3
ሳርዴሳ ዎሳ ኬꬃስ ኪቴቲዳ ኪታ
1 «ሳርዴሳ ዎሳ ኬꬃ ኪታንቹዋስ ሃይሳዳ ያጋዳ ፃፋ።
ላፑን ፆሳ ኣያናታኔ ላፑን ፆሊንቶታ ኦይኪዳይሲ ሃይሳዳ ያጌስ፡ ታኒ ኔ ኦሱዋ ኤራይስ፤ ኣሲ ኔና ፓፃ ዴዔስ ጊኮካ፥ ኔ ሃይቃዳሳ። 2 ባርካ! ጉꬃ ኣቲዳባኔ ሃይቃናው ማቲዳባ ሚንꬃ። ኔ ኦሶይ ፆሳ ሲንꬃን ፖሎ ጊዶናይሳ ዴማስ። 3 ሂዛ፥ ኔ ኤኪዳባኔ ሲዒዳባ ኣኬካ፤ ናጋ፤ ኔ ናጋራፔ ሲማ። ኔኒ ባርኮና ኢፂኮ ታ ካይሶዳ ያና፤ ታ ኣይ ዎዴ ያኔኮ ኔ ኤራካ። ማቶ 24፡43
4 ሺን ባንታ ማዑዋ ቂታዮና ጉꬃ ኣሳቲ ሳርዴሳን ዴዖሶና። ኤንታው ቤሲያባ ጊዲያ ጊሾ ቦꬃ ማዖ ማዒዲ ታራ ሃሙታና። 5 ፆኒያ ኦኒካ ኤንታይሳዳ ቦꬃ ማዖ ማዓና። ታኒ ኢያ ሱንꬃ ዴዖ ማፃፋፔ ቁቺኬ። ታኒ ታ ኣዋ ሲንꬃኒኔ ኢያ ኪታንቾታ ሲንꬃን ኢ ታባ ጊዴይሳ ማርካታና። ኬሳ 32፡32 6 ጌሻ ኣያናይ ዎሳ ኬꬃታስ ጊያባ ሲዒያ ሃይꬂ ዴዒያ ኦኒካ ሲዖ።
ፊላዴልፊያ ዎሳ ኬꬃስ ኪቴቲዳ ኪታ
7 «ፊላዴልፊያ ዎሳ ኬꬃ ኪታንቹዋስ ሃይሳዳ ያጋዳ ፃፋ።
ጌሻይኔ ቱማንቾይ፥ ዳዊቴ ቁልፒያ ባ ኩሼን ኦይኪዳይሲ፥ ሃይሳዳ ያጌስ፡ ኢ ጎርዲን ኦኒካ ዶያናው ዳንዳዔና፤ ቃሲ ኢ ዶዪን ኦኒካ ጎርዳናው ዳንዳዔና። ኢሳ 22፡22፤ ኢዮ 12፡14 8 ታኒ ኔ ኦሱዋ ኤራስ፤ ሄኮ ታ ኔ ሲንꬃን ኦኒካ ጎርዳናው ዳንዳዖና ዶያ ፔንጌ ዎꬃስ። ኔ ዎልቃይ ጉꬃ ጊዲኮካ፥ ታ ቃላ ናጋዳሳ፤ ታና ካዳባካ። 9 ኣይሁዴ ጊዶናሺን ባንታና ኣይሁዴ ጊያ ዎርዶታኔ ፃላሄ ባጋታ ኔኮ ኤሃናኔ ኔ ሲንꬃን ጉልባቲሳና። ታ ኔና ዶሴይሳ ኤንታና ኤሪሳና። ኢሳ 49፡23፤ 60፡14፤ ኢሳ 43፡4 10 ኔኒ፥ ‹ጌንጫ› ጋዳ ታ ኪቲዳ ኪታ ናጊዳ ጊሾ ኩሜꬃ ኣላሚያ ፓጫናው ያ ዋዬ ዎዲያፔ ታኒ ኔና ናጋና።
