1 Ghau rana kulagu tana taluutuni, na pukuna tara subo tua na lei prophet sorisori tara va mai tana maramana ke, kau bei taluutuni udolura gea rahei kara bosaa tara lavia tua nina Tarunga Tabu God. Ma kau tabotaboa na hava tara taraighau nia, ge kau ghilala vakodo utoa nina Tarunga Tabu God te utuni tadira, pe taho. 2 Mi ani kau nea na ghilala kaleana ahei te lavi utunia nina Tarunga Tabu God, ahei ke kokoe kalea gaia Jesus Christ te mai tinoni me loghoa na huli te vaghaghita ke, agaia keri te loghoa nina Tarunga Tabu God itatana. 3 Hauva ma hei na prophet vaghana ke bosa, a Jesus Christ te mua mai tinoni iani tana maramana, na prophet eni te mua loghoa nina Tarunga Tabu God ilokana. Na tidalo sorisori ilokana na tinoni keri, te va mai tua tana ghana levunimate Christ.* levunimate Christ Greek = Antichrist - na tinoni te mai bosa vilivokaa Christ. Erua na ahana Satan. Mau rongovia tua na ghana levunimate Jesus Christ ke mai i kise, hauva mi taeni gaia tua iani tana maramana.

4 Ghau na lei dalegu tana taluutuni, ighau nina vure God, mau laga vulera tua na lei prophet sorisori, mau sonikehai didira na tarai, na pukuna na Tarunga Tabu te ghaha ilokamiu. Mana Tarunga Tabu te laga vulea nina maana Satan, te vunaghi pungisira rahei tara mua ghilalaa God. 5 Rana prophet sorisori tara mua ghilalaa God, mara nighi tarai na lei ghanaghana ni maramana vamua. Mana pukuna eni, rana vure tara mua ghilalaa God ke, ge ra holopangotighi didira na lei tarai. 6 Hauva, ighai nina manevetena God, mi ghai tai loghoa nina maana. Ma rahei tara ghilala God ke, ma gaira kara taonia nimami na tarai. Hauva rahei kara mua nina vure God, kara mua taonia nimami na tarai. Keri ke, ma eni te talutatea vanighita rahei tara loghoa na Tarunga Tabu te utuni, ma rahei tara loghoa na tidalo dika ilokadira.

7 Ghau rana kulagu tana taluutuni, ka nia tona haliu na veidolovi na pukuna na dolo te butu mai ta God. Ahei te dolovira na lei tinoni ke, gaia na dalena God, ma gaia te ghilala God. 8 Ma hei ke mua dolovira rana vure ke, me mua ghilalaa God, na pukuna God na puku ni dolo. 9 A God te talutatea nina dolo vanighita te vagha eni, gaia te nia vetena mai na Dalena sosopa tana maramana ge ka lavia na vola kasila itatana. 10 Na puku ni dolo te va mai ta God. E mua na nilabu ighita ta nea vania God, hauva na nilabu gaia te nea vanighita. God te nia vetena mai na Dalena ge ke mate vanighita te vagha na vatei sukaghi tughuani na lei paluda.

11 Ghau rana kulagu tana taluutuni, na pukuna God te dolovighita te vagha keri, mi ghita ghua ka kabu veidolovi. 12 Sakai vamua te taho siki sakai te vaevanea God, me ke vagha ka sopa veidolovi ke, gaia te righikalea te vagha God te kabu itatada, ma nina dolo God ke gonighi na hava te liona. John 1:18 13 Mi ghita ta ghilala God te sakaisonikolu itatada, mi ghita itatana gaia, na pukuna gaia te vaheghita mai nina Tarunga Tabu. 14 Ighai tai vaevanea na Dalena God nia na matamami, mai tughunitatea vanira na lei tinoni, God Tamada te nia vetena na Dalena ge ke vavolaa na maramana. 15 Ma rahei kara tughunitatea Jesus agaia Dalena God, God ke kabu itadira ma gaira itatana God. 16 Keri ke, mi ghita ta ghilala utoa God te dolovighita, mi ghita ta taluutunia ge ke dolovighita haia.

God na puku ni dolo, ma rahei tara dolovia haia God mana lei tinoni ke, gaira tara kabu sakaisonikolu ta God, ma God te sakaisonikolura gaira. 17 Me te vagha ta ghahaghita itatana God ke, dida na dolo te totolo, me maemanea na volada, ge ka mua mataghunia God tana bongi ni dete. Ge ka tughuru tana matana God nia na liosakai, na pukuna ka kabu taonia na volana Christ tana maramana eni. 18 Ahei te ghilala God te dolovia, gaia te mua mataghunia God na pukuna, tana bona nina puku ni dolo God te ghaha tana volana ke, gaia ke mua tangomana ge ke mataghunia. Balu vure tara mataghunia God, na pukuna tara ghilala God ke detera. Na pukuna keri, siki sakai ke mataghunia God ke, mi ghita ta ghilala nina dolo God te mua ngasi mua tana volana.

19 Ighita ka sopa veidolovi na pukuna agaia God te diki dolovighita tua. 20 Ma ge siki tinoni taluutuni ke ghaghua, “Inau tu dolovia God,” me ke nia sika so na tinoni taluutuni ke, mana tinoni keri te kiko vamua. Ke vagha ke mua dolovia na tinoni te righia nia na matana ke, me ke mua tangomana ge ke dolovia God te mua righia nia na matana. 21 A God heghena te vaheghita mai na vetena eni, “Ahei te dolovia gaia, ke dolovira ghua na lei tinoni taluutuni.”