LINGE.
31.
Itamua ku talua gatu nigua na ghanaghana ghe Lord. Ku mua nigho maa gea na pukuna ighoe to maemane talau 
Ko gegevaghi kulimu mai tagua. Ighoe nigua na vatu ni ahevata Kara mua sodou ga ghaghua na levunimate. 
Ighoe ko vatu ngasi vaniu, nigua na vatei ahevata ge ku pologa. 
Ko hola keha na vugho tara taludila ghaghua na levunimate ge kara mateu nia. Ighoe vamua nigua na pilupilu. 
U talua na tarungagu tana limamu, Ko hola horuu mai tana mate, Ighoe God to maemane. 
U mua liodira ara hei tara holohabara na lei titinoni na pukuna tu ghanaghana kodo tatana Lord. 
E sule ngangata nigua na togotogo na pukuna nimua na dolo te tona haliu so, mo righighi na lei nigua na vahola. 
Mo mua lubatiu va tadira ghagua na levunimate mo laviu va so tana bona te tatavahale. 
Ko aroviu, ghe Lord, na pukuna tu ghau tana vahola na matagu te kukurodo na pukuna na kolobu ni matagu, na huligu mana tarungagu tara labe. 
U nia tangi na dika lio, na niulugu te kukulua nigua na dika lio. 
Ghagua na levunimate tara batobatou, ma rana ghagua kulagu na komukolu tara pasapasau, ma sughua rana kulagu tara mataghu na mai dutuviagu 
Ra righiu vaghau tu mate vagha na popo te taboha. 
Na lei kokoe tu rongovighi tara nei vaniu me talighutiu na hava te mua uto. Ghagua na levunimate tara mua liogu, ra kenea na mateagu. 
Lord inau tu ghanaghanagho so, Ge u bosaa. “Ighoe nigua na God.” 
U talua tana limana ivei ku ghoi ghaghua mai ko volau tadira tara mua liogu. 
Lubatia nimua na veiarovi ke hinaria nimua na tinoni lutu, nia nimua na dolo ke volau 
Lord, ko bei lubatiu ge ke vatei aroviagu, mu hologho so ge ke hangau, mo ko nera tara dika ge ke vatei aroviadira ma kara koli tana gilu vaghara na tinoni mate. 
Na ghidudira te sori ke todore, gaira tara talunagho mara hurura na maemane ke bei bosa na hava. 
E sule ngangata nimua na lutu. O talu dila nimua na vauto vanira tara talu mavagho mo gonia vanira na hava tara mai tamua, mo ko vautora tana maramana eni. 
Mo polara sarana nimua na malei righitaoni tadira tara mua liodira. ko polora sarana nimua na malei righitaoni sagauvira na manga tara hurura nia 
Holoutoa Lord, te tatea nina dolo vaniu, te righitaoniu tara suravia na komugu. 
Nigua na mataghu, tu ngangaraha dato vania ra pusi kehau tatana Lord Hauva mo rongoviu so nigua na tangi ni veiarovi, me bosa tughuna nigua na hoholo ni hahanga. 
Kau dolovia Lord ighau rana maemane pile. Ma Lord ke righi taonira tara varava ngasi tatana na pukuna ara hei tara mua varava ngasi tatana ke torora. 
Ka laga ma kau tughuru ngasi. Ighau tau talua nimiu na ghanaghana kodo tatana.