11 ታኒ ኤሌሳዳ ያና፤ ኦኒካ ኔ ካላቻ ኤኮና ሜላ ኔው ዴዒያባ ሚንꬃዳ ኦይካ። 12 ፆኒዳይሳ ታ ፆሳ ኬꬃን ቱሱ ኦꬃና፤ ኢ ያን ሜሪናው ዳና። ታኒ ታ ፆሳ ሱንꬃኔ ታ ፆሳ ካታማ ሱንꬃ ኢያ ቦላ ፃፋና፤ ኢያካ ታ ፆሳ ማታፔ ዎꬊያ ኦራꬃ ዬሩሳላሜ። ቃሲ ታ ታ ኦራꬃ ሱንꬃካ ኢ ቦላ ፃፋና። ዮ.ቆ 21፡2፤ ኢሳ 62፡2፤ 65፡15 13 ጌሻ ኣያናይ ዎሳ ኬꬃታስ ጊያባ ሲዒያ ሃይꬂ ዴዒያ ኦኒካ ሲዖ።
ሎዶቂያ ዎሳ ኬꬃስ ኪቴቲዳ ኪታ
14 «ሎዶቂያ ዎሳ ኬꬃ ኪታንቹዋስ ሃይሳዳ ያጋዳ ፃፋ።
‹ኣሚንዒ› ጊዲዳ ኣማኔቲዳ ቱማ ማርካይ፥ ፆሳ ሜꬌቴꬃ ሃሬይሲ ሃይሳዳ ያጌስ፡ ሌሚ 8፡22 15 ታኒ ኔ ኦሱዋ ኡባ ኤራይስ፤ ኔኒ ኢርፃ ዎይኮ ሚሻ ጊዳካ፤ ኔኒ ናምዓፌ ኢሱዋ ጊዲኮ ሎዖ! 16 ኔኒ ኢርፃ ዎይኮ ሚሻ ጊዶናሺን ቦልዖ ጊዲያ ጊሾ ታ ኔና ታ ዶናፔ ጩታና ሃናይስ። 17 ሂዛ፥ ኔኒ፥ ‹ታኒ ዱሬ፥ ሻሎራ ዴዓይስ፥ ታው ኣይቢባይካ ፓጪቤና› ያጋሳ። ሺን ኔኒ ሜቶታንቾ፥ ማንቆ፥ ቆቄኔ ካሎቲዳ ኣሲ ጊዴይሳ ኤራካ። 18 ሄሳ ጊሾ፥ ኔ ዱሬታናው ታማን ጌዪዳ ዎርቃ፥ ኔ ዬላ ካሉዋ ካማናው ቦꬃ ማዖኔ ሎይꬃ ፄላናው ማዲያ ኣይፌ ꬋሌ ታፔ ሻማና ሜላ ኔና ዞራይስ።
19 ታ ዶሴይሳ ሴራይሲኔ ሃንቃይስ፤ ሂዛ ሚና፤ ኔ ናጋራፔ ሲማ። ሌሚ 3፡12፤ ኢብ 12፡6 20 ሄኮ፥ ታ ካሬን ኤቃዳ ፄጋይስ። ኦኒካ ታ ፄሳ ሲዒዲ፥ ዉላ ዶዪኮ፥ ኢያኮ ጌላና፤ ኢያራ ኢሲፌ ካꬂ ማና፤ ኢካ ታራ ኢሲፌ ማና።
21 ታ ፆናዳ ታ ኣዋራ ኢያ ኣራታን ኡቲዳይሳዳ ፆኒዳይ ታራ ታ ኣራታን ኡታና ሜላ ማታ ኢማና። 22 ጌሻ ኣያናይ ዎሳ ኬꬃታስ ጊያባ ሲዒያ ሃይꬂ ዴዔይ ኦኒካ ሲዖ» ያጊስ።