1 ሄሳ ጊሾ፥ ፆሳይ ፄጊዳ ጌሻ ኢሻቶ፥ ኑ ኣማኖን ጎዳ ጊዲ ፄጊያ ሃዋሪያኔ ካሂኔ ሃላቃ ዬሱሳ ቤዒቴ። 2 ሙሴይ ፆሳ ኬꬃ ኡባን ኣማኔቲዳይሳዳ ዬሱሲካ ባና ዶሪዳ ፆሳስ ኣማኔቲዳይሳ። 3 ኬꬄ ኬፄይሲ ኬꬃፌ ኣꬊዲ ቦንቼቴይሳዳ ዬሱሲ ሙሴፔ ኣꬊያ ቦንቾ ኤካናው ቤሴስ። 4 ኢሲ ኢሲ ኬꬃ ኬፂዳ ኣሲ ዴዔስ፥ ሺን ኡባ ጊጊሲዳይ ፆሳ። 5 ሙሴይ ፆሳ ኬꬃ ኡባን ኣማኔቲዳ ኣይሌ ጊዲዲ፥ ፆሳይ ሲንꬃፌ ጋናባስ ማርካ ጊዲስ። 6 ሺን ኪሪስቶሲ ፆሳ ኬꬃን ናዓዳ ኣማኔቲዳይሳ። ኑኒ ኤካና ጊዲ ናጊያ ኡፋይሳ ሚንꬂዲ ናጊኮ ፆሳ ኬꬂ ጊዶስ።

7 ሄሳ ጊሾ፥ ጌሻ ኣያናይ ጌይሳዳ፥

12 ታ ኢሻቶ፥ ሂንቴፌ ኦዴንካ፥ ዴዖ ፆሳፌ ሂንቴና ሻኪያ ኢታኔ ኣማኖና ዎዛኒ ዶና ሜላ ናጌቲቴ። 13 ሂንቴፌ ኦናካ ናጋሪ ባሌꬂን፥ ባ ዎዛና ሚንꬆና ሜላ «ሃቺ» ያጌቲዲ ፄጌቲሺን ጋላስ ጋላስ ኢሶይ ኢሱዋራ ዞሬቲቴ። 14 ኑ ኮይሮ ኣማኑዋ ኑኒ ዉርሴꬂ ጋካናው ሚንꬂዲ ናጊኮ፥ ኪሪስቶሳራ ኢሲፌ ላታና። 15 ጌሻ ማፃፋን፥

16 ፆሳይ ጊያባ ሲዒዲ ማካሊዳይ ኦኔ? ሙሴይ ጊብፄፌ ካሌꬂ ኬሲዳ ኡባ ጊዶኮናዬ? ታይ 14፡1-35 17 ፆሳይ ኦይታሙ ላይꬂ ኦና ሃንቄቲዴ? ናጋራ ኦꬂዳይሳታኔ ኤንታ ኣሃይ ባዞ ቢታን ዎꬊ ኣቲዳ ኣሳታ ጊዶኮናዬ? 18 ቃሲ ፆሳይ፥ «ታ ሼምፖ ቤሳ ጌሌኬታ» ያጊዲ ጫቂዳይ፥ ኢያው ኪቴቶና ኢፂዳ ኣሳፔ ኣቲን ኦዴሴ? 19 ሂዛ፥ ኤንቲ ሄ ሼምፖ ቤሳ ጌሎና ኣቲዳይ ኣማኒቦና ጊሾ ጊዴይሳ ኑ ቤዖስ።