1 Inau ku holoutogho, Lord, na na tobagu udolu;

mi nau ku bosa tatei na lei totobo te haeharegha to gonighi.

2 Mi nau ke vonughiu na togo na pukuna ighoe.

Mu ku linge holohaba vania na ahamu, aghe na Puku ni Haba.

3 Na ghagua na levunimate kara ririu keha ma kara tona keha;

na pukuna gaira tara laga vulera,

mara havukaghinira i naghomu.

4 Na pukuna ighoe to dete maemane

ta nigua na levu; mi tana malei kabumu,

ighoe to nia hevei na dete kaekage.

5 Ighoe to tughuru pungisira na lei kema

me havukaghinira na tangohahi;

mo ghuduri kehai na ahadira ke va me vaa.

6 Na ghagua na levunimate tara topou nia na mateagu;

hauva mana komudira te parihai.

Sughua didira na vatei ghanaghana oli

tara vuti kehai na lei komu tara sivi.

7 Ma nina uhuhuli Lord ke va me vaa;

ma nina dete ke tona haliu tana malei kabuna.

8 Agaia ke detea na maramana nia na maemane;

me ke uhulira na lei kema taonia na hava te kaekage.

9 Ma Lord ke ungaunga vanira ara hei tara uhulira nia na vahaghitaili,

agaia na ungaunga tana bona ni aho ni vahola.

10 Agaira ara hei tara ghilala na ahamu mara taluutunigho ighoe,

a Lord, ko mua tangomana ge ko tona keha itatana siki sakai te kene taonigho.

11 Linge holohaba vania Lord ilokana Jerusalem.

Bosa vania na maramana te mua nia ponolio na hava te gonia.

12 Ma gaia te vahea na vahaghitailia

ahei te mate tinoni, me righitaonira tara bona.

Me mua nira ponolio ara hei tara

ngangaraha vania nia na hahanga.

13 Lord, ko aroviu.

Righia ivei te vagha tu nea na vahaghitaili

tana limadira ara hei tara kanahaghiniu.

Ko lavikehau tana mate Lord.

14 Ko vavolau, ge ke tangomana na holohabaamu tana mavitu,

tana mataulana Jerusalem,

ge ku togotogo na pukuna ighoe to vavolau.

15 Na lei kema tara kutu horu ilokani na lei gilu

tara ghelighi vanira rana keha.

Ma gaira tara hogho oli heghedira ta didira na vugho.

16 Ma Lord te ghilala tua nina na maemane.

Marana tangohahi tara hogho heghedira ta didira na tangohahi.

17 Rana tangohahi kara tona horu tana gilu ni mate.

Aeni gaia na kakalena vanira na lei kema tara mua ghilala God.

18 Ma gaira tara lio ni hahanga

kara mua ghoi nira ponolio tua ke va me va.

Ma didira na ghanaghanadila rana bona kara mua ghoi sonikeha.

19 Tughuru dato age Lord!

Mo ko bei lubatira na lei tinoni tara mua liona na taoniamu!

Mo ko lubatira na lei kema ge kara dete ta nimua na kinakabu.

20 Ko nera ge kara nia ribe na mataghu, age Lord.

Lubatira ge kara ghilala agaira na tinoni gogoni vamua.