1 Ko niu pala, Ghe Lord, itadira tara veitotoghoni koluu

ko vesera ara hei tara veseu inau.

2 Ko tabe na tako mana kadu; gonidila ni vese,

mo ko mai niu pala kolu.

3 Ko tabe datoa nimua na tinabe:

mo ko pitudilara tara sama taoniu:

bosa vania na tarungagu:

Inau nimua na mana ni vola

4 Holara va tana mamahaghi

mana dika ara hei tara kenea na mateagu:

Ko ririu oli mo ko talura tana ma lei totoro,

gaira tara nia dete kolu na mateagu

5 Lubatira vagha na gavu te ghuru kehaa:

ma nina tarunga vetena Lord te tuva vokara.

6 Talana na halautudira ke pui me ke madali:

ma nina Tarunga Vetena Lord ke ghuru kehara.

7 Sakai vamua tu mua goni hahia vanira siki totobo;

ra talu vughogu so,

sakai vamua tu mua goni hahia vanira siki totobo dika,

ra gheli gilugu so ge kara mateu ga.

8 Ko lubatira na mate ribehaghi vania,

maia na vugho te nia polo,

ge hogho haghe heghena ga,

me ke kutu haghe heghena tana ghilu te ghelia.

9 Mana tabogu ke togotogo tana Lord:

me ke nia rivurivu ta nina maana ni vola.

10 Na lei huligu kara bosa:

Lord hei te vaghagho ighoe,

To volara tara bona tatana gaia keri te laga vulea va?

Eo, tara labe mara dikalio tatana tara nea

ge gonia na holaana na lei hava tara loghoi.

11 Ra hei tara huru kikou tara tughuru dato:

ra pilighi mai vuvungagu na lei totobo inau tu mua pukui.

12 Ra pelu olia nia na dika na hava te uto tu gonia:

me gunalia na tobagu.

13 Mi tana bona tara vahaghi ke:

Inau tu nira tangi, mu nira talukau,

mu kokoeliulivutira so ma nigua na kokoeliulivuti

te oli mai vamua itagua.

14 Mi nau tu dika lio:

vaghau tu nira dika lio na hoghogu pa sakai ta nigua na binaboli,

mu ulu horu, vagha siki sakai te tangihia tinana te mate.

15 Mi taeni tara togo na pukuna tu ghanau tana vahola

ra savukoluu na lei tinoni mana vure keha

tu mua ghilalara tara ghaeghahe

mara mua beto na ghahelaghiniagu.

16 Na lei tinoni tara mua nia kikinima God

tara lavi mamaagu mara girigirighi vaniu nia na livodira.

17 vei vaho ke vagha eni Lord ge ko soni vaghini matamu mai: Ko righitaoniu tadira tara goni dila ni kanahaghi niagu. Mana volagu tu dolovia tadira na bolo ghaghala.

18 Ku holoutogho inaghodira na vaukolu ni mavitu

mu ku holohabagho tana ovu ni vure subo.

19 Ko bei lubatira ghagua na levunimate

ge kara laga vuleu nia na kiko;

ma rahei tara kanahaghiniu kara bei batobatou gea.

20 Ra mua nia kokoe na mabo:

Ra kisu ghadira mate mara mamimamira nia na sori

ara hei tara kabu tana komu.

21 Ra vukesia na mangadira mara ghaghua,

“Aha! Tai righia nia na matamami te gonia.”

22 O righia tua eni ke Lord:

ko bei todore gea mo ko bei sagauviu

gea ghua ighoe nigua na Lord.

23 Ko rarai mai; mo ko detedetea nigua hahi,

ko lavi tughu ta nigua na hahi,

Ighoe nigua na God mana Lord.

24 Ko talutatea tu mua hahi Lord nigua na God:

Ko bei lubatira ghagua na levunimate

ge kara kia haghiniu nia nigua na hahi.

25 Ko bei taladia gea ge kara bosaa tana tobadia,

“Righia a lavia tua na hava ta liona tatana.

Mai ma ka sonomi na volaa tana kutuda.”

26 Gaira tara togotogo na pukuna inau tu vahaghitaili,

me uto vanigho ge kara maa ma ka bule

mu liodira ra hei tara bosa tara uto vuleu inau

Kara haba ni maa va,

ma kara vaevane vesikana tana mata ni tinoni.

27 Ra hei tara liona ngangata ge ku talu tateu inau sakai na tinoni uto,

kara togotogo ma kara ghaeghae dato.

E uto ge kara ghaeghahe dato haia te vagha ke,

God te haba vule ngangata,

me ke nia togo nina tinoni ni lutu te kabu tana vola te uto.

28 Mi nau ku bosa tatea na nilabumu te maemane

mi nau ku holoutogho haia tana lei dani,

vuivuni tara puipungi me ke saravia na bongi.