Bwób Zitül.
10.
Ini Noan simanal olmalab ngiko, Syem, Am, akó Zeipet, akó i nibiób balngenóp naiz kakóm. 
Zeipetón simanal olmalab ngi idipako: Gomerr, Magog, Madae, Zaban, Tubal, Mesek, akó Taerras, tibiób olmalbobatalpükü. 
Gomerrón olmalbobatalab zitül we kla kwarilürr: Askenaz, Rripat, akó Togarrma, tibiób pamkolpampükü. 
Zabanón olmalbobatalab zitül we kla kwarilürr: Ilaesya pamkolpam, Tarrsyis pamkolpam, Kit pamkolpam, akó Rrodes pamkolpam. 
Da olgab bürrgrrütóp, ngiIsbürra malu kabedó akó ngibürra kaodó we barselórr. Zeipetón olmalbobatal we kla kwarilürr. I blamana zitül-zitül we ngyabenónóp tibióban tüpdü, akó ibü ta tibióban bóktan asi kwarilürr. 
Amón simanal olmalab ngi idipako: Kus, Mizrra-im, Put, akó Keinan, tibiób olmalbobatalpükü. 
Kusün olmalbobatalab zitül we kla kwarilürr: Syeba, Abila, Sabta, Rra-ama, akó Sabteka, tibiób pamkolpampükü. Rra-aman olmalbobatalab zitül we kla kwarilürr: Syeba akó Dedan pamkolpam. 
Kus Nimrrodón ab yarilürr. Nimrrod tüób ini tüpan ngaen-gógópan wirri arüng gazirr pam yarilürr. 
Wa ta wirri arrak pam yarilürr ⌊Lodón⌋ obzek kwata, da i igósidi bóktan kwarilürr pambóka wagó: “Wa Nimrrodzan arrak pama Lodón obzek kwata.” 
Oya kingan balngomól bwóban ngaen-gógópan wirri basirr ngi módó kwarilürr: Babel, Errek, Akad, akó Kalne, Babilonia kantrridü. 
Olgab wa we wamórr ama Asirria kantrridü, ó wa ngibürr wirri basirr balmelórr: Ninebe, Rreobot-Irr, Keila, 
akó Rresen wirri basirr, Ninebe akó Keila, ibü aodóma. 
Mizrra-imün olmalbobatalab zitül we kla kwarilürr: Lud, Anam, Le-ab, Naptu, 
Patrrus, Kaslu (Pilistia pamkolpama noakagabi togobórr), akó Kaptorr, tibiób pamkolpampükü. 
Keinanón nis siman olom nis ilngumilürr: Sidon, oya ngaen olom, akó Et. 
Wa ta akó ibü abbobat yarilürr: Zebus, Amorr, Girrgas, 
Ib, Arrk, Sin, 
Arrbad, Zemarr, akó Amat, tibiób pamkolpampükü. Ene kakóm, Keinanón pamkolpama zitül-zitül we barsenórr, 
da ibü tüpa wirri bailürr, tai Saedon wirri basirrdügab, ama Gerrarr wirri basirrdübóna, tai kókó Gaza wirri basirr amrran, ó akó ama Sodom, Gomorra, Adma, akó Zebo wirri basirrdübóna, pamkolpama ne ngyabenónóp, tai kókó Lasa amrran. 
Amón olmalbobatal we kla kwarilürr. I blamana zitül-zitül we ngyabenónóp tibióban tüpdü, akó ibü ta tibióban bóktan asi kwarilürr. 
Syem, Zeipetón naret, wa blaman Ibrru pamkolpamab abbobat yarilürr. 
Syemón simanal olmalab ngi idipako: Ilam, Asyurr, Arrpaksad, Lud, akó Arram, tibiób olmalbobatalpükü. 
Arramón olmalbobatalab zitül we kla kwarilürr: Uz, Ul, Geterr, akó Mesek, tibiób pamkolpampükü. 
Arrpaksad Syelan ab yarilürr, akó Syela ma Eberrón ab yarilürr. 
Eberrón nis olom nisa tómtómórri: darrüpan ngi Peleg yarilürr, zitülkus oya ngyaben tonarrdó tüpan pamkolpama ugón syórr bangónórr. Oya zoretan ngi ma Zoktan yarilürr. 
Zoktanón olmalbobatalab zitül we kla kwarilürr: Almodad, Syelep, Azarrmabet, Zerra, 
Adorram, Uzal, Dikla, 
Obal, Abima-el, Syeba, 
Opirr, Abila, akó Yobab, tibiób pamkolpampükü. Ini blaman Zoktanón olmalbobatal kwarilürr. 
I ne tüpdü ngyabenónóp, tai igó wamlórr Mesya bwóbdügab ama Separr bwóbdübóna, podopükü bwóbdü, abüsa nólgabi banikda. 
Syemón olmalbobatal we kla kwarilürr. I blamana zitül-zitül we ngyabenónóp tibióban tüpdü, akó ibü ta tibióban bóktan asi kwarilürr. 
Ini blaman Noan olmalbobatal we kla kwarilürr; tibiób abankwata akó guankwata ini pebadó wialómórrónako. Naiz nae kakóm, blaman ini tüpdü pamkolpama ibükagab barselórr.