1 E utuni God te dolovira rana Israel,

Ma gaira ghua te marabu na tobadira.

2 Hauva mi nau eni te dutuvia na sivi nigua na ghanaghana mava:

Me kukulu tua nigua na taluutuni.

3 Na pukuna tu nira ghaghana rana talu nagho

Tu righira rana dika te uto vanira na vola.

4 A gaira te mua kalera siki vahaghitaili.

Tara laga mara vola uto so.

5 te mua kalera siki gunaguna,

mara mua sodoa na vola te vaghara na balu.

6 Te haghavira na talunagho na tobadira,

mana haurake te saopoa na voladira.

7 Tana tobadira te va rughu horu mai na dika.

mi tana liodira tara nighi viri na lei ghanaghana te mua marabu.

8 Ma gaira tara kia haghinira na vure, mara bosa dikalara,

Na talu nagho te nera ge ra dikalara na balu vure.

9 Ma gaira tara bosa dikalaa God i kokou:

mara bosa ke, ma gaira tara vunaghina na maramana talighu ghua.

10 Keri vaho ge a nina vure God tara vuha ririu vanira,

Mara lioni ngangata na taluutuniani na lei totobo tara bosai vanira

11 Ma gaira tara bosa, “Ke mua ghilalai God na hava ta gonighi.

Gaia na puku ni haba ke mua kenei.”

12 Keri tara ghaghua igaa rana dika:

“te uto vanira so na vola, me sule so didira na lologho”

13 E taho na pukuna tu mata reireia na kabu uto.

Mu mua gonia siki totobo te hahi.

14 God tana dani udolu to neu ge ku kabu vahaghitaili,

Mo neu na totoro tughu puipungi.

15 Ma ge Inau ku bosai na lei bosa raeni ke:

Mi nau tu perora vamua na lei kulamu na vure.

16 Keri ke ge inau tu tabotabo na kene ghanaghana

na hava na pukuna ge ra tangomana na vure tangohahi.

hauva ka, me vahola ngangata vaniu ge ku ghilalaa.

17 Mi ta sakai bongi vaho tu va haghe ta nimua na vale tabu,

keri vaho ge ghilala na hava ke kalera na vure tangohahi raeni.

18 E utuni, Ighoe to talura tana halautu te madali,

mo nera ge ra turi dororo tana tigetige mara tumu pari haia.

19 Na viti tua mara dudura horu:

na mataghu te nera ge ra haurake.

20 Na voladira te vagha na maturu bole vamua:

to rarai tana puipungi mo nia ponolio tua.

21 Me vaho ge u ghanaghana olia ivei te vagha na dikaagu inau.

Ivei te vagha na vahaghitaili tu righighi mai tua tana bona tu ghahau iga.

22 Inau tu bule mu vatei sikagha,

mi nau te vaghau na maumanu te mua manahagha itamua.

23 Hauva mi nau tu kabu dutuvigho haia so,

mo tabea na lima madologu.

24 Mi ghoe ko righi taoniu haia nia nimua na lei bosa ni vetena:

tana sosokona ko holopangotiu nia nimua na ghanaghana mava.

25 Ma ahei vaniu i kokou, mi ghoe vamua?

mu tu lologho tua ke, ma hei ku ghoi loghoa ghua iani maramana?

26 Na huligu mana tobagu kara labe sughua:

ma God vamua na lagana na tarungagu

Gaia te nigua kasila.

27 Ma gaira tara ghogho sanigho kara taghara:

mi ghoe ko durakera tara mua taluutunigho.

28 Mi nau eni te uto vaniu ku varava ta God,

ma gaia a Lord ke pilu pungisiu;

mu ku ladavaghinighi na lei totobo haeharegha te gonighi.