Na Rongorongo Uto Nina Jesus Christ na Tabu Matthew Te Gerea.
1.
Raini na lei tinoni tana vavatana Jesus Christ na vaivarina na Vunaghi haba David gaia na kemana Abraham. 
Abraham tamana Isaac, ma Isaac tamana Jacob. Jacob tamadira Judah mana lei hoghona. 
Judah tamadira Perez ma Zerah, ma tinadira Tamar. Perez tamana Hezron. Ma Hezron tamana Ram. 
Ram tamana Amminadab. Amminadab tamana Nahshon, ma Nahshon tamana Salmon. 
Salmon tamana Boaz, ma tinana Rahab. Boaz tamana Obed, ma tinana Ruth. Obed tamana Jesse. 
Jesse tamana David na vunaghi haba. Mana Vunaghi haba David tamana Solomon ma tinana na tauna Uriah. 
Solomon tamana Rehoboam, ma Rehoboam tamana Abijah. Abijah tamana Asa. 
Asa tamana Jehoshaphat. Jehoshaphat tamana Jehoram. Jehoram vaivarina Uzzah. 
Uzzah tamana Jotham. Jotham tamana Ahaz. Ahaz tamana Hezekiah. 
Hezekiah tamana Manasseh. Manasseh tamana Amon. Amon tamana Josiah. 
Josiah kukuadira Jehoiachin mana lei hoghona tara kabu sasara i Babylon. 
Mi murina tua tara kabu sasara i Babylon. Jehoiachin tamana Shealtiel. Shealtiel tamana Zerubbabel. 
Zerubbabel tamana Abiud. Abiud tamana Eliakim. Eliakim tamana Azor. 
Azor tamana Zadok. Zadok tamana Akim. Akim tamana Eliud. 
Eliud tamana Eleazar. Eleazar tamana Matthan. Matthan tamana Jacob. 
Jacob tamana Joseph, mana tauna Mary te vahua Jesus tara holoa nia na Christ. 
Ra hangavulu vati na vavata te vuivuni ta Abraham me riti ta David, maia hangavulu vati na vavata me riti tara kabu sasara i Babylon. Me ghoi hangavulu vati na vavata ghua me ritini tana vahuana na Christ. 
Aeni te ghaghua iga na vahuana Jesus Christ. Mary, tara anea vania Joseph ge ke tauna. Inaghona ge ro taulaghi, Mary te bohe, te nia liu mai tana Tarunga Tabu. 
Ma Joseph na mane te kabu maemane haia tana lei bongina, me mua liona ge ke nia maa Mary tana matadira na vure, ge ghanaghana ge ke nia vetena keha. 
Mete nea na ghanaghana te vagha eni, nina angel a Lord God te tate vania tana maturubole me bosa vania, “Joseph, vaivarina na Vunaghi haba David, ko bei ghanaghana ruarua. Ko tauna Mary na pukuna na meomeo itatana te nia liu mai tana Tarunga Tabu. 
Agaia ke vahua na meomeo mane, mo ko vatua nia Jesus, na pukuna gaia ke vavolara na lei tinoni tana lei paludira.” 
Na lei totobo raeni te kalei na hava God te bosai vania na prophet Isaiah idania, te ghaghua, 
Na tahula marabu ke bohe me ke vahua na meomeo mane, ma kara holoa nia Immanuel. Na ghanaghana ilokana ke, ‘God itatada.’ 
Ma Joseph te rarai, mi murina mai ge tauna Mary, te vagha nina angel a Lord te bosaa vania. 
Me mua nia kolikolu polo ge vahua na meomeo mane, me vatua nia na ahana Jesus.