤቲቤቴና። * ኣጁ 6፡14 21 ኢሲ ኢሲ ሻቺ ኦይዱ ታማኔ ኢቻሹ ኪሎ ጊዲዛ ሻቺ ሳሎፔ ዱጌ ኣሳ ቦላ ዎꬊዴስ። ቦቻዚ ዳሮ ኢታ ጊዲዳ ጊሽ ኣሳይ ሄ ሻቻ ቦሻ ጌዶን ፆሳ ጫዪዴስ። * ኬሳ 9፡23-24፤ ኣጁ 11፡19