Duterronomi.
8.
Moses Isrrael pamkolpamdó bóktanórr wagó, “E tai kóbó gyagüpi amaiklamke, Lod yabü God ia tolngomólnónóp ini ⌊ngüin-koke bwóbdüma⌋ 40 pailüm, yabü ngi tüp alókóm akó yabü bapókóm müp tonarre. Wa inzan tonarr igósidi tómbapónórr yabü moboküp bapinüm akó basenóm, e ia oya gida bóktan poko amkoman mamoan kwarilnürrü, ta ia koke. 
Wa yabü ngi tüp elókórr inzan kwata, wa yabü aloan ngintinóp, da wa yabü mana alo-e ngabyólürr, yadi akó yabü abalbobatala ngaen ne alo klambóka umul-kók kwarilürr. Wa ini poko tómbapónórr yabü umul bainüm wagó, pama brredane koke ngyabene, a blaman ne bóktana bausdako Lodón taedógab. 
“A e ne gaodó nóma eloane, akó morroal müót nóma balmelane, akó mórran-mórran nóma bainane, 
akó yabü ⌊kau⌋, ⌊sip⌋, akó ⌊gout⌋ abün nóma bainórre, akó ⌊silba⌋ akó ⌊gold⌋ nóma abün bainórre akó blaman ne elklaza, 
e sab ikub bagürgu. Sab Lod yabü Godónbókama bamrükgu, yabü nótó yusürr Izipt kantrridügab, e leba zaget nóla kwarilnürrü. 
Wa yabü wató simarrulürr ene amkoman wirri akó gum-guman ngitan ngüin-koke bwóbdüma, balóng gwar akó walipwalipa ne ngyaben kwarilürr. Ene nae-koke bwóbdü, Lod naean kwat tapakurr karrkukus ingülküpdügab naea bókanóm yabünkü. 
Wa yabü mana alo we nilinóp alom ene ngüin-koke bwóbdü, yabü abalbobatal umul-kók ne alo klambóka kwarilürr. Wa yabü wirri müp ngyaben nókyenóp yabü ngi tüp alókóm akó bapókóm ugósüm, wa solkwat morroal ngyaben yabüka ia sidüde. 
E sab inzan bóktan-gu yabióbka wagó, ‘Mi mórreldómakla mibiób arüng akó mibiób tangab arüngdügab.’ 
Yabü ki ngambangólólón igó, Lod yabü God watóke yabü arüng nótó aliónda mórrel bainüm. Wa ene kla tónggapónda tóba ⌊alkamül-koke tónggapórrón bóktan⌋ karrkukus ainüm, wa yabü abalbobatal ne bóktan nókyenóp. Ene bóktan wata asine errkya, kazan bóktandóla.”