1 Ghe God, Ivei vaho tua te vagha na mavana na holohaba ia,

a nimua na holohaba i Zion.

Ighai kai vakalei a nimami na lei baubahu vanigho.

2 Nia ighoe to bosa tughuni nimami na lei kokoeliulivuti,

mana vure subo udolu kara kokoe mai itamua.

3 Na palu te vonughighi na tobamami,

ko talu keha udolui vanighai.

4 Ivei vaho tua te vagha na togotogo va

vanira ara hei to vilira ge kara lavi dutuvira mau itamua.

Agaira tara kabu ilokana nimua na bona tabu.

Vaho tua te vagha na togotogo

tu gonidila vanighai ilokana nimua na vale ni kokoeliulivuti te tabu.

5 Ghe God, na vavolamami, Ighoe to bosa tughu nimami na lei kokoeliulivuti nia na lei gehegehe ni talumava.

Ara hei soko tana maramana tara ghanaghana dilagho ighoe

Haba va rahei tara tona sagau tana tahi oka.

6 Ighoe to vuhai na lei ghotu nia nimua na maana

mo voko pungisia nia na hulimu vaghaa na lei totobo ni gehemate,

na laga te au vule.

7 Ighoe to va betoi na lei tangitangi ni tahi oka,

kolui na lei tahi karaha

tara malumaluate ma didira na ghughu na lei kema to va holoi.

8 Agaira tara kabu tana sosokona na maramana

tara tughuru ilokana na talumava nia

nimua na lei gehegehe te haeharegha.

vuivuni ivei te va sogha mai ga na aho ritini te va hu iga,

Ighoe to tabe datoi na lei ghuughuu ni togotogo.

9 Ighoe to vulivulia mo righitaonia na maramana,

O nia ge sosodo me varangagha.

A nina na lei daidari a God kara mua mamaha

Gaira tara nia hevei na mola ni vuavua tana bona ni siosio,

te vagha to arelavaghinia Ighoe ge ke ghaghua iga.

10 Ighoe to nighi na lei bona ni Subasuba

tara maghura babui ge so bongighi na beti nia na uha,

Te oboi na lei ghotughotu me taotaoni na lei tatetate.

Ighoe to malua tea na maramana nia na kabu

mo vautoi na lei vuavuana tara subo au vule.

11 Ighoe to vahea na pitiulu ni togotogo na niulu

nia na mola ni ghegheli mana siosio;

Sughua na malei sakutua te ngutu te vonughia me au vule.

12 Na tautalu asi te liliu me vaghaadira na buburu maumauri na lei maumanu,

mana lei lighilighi ni ghotu te vonughighi na togotogo.

13 Na lei bona okaa ni buburu maumauri tara pupulua nia na lei ovuovu ni Sheep,

mana boboko tara harai nia na vuavua.

Agaira udolu tara ghaeghahe dato mara nia lingelinge na togotogo.