1 ኡባፌ ሲንꬃታዳ፥ ኣሳ ኡባስ ፆሳ ኦይቻናው፥ ዎሳናው፥ ጋናታናዉኔ ጋላታናው ቤሴይሳ ታኒ ኔና ኣኬኪሳይስ። 2 ኑኒ ቱማ ኣያና ዴዖኒኔ ጌሻቴꬃን ፆሳ ጎይኒሼ ሳሮቴꬃኒኔ ዎፑ ጊዳ ዴዖን ዳና ሜላ ካዎታሲኔ ሹማታ ኡባስ ዎሲቴ። 3 ሄሳ ሜላ ዎሳይ ኑና ኣሺያ ፆሳ ሲንꬃን ሎዖኔ ኡፋይሲያባ። 4 ፆሳይ ኣሲ ኡባይ ኣታናዳኔ ቱማ ኤራናዳ ኮዬስ። 5 ኢሲ ፆሲ ዴዔስ። ፆሳፌኔ ኣሳፔ ጊዶን ጊዲዲ ሲጌꬂያ ኢሶይ ዴዔስ፤ ኢካ ኣሴ ጊዲዳ ኪሪስቶስ ዬሱሳ። 6 ኢ ኣሳ ኡባ ዎዛናው ባና ኣꬂ ኢሚስ። ፆሳይ ባ ዎዲያን ኣሳ ኡባ ዎዛናው ኮዬይሳ ቤሲያ ማርካይ ሃይሳ። 7 ፆሳይ ታና ዎንጌላስ ኣስታማሬኔ ሃዋሬ ኦꬂዲ ዶሪዳይ ሄሳሳ። ታኒ ቱማ ኦዳይስ፤ ዎርዶቲኬ፤ ኣማኖኔ ቱማ ኣይሁዴ ጊዶና ኣሳስ ማርካታና ሜላ ፆሳይ ታና ሹሚስ። 2ፂሞ 1፡11

8 ሄሳ ጊሾ፥ ኡባ ቤሳን ዴዒያ ኣዴቲ፥ ባንታና ፆሳስ ዱማዪዲ፥ ሃንቆኔ ፓላማ ዲጊዲ፥ ባንታ ኩሺያ ፑዴ ዴንꬂዲ ፆሳ ዎሳና ሜላ ኮያይስ።

9 ሄሳዳ ማጫሳይ ባንታና ሃሪዳይሳ ቆንጪሲያ፥ ቦንቾይኔ ማሪ ዴዒያ ማዑዋ ማዓናው ቤሴስ። ኤንቲ ማሪ ባይና ሁዔ ዳꬃን፥ ዎርቃን ዎይኮ ኢንቆን፥ ዎይኮ ኣልዖ ኣፊላን ባንታና ኣሌቂሶፖ። 1ጴፂ 3፡3 10 ሺን ፆሳስ ጎይናይስ ጊያ ማጫሳይ ባንታው ቤሴይሳዳ ሎዖባ ኦꬆና።

11 ማጫሲ ኪቴቴꬃን ሲዒ ጊዲ ታማሮ። 12 ታኒ ማጫሳይ ታማርሳና ሜላ ዎይኮ ኣዴ ቦላ ኣዋታና ሜላ ጊዶናሺን ሲዒ ጊዲ ዳና ሜላ ኮያይስ። 13 ኣዳሜይ ኮይሮ ሜꬌቲስ፤ ጉዬፔ ሄዋና ሜꬌታሱ። ሜꬌ 2፡7፣ 21-22 14 ቃሲ ጪሜታዳ ፆሳ ሂጊያ ሜንꬂዳይ ማጫሲፔ ኣቲን ኣዳሜ ጊዴና። ሜꬌ 3፡1-6 15 ሺን ማጫሲ ኣማኖን፥ ሲቆኒኔ ጌሻቴꬃን ባንታና ሃሪዲ ዴዒኮ * ባንታና ሃሪዲ ዴዒኮ፡ ዎይኮ ኢያ ዬሊዳ ናይቲ ኣማኖን፥ ሲቆኒኔ ጌሻቴꬃን ባንታና ሃሪዲ ዴዒኮ። ናይታ ዬሎን ኣታና።