ጳዉሎሲ ፂምቶሳስ ፃፊዳ ኮይሮ ኪታ.
1.
ኑና ኣሺዳ ፆሳን፥ ኑስ ሂዶታ ጊዲዳ ዬሱስ ኪርስቶሳ ኣዛዞን ሃዋሬ ጊዲዳ ጳዉሎሳፔ 
ኣማኖን ታስ ቱሙ ና ጊዲዳ ፂምቶሳስ ፆሳ ኑ ኣዋፔ ኑ ጎዳ ዬሱስ ኪርስቶሳፔ ኪያቴꬅ፥ ማሮቴꬂኔ ሳሮይ ኔስ ጊዶ። 
ታኒ ማቂዶኒያ ባሼ ኔና ሃዳራ ጊዳ ማላ ሃይሳፌ ሲንꬃን ኢሲ ኢሲ ኣሳቲ ዎርዶ ቲሚርቴ ታማርሶንታ ማላ ኔ ኣዛዛናስ ኤፌሶኔን ዳሻ። 
ቃሴካ ኣሳይ ዮቲን ዉሮንታ ቤኒ ዎዴ ሃይሲዔን ባ ዎዴ ዉርሶንታ ማላ ኣዛዛ። ሄይታ ማላ ዮዖይ ፓላማ ዴንꬄꬄስ ኣቲን ኣማኖን ኦሴቲዛ ፆሳ ኦሶስ ኣይኮካ ጎዔና። 
ሃ ኣዛዞዛስ ዋና ኣይፌ ዮዖይ ጊዲኮ ጌሻ ዎዝናፔ ሎዖ ቆፋራ ሄሳꬆካ ቱሙ ኣማኖፔ ቤቲዛ ሲቆ። 
ኢሲ ኢሲ ኣሳይ ሃይታፔ ፖቂ ኤቂዲ ጎዓይ ባይንዳ ዮዖታኮ ሲሚዴስ። 
ዎጋ ታማርሲዛይታ ጊዳና ማላ ኮዬቴስ። ጊዲኮካ ኢስቲ ባ ዮቲዛይሳ ዎይኮ ኬሂ ሞቴቲዛ ዮዖዛ ሎዔꬂ ኤሬቴና። 
ጊዶ ኣቲን ኣሲ ማራን ጎዔቲዛኮ ዎጋይ ሎዖ ጊዲዳይሳ ኑ ኤሮስ። 
ቃሴካ ዎጋይ ኢሜቲዳይ ፂሎ ኣሳስ ጊዶንታ ዎጋ ዬꬊ ኣꬊዛይታስ፥ ኣዛዜቶንታይታስ፥ ፆሳስ ባቦንታይታስ፥ ናጋራንቻታስ፥ ጌሻቴꬂ ባይንዳይታስ፥ ፆሴ ሌቂዛይታስ፥ ባ ኣዮኔ ባ ኣዋ ዎꬊዛይታሲኔ ሼምፖ ዎꬊዛይታስ ጊዲዳይሳ ኑ ኤሮስ። 
ሄሳꬆካ ላይማቲዛይታስ፥ ኣዴራ ኣቂዛ ኣዴታስ፥ ኣስ ባይዚዛይታሲኔ ሻሚዛይታስ፥ ዎርዳንቻታስ፥ ኣሳስ ዎርዶራ ጫቂዛይታስ፥ ሎዖ ቲሚርቴራ ኤቄቲዛ ኡባታሳ። 
ሄ ሎዖ ቲሚርቴይ ኣንጄቲዳ ፆሲ ታስ ሃዳራ ኢሚዳ ቦንቾ ሚሺራቾ ቃላራ ጋጊዛይሳ። 
ታና ባ ኦሶስ ሹሚዲኔ ኣማኔቲዛዴ ኦꬂ ኤኪዲኔ ታስ ሚኖቴꬅ ኢሚዳ ኑ ጎዳ ዬሱስ ኪርስቶሳ ታ ጋላታይስ። 
ሃይሳፌ ካሴ ታ ኣይ ማላ ኣስ ጫዪዛዴኔ ጎዴꬂዛዴ፥ ቃሴ ማካላ ኣስ ጊዲኮካ ሄሳ ታ ኤሮንታኔ ኣማኖንታ ዳሼ ኦꬂዳ ጊሽ ፆሲ ታና ማሪዴስ። 
ዬሱስ ኪርስቶሳፔ ጊዲዳ ኣማኖራኔ ሲቆራ ኑ ጎዳ ኪያቴꬅ ታስ ኬሂ ዳሪዴስ። 
ዬሱስ ኪርስቶሲ ናጋራንቻታ ኣሻናስ ዱጌ ሃይሳ ሃ ኣላሜ ዪዴስ ጊዛ ቃላይ ቱማኔ ኣሲ ዉሪካ ኤካናስ ቤሲዛይሳ። ናጋራንቻታፔካ ኣꬊዛ ናጋራንቻይ ታና። 
ጊዶ ኣቲን ታ ማሬቲዳይካ ዬሱስ ኪርስቶሲ ዛዋይ ባይንዳ ባ ዳንዳያ፥ ኡባፌ ኣꬊዳ ናጋራንቻ ጊዲዳ ታ ቦላ ቤሲዳይ ኢዛን ኣማናናይታሲኔ ሜርና ዴዖ ዴማናይታስ ሌሚሶ ጊዳና ማላ። 
ሄሳ ጊሽ ሜርናስ ሃይቂ ኤሮንታ፥ ኣይፌን ቤቲ ኤሮንታ ባርካ ፃላ ፆሴ ጊዲዳ ካዎስ ሜርናፔ ሜርና ጋካናስ ኢዛስ ቦንቾይኔ ጋላታይ ጊዶ። ኣሚን። 
ታ ና ፂምቶሳ ኔ ጊሽ ካሴቲዲ ዮቴቲዳ ማላ ሃይሳ ኣዛዞዛ ታ ኔስ ኢማዲስ። ሄሲካ ኔ ሄ ቃላ ካላሼ ሎዖ ባፄ ባፄታናሳ። 
ኣማኖይኔ ሎዖ ቆፋይ ኔስ ዴዖ። ኢሲ ኢሲ ኣሳቲ ባ ሎዖ ቆፋ ዬꬊ ኣꬊዲ ኣባ ቦላ ሜቶይ ኢዛ ቦላ ጋኪን ዋዬቲዛ ማርካቤ ማላ ባ ኣማኖ ꬋይሲዳ። 
ኢስታ ጊዶን ፆሳ ጫሽ ኣጊዲ ታማራና ማላ ታኒ ፃላዔስ ኣꬃ ኢሚዳይቲ ሄሜኔዎሲኔ ኢስኪንዲሮሲ ዴቴስ።