57
Vania na tinoni te gehe linge: nina linge David, tana bona te ghogho sania a Saul me va polopolo ilokana na vatuluma. Linge taonira na hulu (tangi na linge) “ko bei haurake.”
1 Ko aroviu, Ghe God, Ko aroviu!
Inau tu kene taonia a nimua na pilupungisi.
I sarana na ungaunga ni ghatamu ku polo,
koekobe ke soko tahaliu na maraghata dika.
2 Inau ngangaraha dato vania God te haba vule,
vania gaia ge ke vakalei nina lei ghanaghana dila vaniu.
3 A gaia God ke nia hevei horu vaniu mai
nina na hahanga ni kokou ge ke vavolau nia.
Ge ke lavi kehau itadira agaira tara rughuhoru mai ge kara lakusau.
A nigua na God ku nia hevei vaniu mai nina dolo mana utuni ke mua soko buto.
4 Na lei bolo ghaghala tara ruturutu tara talighutiu.
Na livodira tara vavangalua vaghai na tinabe ma kuali,
mana lapidira tara kuikurisi vaghai na lei isi.
5 Ko haba vule, Ghe God, vulei kinakabuni kokou tara haba vule dato.
Na mararamu ke mararaa na maramana talighu.
6 Na lei ghagua na kana tara lohi dalau na piti ni tarikauagu.
Na kanoragha te nia veveru na huligu.
I ghobuna na halautugu tara ghelia na gilu sule,
Hauva ma gaira heghedira sono tara tumu haghe ilokana.
7 Na tobagu te ghanaghana kodo itamua, ghe God,
mughua ge u tangomana nigua na lei linge ni holohabamu.
8 Ko rarai, ghe na tarungagu.
ko rarai, Ghe na ghalo ni titigi ghalevu mana ghalevu ghalo.
Inau ku nia rarai labota nigua na linge.
9 Ghe a Lord, Inau tai holoutogho tana matadira na lei tinoni soko
Inau ku lingei na vatei holohabamu ighobuni na lei kema.
10 Nia nimua na dolo te mua soko buto
te datogha vagha na kokou mana parako.
A nimua na puku ni utuni te saravighi na lei ghoghopa.
11 Ko haba vule, Ghe God, vulei na lei kinakabu ni kokou tara datogha au vule.
Mana mararamu ke mararaa na maramana talighu.