1 Itamua, Ghe Lord, ku talu datoa nigua na kokoeliulivuti.

2 Nigua na God, inau tu varava itamua!

Ko bei lubatiu ge ku maa,

mo ko bei lubatira na ghagua na levunimate

kara nia rivurivu na lagavuleagu.

3 Gaira tara varava itamua kara mua nia ma siki totobo,

gaira vamua tara nia lutu na kiko kara maa.

4 Tughunia vaniu na halautu ku liu ga, Ghe Lord;

Tuhua vaniu na halautu maemane ku taonia.

5 uhuliu nia nimua na utuni mo ko taraiu

na pukuna ighoe na God to vavolau.

Inau tu talua nigua na ghanaghana kodo itamua tana dani udolu.

6 Ko ghanaghanaa, Ghe Lord,

nimua na dolo mana veiarovi te mua soko buto,

to tatea vanira mai tua na lei vavata idania.

7 Ko talukehai na lei palugu vuivuni tana pileagu mai;

taonia nimua na dolo ko ghanaghanau

na pukuna ighoe to veiarovi, Ghe Lord.

8 a Lord te uto te gonighi na lei totobo maemane

me taraira tara tangohahi nia na halautuna.

9 Gaia te uhulira nia na hava e maemane tara talumuri,

me taraira nia na halautuna.

10 na lei halautuna Lord tara dolo mara utuni,

vanira rahei tara righitaonia na hava te liona ta nina baubahu.

11 Na talumava vania na ahamu,

“Ghe Lord, Ko talukehai na lei palugu tara subo ngangata.

12 Ahei gaira tara mataghunia Lord?

Gaia ke tuhua vanira na halautu te vilia vanira.

13 Gaira kara kabu tana lei lologho sule tana lei bongidira,

mana lei daledira ghua kara lologho tana komu baubahu.

14 Na tamakulani kolua Lord te kabu dila vanira rahei tara mataghunia gaia.

Gaia te tatea vanira nina baubahu te talu polo dilaa.

15 Na matagu te righia haia va Lord ge ke hangau.

Na pukuna gaia vamua ke tangomana na vavolaagu,

ta didira na taripiti na ghagua na levunimate.

16 Ririu vaniu mai mo ko aroviu,

na pukuna inau heghegu ilokana na vahaghitaili sule.

17 Na lei gunaguna tana tobagu tara subo mara dika va,

Ko aroviu ta nigua na dikalio te vahaghitailiu.

18 Righighi nigua na vahaghitaili mana gunaguna,

ko talukehai na lei palugu.

19 Righia na subodira na ghagua na levunimate,

ra niu sika mara niu ghighirou.

20 Righitaonia na volagu mo ko vavolau;

ko bei lubatiu gea ge ku maa,

na pukuna inau tu varava itamua.

21 Lubatia na kabu marabu ke pilupungisiu,

na pukuna inau tu talua nigua na ghanaghana dila itamua.

22 Huiolia Israel Ghe God, ta nina na lei gunaguna.