1 ዶርሳይ ላፑን ማታሚያፔ ኢሱዋ ዶዪሺን ቤዓስ። ቃሲ ኦይዱ ዴዖን ዴዒያ ሜꬌቴꬃታፔ ኢሶይ፥ ዳዳ ዴሾ ጊርሳን፥ «ሃያ!» ያጊሺን ሲዓስ። 2 ሄኮ ቦꬃ ፓራ ቤዓስ። ሄ ፓራ ቶጊዳሲ ዶንጌ ኦይኪስ፤ ኢያ ሁዔን ካላቺ ዴዔስ። ኢካ ፆኒሼ ፆናናው ኬዪስ። ዛካ 1፡7

3 ቃሲ ዶርሳይ ናምዓንꬆ ማታሚያ ዶዪዳ ዎዴ ዴዖን ዴዒያ ናምዓንꬆ ሜꬌቴꬃይ፥ «ሃያ!» ያጊሺን ሲዓስ። 4 ቃሲ ሃራ ሲሃ ዞዖ ፓሪ ኬዪስ። ሄ ፓራ ቶጊዳይሳስ ሳዓፔ ሳሮ ꬋይሳና ሜላኔ ኣሳይ ዎሊ ዉርሳና ሜላ ማቲኔ ጊታ ማሺ ኢሜቲስ። ዛካ 1፡7

5 ዶርሳይ ሄꬓንꬆ ማታሚያ ዶዪዳ ዎዴ ዴዖን ዴዒያ ሄꬓንꬆ ሜꬌቴꬃይ፥ «ሃያ!» ያጊሺን ሲዓስ። ሄኮ ካሬꬃ ፓራ ቤዓስ፤ ኢካ ባ ኩሼን ሚዛኔ ኦይኪስ። ዛካ 6፡2 6 ኦይዱ ዴዖን ዴዒያ ሜꬌቴꬃታ ጊዶፌ፥ «ኢሲ ጋላሳ ኦሶስ ዳሞዜ፥ ባጋ ኪሎ ጊስቴ፤ ቃሲ ኢሲ ጋላሳ ኦሶስ ዳሞዜ፥ ኢሲ ኪሎኔ ባጋ ባንጋ ጊዶ። ሺን ዛይቲያኔ ዎይኒያ ቆሆፓ» ያጊሺን ሲዓስ።

7 ዶርሳይ ኦይዳንꬆ ማታሚያ ዶዪዳ ዎዴ ኦይዳንꬆ ዴዖን ዴዒያ ሜꬌቴꬃይ፥ «ሃያ!» ያጊሺን ሲዓስ። 8 ሄኮ ዋንጮ ፓራ ቤዓስ። ሄ ፓራ ቶጊዳይሳ ሱንꬃይ ሃይቆ፤ ኢያ ጌዶ ሲዖሌይ ካሌስ። ኤንታው ኣላሜፔ ኦይዳንꬆ ኩሺያ ኦላን፥ ኮሻን፥ ጋዶኒኔ ዶዓን ዎꬊሳና ሜላ ማቲ ኢሜቲስ። ሂዝ 14፡21

9 ዶርሳይ ኢቻሻንꬆ ማታሚያ ዶዪዳ ዎዴ ኤንቲ ፆሳ ቃላ ኦዲዳ ጊሾኔ ባንታ ማርካቴꬃን ኣማኔቲዳ ጊሾ ሹኬቲዳ ኣሳ ሼምፖታ ያርሾ ቤሳፌ ጋርሳን ቤዓስ። 10 ኤንቲ ባንታ ቃላ ꬎቁ ኦꬂዲ፥ «ኡባ ሃሪያ ጎዳው፥ ጌሻው፥ ቱማንቹዋው፥ ሳዓን ዴዒያ ኣሳ ቦላ ኔ ፒርዳናይኔ ኑ ሱꬃ ጊሾ ሃሎ ኬያናይ ኣዉዴ?» ያጊዶሶና። 11 ኤንታ ኢሱዋስ ኢሱዋስ ቦꬃ ማዖይ ኢሜቲስ። ኤንታይሳዳ ሃኒዲ ሃይቃናው ቤሲያ ኤንታ ላጌታ ታይቦይ ኩማና ጋካናው ጉꬃ ዎዴ ሼምፓና ሜላ ኤንታው ኦዴቲስ።

12 ዶርሳይ ኡሱፑንꬃ ማታሚያ ዶዪዳ ዎዴ ታ ቤዓስ፤ ዎልቃማ ቢታ ቃፆይ ሃኒስ። ኣዋ ኣይፌይ ካሬፂዲ ካሌ ዳኒስ። ኣጌናይካ ዞዒዲ ሱꬁ ዳኒስ። ዮ.ቆ 11፡13፤ 16፡18፤ ኢሳ 13፡10፤ ኤር 2፡10 13 ዎልቃማ ጫርኮይ ጫርኪዲ ባላሴ ሚꬃ ቃዉዔ ኣይፊያ ቆቆፌይሳዳ ሳሉዋ ፆሊንቶቲ ሳዓን ቆቆፌቲዶሶና። ኢሳ 34፡4 14 ሳሎይ ፃꬃ ማፃፋዳ ፃፄቲዲ ኣꬊስ፤ ዙማይኔ ኣባን ቴቄቲዳ ቢታቲ ባንታ ቤሳፌ ꬋዪዶሶና። ዮ.ቆ 16፡20 15 ቢታ ካዎቲ፥ ዴሪያ ሃሬይሳቲ፥ ኦላ ካሌꬄይሳቲ፥ ዱሬቲ፥ ዎልቃማቲ፥ ኣይሌቲኔ፥ ዎማኖቲ ጎንጎሎኒኔ ዴሪያ ቦላ ዴዒያ ዛላ ሆምዖን ቆሴቲዶሶና። ኢሳ 2፡19 16 ኤንቲካ ዙማኮኔ ዛላኮ፥ «ኑ ቦላ ዎꬊቴ፤ ኑና ቆሲቴ፤ ኣራታን ኡቲዳይሳ ኣይፊያፔኔ ዶርሳ ሃንቁዋፌ ኑና ጌንꬂቴ። ሆሴ 10፡8፤ ሉቃ 23፡30 17 ሂዛ፥ ጊታ ሃንቆ ጋላሳይ ጋኪስ፤ ኦኔ ዳንዳዒዲ ኤቃናይ?» ያጊዶሶና። ኤር 2፡11፤ ሚል 3፡2