1 ዶርሳይ ላፑንꬃ ማታሚያ ዶዪዳ ዎዴ ባጋ ሳቴ ጊዴይሳ ሜላ ሳሎይ ሲዒ ጊስ።

2 ሄሳፌ ጉዬ፥ ታኒ ላፑን ሞይዜቲ ኢሜቲዳ ላፑን ኪታንቾታ ፆሳ ሲንꬃን ኤቂዳይሳታ ቤዓስ።

3 ኢፃኔ ጩዪሲያ ዎርቃ ሻቴ ኦይኪዳ ሃራ ኪታንቾይ ዪዲ፥ ያርሾ ቤሳ ማታን ኤቂስ። ኢ ኣራታ ሲንꬃን ዴዒያ ዎርቃ ያርሾ ቤሳ ቦላ ጌሻታ ኡባ ዎሳራ ጉጂዲ ያርሻና ሜላ ኢያው ዳሮ ኢፃኔይ ኢሜቲስ። 4 ኢፃኒያ ጩያይ ጌሻታ ዎሳራ ኢሲፌ ኪታንቹዋ ኩሼፔ ፑዴ ፆሳኮ ኬዪስ። 5 ሄሳፌ ጉዬ፥ ኪታንቾይ ኢፃኔ ጩዪሲያ ሻቲያ ኤኪዲ፥ ኢያን ያርሾ ቤሳፌ ቦንቆ ታማ ኩንꬂዲ ሳዓ ዱጌ ሆሊስ። ያቲን ዴሾይ፥ ዎልዓንꬂ፥ ጊርሲኔ ቢታ ቃፆይ ሃኒስ። ሌዌ 16፡12፤ ሂዝ 10፡2፤ ኬሳ 19፡16፤ ዮ.ቆ 11፡19፤ 16፡18

6 ሄሳፌ ጉዬ፥ ላፑን ኪታንቾቲ ባንታ ሞይዚያ ፑናናው ጊጌቲዶሶና።

7 ኮይሮ ኪታንቾይ ባ ሞይዚያ ፑኒያ ዎዴ ሻቺኔ ሱꬃራ ዋላኬቲዳ ታሚ ሳሎፔ ቡኪስ። ሳዓፔ ሲኮይ ፁጌቲስ፤ ሚꬃፌ ሲኮይ ፁጌቲስ፤ ጪልዖ ማታ ኡባይ ፁጌቲስ። ኬሳ 9፡23-25፤ ሂዝ 38፡22

8 ናምዓንꬆ ኪታንቾይ ባ ሞይዚያ ፑኒዳ ዎዴ ዎልቃማ ዴሬ ዳኒያባይ ታማን ኤፂሼ ኣባን ዬጌቲስ። ያቲን፥ ኣባፌ ሲኮይ ሱꬁ ጊዲስ። 9 ኣባን ዴዖን ዴዒያ ሜꬌቴꬃፌ ሲኮይ ሃይቂስ፤ ማርካቤታፔ ሲኮይ ꬋይስ።

10 ሄꬓንꬆ ኪታንቾይ ባ ሞይዚያ ፑኒዳ ዎዴ ፆምፔዳ ኤፂያ ዎልቃማ ፆሊንቶይ ሻፋፔ ሲኩዋ ቦላኔ ፑልቶታ ቦላ ሳሎፔ ዎꬊስ። ኢሳ 14፡12 11 ሄ ፆሊንቱዋ ሱንꬃይ ጫሞ ጌቴቴስ። ሃꬃፌ ሲኩዋ ጫሚሲስ፤ ሃꬃይ ጫሚዳ ጊሾ ዳሮ ኣሳይ ሄ ሃꬃ ኡዪዲ ሃይቂዶሶና። ኤር 9፡15

12 ኦይዳንꬆ ኪታንቾይ ባ ሞይዚያ ፑኒስ። ኣዋፔ፥ ኣጌናፔኔ ፆሊንቶታፔ ሲኩዋ ዴቺስ፤ ኤንታ ፖዑዋፔ ሲኮይ ꬉሚስ። ጋላሳፔ ሲኮይ፥ ቃማፌካ ሲኮይ ꬉሚስ። ኢሳ 13፡10፤ ሂዝ 32፡7፤ ኢዩ 2፡10

13 ኢሲ ኣርጋንꬂ ሳሎ ꬎቁ ጊዲ፥ ፒራꬊሺን ቤዓስ። ሄ ኣርጋንꬃይ ባ ቃላ ꬎቁ ኦꬂዲ፥ «ኣቲዳ ሄꬑ ኪታንቾቲ ባንታ ሞይዚያ ፑናናው ዴዒያ ጊሾ ሳዓን ዴዒያ ኣሳ ኣዬ! ኣዬ! ኣዬ!» ያጊሺን ሲዓስ።